သွေးဆုံးချိန်မှာ ကျန်းမာစေဖို့ ဘာတွေစားရမလဲ

အမျိုးသမီးတွေ အသက် ၄၅ နှစ်ကျော်ပြီး ၅၀ ဝန်းကျင်ရောက်လာတဲ့အခါ မကြုံချင်လည်း ရှောင်လွှဲလို့ မရဘဲ ကြုံရတဲ့ ကျန်းမာရေး ပြဿနာ တစ်ခုရှိပါတယ်။ ဒါကတော့ သွေးဆုံးတာပါ။ ရာသီသွေးမဆင်းတော့ဘဲ မမျိုးဥအိမ်က မျိုးဥတွေ မရှိတော့တဲ့ ကာလပေါ့။ ဒီလို သွေးဆုံးချိန်မှာ ကိုယ်တွင်းဟော်မုန်းတွေ ပြောင်းလဲတာ ဟော်မုန်း ပမာဏ မညီမျှမှုတွေဖြစ်ပြီး သွေးဆုံးကိုင်တယ်လို့ ခေါ်ကြတဲ့ ကျန်းမာရေးပြဿနာတွေကို ခံစားကြရပါတယ်။

ဒီလို သွေးဆုံးကိုင်တဲ့ အခြေအနေကို ကျန်းကျန်းမာမာ ရင်ဆိုင်နိုင်စေဖို့ဆိုရင် စားပေးသင့်တဲ့ အစားအစာလေးတွေ ရှိပါတယ်။ ဒါတွေက ဘာတွေဖြစ်မလဲဆိုတာကို သိချင်နေပြီလား ….. ဒါဆိုရင်တော့ သွေးဆုံးချိန်မှာ ကျန်းမာစေဖို့ ဘာတွေစားရမလဲ ဆိုတာကို အတူတူ ကြည့်လိုက်ရအောင်နော်။

သွေးဆုံးခြင်း

>> သွေးဆုံးတယ် ဆိုတာ

• သွေးဆုံးတယ်ဆိုတာက အမျိုးသမီးတွေရဲ့ ခန္ဓာကိုယ်ထံမှာ ဖြစ်တတ်တဲ့ သဘာဝဇီဝဖြစ်စဉ် တစ်ခုပါ။ ဒီကာလမှာ ရာသီသွေးဆင်းတာ ရပ်သွားသလို မျိုးဥအိမ်က နောက်ထပ် မျိုးဥတွေကိုလည်း မထုတ်တော့ပါဘူး။
• သွေးဆုံးတာက အမျိုးသမီး အများစုမှာ အသက် ၄၀ ကနေ ၅၀ အတွင်းမှာ ဖြစ်တတ်ပါတယ်။ ၄၆ နှစ်လောက်မှာ သွေးဆုံးကြတာ များပါတယ်။
• ရာသီသွေး လုံးဝမဆင်းတော့တာ တစ်နှစ်လောက်ကြာမှ သွေးဆုံးတယ်ဆိုတာကို သိကြတာ များပါတယ်။
• သွေးဆုံးချိန်မှာ ကိုယ်တွင်းဟော်မုန်းတွေ ပြောင်းလဲတာကြောင့် ညဘက်မှာ ချွေးစေးတွေ ထွက်တာ၊ ပူစပ်ပူလောင်ဖြစ်တာ၊ စိတ်ပူပန်မှုတွေ များတာ၊ အိပ်ရေးပျက်တာကြောင့် အားမရှိတာ၊ စိတ်ခံစားမှုပိုင်းဆိုင်ရာ ပြောင်းလဲတာတွေကို ခံစားရနိုင်ပါတယ်။
• ကုထုံးအနေနဲ့ကတော့ သွေးဆုံးလက္ခဏာတွေ သက်သာစေဖို့ ဟော်မုန်း အစားထိုးကုထုံး [HRT] ကို ခံယူလို့ ရသလို နေထိုင်မှုပုံစံ ပြောင်းလဲတာတွေကိုလည်း လုပ်ဆောင်ပေးလို့ ရပါတယ်။

သွေးဆုံးကိုင် လက္ခဏာတွေ

>> သွေးဆုံးချိန် လက္ခဏာများ

သွေးဆုံးချိန်မှာ

• မိန်းမကိုယ် ခြောက်သွေ့တာ
• ပူစပ်ပူလောင် ဖြစ်တာ
• ညက်တွေ ချွေးစေးပြန်တာ
• ချမ်းတုန်တာ
• အိပ်ရေးပျက်တာ
• ဆီးလမ်းကြောင်း ပိုးဝင်တာ
• စိတ်ခံစားမှု ပြောင်းလဲတာ
• ဇီဝကမ္မဖြစ်ပျက်မှုနှုန်း ကျဆင်းသွားတာ
• ကိုယ်အလေးချိန် တက်လာတာ
• သွေးဆုံးချိန်မှာ ကျန်းမာစေဖို့ ဘာတွေစားရမလဲ
• ဆံပင်ပါးတာ
• အသားအရေ ခြောက်သွေ့တာ
• ရင်သားတွေ လျော့ရဲလာတာကို ခံစားရနိုင်ပါတယ်။

သွေးဆုံးချိန်မှာ ကျန်းမာစေဖို့

>> သွေးဆုံးချိန်မှာ ကျန်းမာစေဖို့ ဘာတွေစားရမလဲ

သွေးဆုံးချိန်မှာ ကျန်းမာစေဖို့ အာဟာရပြည့်ဝမျှတတဲ့ အစားအစာတွေကို စားသုံးပေးဖို့ လိုပါမယ်။ အာဟာရပြည့်ဝမျှတစွာ စားသုံးခြင်းက သွေးဆုံးချိန်မှာ ကျန်းမာနေစေဖို့ ထောက်ကူပေးနိုင်မှာပါ။ ယေဘုယျအားဖြင့်တော့ phytoestrogen ကြွယ်ဝတဲ့ အစားအစာတွေကို စားပေးနိုင်ပါတယ်။ အီစထရိုဂျင်လို အာနိသင်ပေးတာကြောင့် သွေးဆုံးကိုင် လက္ခဏာတွေကို သက်သာစေပါတယ်။

ဒီတော့ သွေးဆုံးချိန်မှာ ကျန်းမာစေဖို့ ဘာတွေစားရမလဲ ဆိုတော့

#အခွံမာသီးတွေ

အခွံမာသီးတွေမှာ စိုးရိမ်ပူပန်မှု၊ အိပ်မပျော်တာတွေ၊ စိတ်ခံစားမှု အတက်အကျမြန်တာတွေ၊ စိတ်ဖိစီးမှုတွေကို သက်သာစေနိုင်တဲ့ သတ္တုဓာတ် တစ်မျိုးဖြစ်တဲ့ မဂ္ဂနီဆီယမ် ပါဝင်နေပါတယ်။ မဂ္ဂနီဆီယမ်က အရိုးတွေ ကျန်းမာစေဖို့လည်း ထောက်ကူပေးပါတယ်။

နောက်တစ်ချက်က အခွံမာသီးတွေမှာ သွေးဆုံးကိုင်တာကို သက်သာစေနိုင်တဲ့ ပရိုတင်း၊ omega-3 fats၊ ကယ်လ်ဆီယမ်၊ ဇင့်တို့ ပါဝင်နေတာပါ။

အခွံမာသီးက ကယ်လ်လိုရီ ပါဝင်မှု များတာကြောင့် တစ်နေ့ကို လက်တစ်ဆုပ်စာလောက်ပဲ စားဖို့ အကြံပြုချင်ပါတယ်။

# ဘယ်ရီသီးတွေ

ဘယ်ရီသီးတွေက ချိုသလို အမျှင်ဓာတ်လည်း ကြွယ်ဝပါတယ်။ ရောဂါတွေကို တိုက်ထုတ်နိုင်တဲ့ အာဟာရဓာတ်တွေ နဲ့ ဓာတ်တိုးဆန့်ကျင်ပစ္စည်းတွေလည်း ကြွယ်ဝစွာ ပါဝင်နေပါတယ်။ ဦးနှောက်ကျန်းမာစေနိုင်သလို သွေးဆုံးချိန်မှာ ခံစားရနိုင်တဲ့ စိတ်ဖိစီးမှုတွေကိုလည်း သက်သာစေနိုင်ပါတယ်။

# အစိမ်းရောင် ဟင်းသီးဟင်းရွက်တွေ

အစိမ်းရောင် ဟင်းသီးဟင်းရွက်တွေက ကယ်လ်ဆီယမ် ကြွယ်ဝပြီး အရိုးတွေကို သန်မာစေပါတယ်။ သွေးဆုံးချိန်မှာ ခံစားရနိုင်တဲ့ အရိုးပွတာကို သက်သာစေနိုင်ပါတယ်။ ဓာတ်တိုးဆန့်ကျင်ပစ္စည်း ကြွယ်ဝတာက အရောင်ကျစေနိုင်တဲ့ အာနိသင် ရှိပါတယ်။

ဟင်းနုနွယ်၊ ကိုက်လန်၊ မုန်ညှင်းစိမ်း စတာတွေကို စားပေးလို့ ရပါတယ်။

#နှံစားသီးနှံတွေ

နှံစားသီးနှံတွေမှာ ဗီတာမင် B၊ သတ္တုဓာတ်တွေ၊ အာဟာရဓာတ်တွေနဲ့ အမျှင်ဓာတ်တို့ ပါဝင်နေပါတယ်။ ဇီဝကမ္မဖြစ်စဉ်ကို တိုးတက်ကောင်းမွန်စေပြီး ခန္ဓာကိုယ်ကို အင်အားပြည့်ဝစေဖို့ ထောက်ကူပေးပါတယ်။ ကိုလက်စထရော ကျဆင်းစေပါတယ်။ နေ့စဉ်ပုံမှန် စားသုံးပေးသင့်ပါတယ်။

#နနွင်း

နနွင်းက ဆေးဖက်ဝင်သလို အမျိုးသမီးကျန်းမာရေးအတွက်လည်း ကောင်းပါတယ်။ စိတ်ဓာတ်ကျတာမဖြစ်အောင် ကာကွယ်ပေးသလို သွေးဆုံးချိန်မှာ ခံစားရတာတွေကိုလည်း သက်သာစေနိုင်ပါတယ်။ နို့နဲ့ ဖျော်သောက်ပေးလို့ ရပါတယ်။

#ပန်းဂေါ်ဖီစိမ်း

ပန်းဂေါ်ဖီစိမ်းက အီစထရိုဂျင်ပမာဏကို မြှင့်တင်ပေးပါတယ်။ ကယ်လ်ဆီယမ် ကြွယ်ဝတာကြောင့် အရိုးသိပ်သည်းဆကို ကောင်းစေပါတယ်။ အမျှင်ဓာတ် ပါဝင်မှုက သွေးဆုံးချိန်မှာ ခံစားရနိုင်တဲ့ အစာခြေစနစ် ပြဿနာတွေ ကင်းစေပါတယ်။ တစ်ပတ်ကို ၅ ကြိမ်လောက် စားပေးသင့်ပါတယ်။

#ဥအမျိုးမျိုး

သွေးဆုံးချိန်မှာ အမျိုးသမီးတွေက သံဓာတ်နဲ့ ဗီတာမင် D လျော့နည်းနေတတ်ပါတယ်။ ဥအမျိုးမျိုးက ဗီတာမင် D၊ သံဓာတ် နဲ့ ပရိုတင်းတို့ ပါဝင်နေပါတယ်။ သွေးတွင်းကိုလက်စထရော ကျဆင်းစေပြီး သွေးဆုံးချိန် ဝလာတာမျိုး မဖြစ်အောင် ကာကွယ်ပေးနိုင်ပါတယ်။

# နို့ နဲ့ နို့ထွက်ပစ္စည်း

နို့ နဲ့ နို့ထွက်ပစ္စည်းတွေက ကယ်လ်ဆီယမ် ကြွယ်ဝတာကြောင့် အရိုးသိပ်သည်းဆ ကောင်းစေပါတယ်။ ဗီတာမင် D ကြွယ်ဝမှု နဲ့ ပရိုတင်း ပြည့်ဝမှုက အိပ်ပျော်စေပါတယ်။ ဒိန်ချဉ်လိုမျိုး အကျိုးပြုဘက်တီးရီးယား ကြွယ်ဝတဲ့ နို့ထွက် အစားအစာတွေက အစာခြေစနစ် ကျန်းမာစေပြီး ကိုယ်ခံအားကောင်းစေသလို အသားအရေကိုလည်း ကျန်းမာစေပါတယ်။