လူစိမ်းများက မိမိကိုယ်ဝန်နှင့်ပတ်သက်ပြီး အကြံဉာဏ်တွေပေးလာတဲ့အခါ ဘယ်လိုလုပ်မလဲ

ရင်သွေးလေးရှိလာတဲ့အခါ မိမိအမေ၊ အစ်မ၊ အဖွားစသဖြင့် အတွေ့အကြုံရှိဖူးတဲ့ မိခင်တွေဆီက နှစ်သိမ့်မှုတွေ ၊ မှတ်သားစရာအကြံဉာဏ်လေးတွေရနိုင်ပါတယ်။ ဒါပေမယ့် အခြားသောလူစိမ်းတယောက်ယောက်ကသူတို့အတွေ့အကြုံပြောပြတာမျိုး၊ နောက်ဆုံးမိမိဝမ်းဗိုက်ကိုထိတွေ့သည်ထိလုပ်လာခဲ့မယ်ဆိုရင်တော့ သင်ကဒီတိုင်းပြုံးရင်းခေါင်းညိတ်လိုက်ရုံ၊ ဒါမှမဟုတ် ထွက်သွားချင်စိတ်ထိ ဖြစ်ပေါ်လာစေပါလိမ့်မယ်။ တစ်ခါတလေမိခင်လောင်းတချို့ကတော့အာရုံသိပ်မစိုက်ကြပေမယ့် တချို့သဘောမတွေ့တတ်တဲ့ မိခင်လောင်းတွေအတွက် မလိုချင်တဲ့အကြံပေးမှုတွေကိုရင်ဆိုင်ဖြေရှင်းနည်းလေးတွေဖြစ်ပါတယ်။

ဒီလိုမျိုးတွေ ဘယ်တွေကနေကြုံရမလဲ

သင်ရရှိတဲ့ အကြံဉာဏ်တွေဟာကိုယ်ဝန်ဆောင်နဲ့ပတ်သက်တဲ့အထွေထွေကိစ္စလေးတွေကစလို့ ခြုံငုံပြောတာမျိုးတွေအထိအမျိုးမျိုးရှိနိုင်ပါတယ်။ သာမန်အားဖြင့်တော့ အမေ၊ အဖွား၊ အစ်မတွေနဲ့ ရင်းနှီးတဲ့သူငယ်ချင်းတွေဆီကရတဲ့ အကြံဉာဏ်တွေကတကယ်ကိုလှိုက်လှိုက်လှဲလှဲရိုးသားဖြူစင်ပါတယ်။ တချို့တွေကရှေးနည်းတွေဖြစ်ကောင်းဖြစ်နိုင်ပေမယ့် မမေ့ပါနဲ့! နည်းလမ်းအသစ်တိုင်းကခေတ်မှီပြီးကောင်းမွန်တိုးတက်နေတာမဟုတ်ပါဘူး။ ထိုအမျိုးသမီးတွေရဲ့ အားပေးနှစ်သိမ့်တာတွေ အကြံဉာဏ်တွေနဲ့ ချစ်ခင်ရင်းနှီးမှုတွေကတန်ဖိုးထားနှစ်ခြိုက် ကျေးဇူးတင်စရာတွေပါ။

လုပ်ဖော်ကိုင်ဖက်တွေနဲ့ ဆေးရုံမှာစောင့်နေတုန်းကသင့်နောက်ကတန်းစီနေတဲ့အမျိုးသမီးလိုမျိုးတွေကလည်းများသောအားဖြင့်တော့ ကောင်းသောရည်ရွယ်ချက်နဲ့အကြံပေးခြင်းဖြစ်ပါတယ်။

ဒါပေမယ့် ထိုသူတွေကသင့်ကိုသင့်ရဲ့ဆံပင်ပုံစံ၊ အဝတ်အစားပုံစံတွေလိုမျိုးကိုတော့ အကြံဉာဏ်မပေးဝံ့ကြဘဲ ဘာကြောင့် ကိုယ်ဝန်နဲ့ပတ်သက်တာကတော့အများဆိုင်ရာကိစ္စလိုဖြစ်နေရပါသလဲ။ သူတို့တွေဆီကအကြံဉာဏ်တွေ ဝေဖန်ထောက်ပြချက်တွေကလုံးဝသာမန်တွေဖြစ်ပြီးတန်ဖိုးမရှိတတ်ပါဘူး၊ သူတို့ကသင့်ကိုရောသင့်ကိုယ်ဝန်အခြေအနေကိုရောသိကြတာမဟုတ်ဘူးလေ။

သင့်ခံစားချက်အတိုင်းတုံ့ပြန်ပါ

တချို့အမျိုးသမီးတွေကတခြားသူတွေထက် ပိုပြီးလူမှုရေးကောင်းတတ်ကြတယ်၊ အလိုအလျောက်ကိုပေါင်းရသင်းရလွယ်သူများဖြစ်ကြတယ်။ သင်ဟာအဲဒီလိုလူဆိုလျှင်တော့ သင်ကိုယ်ဝန်ဆောင်ချိန်မှာလည်းထိုကဲ့သို့ပဲဖြစ်မှာပါပဲ။ ဆရာဝန်ပြဖို့စောင့်ဆိုင်းနေတဲ့အခန်းထဲမှာတခြားအမျိုးသမီးတွေနဲ့ ပြောဆိုဖလှယ်ရတာကို နှစ်ခြိုက်ပါလိမ့်မယ်၊ ကြီးသူတွေကအလေးအပင်တွေမ,မဖို့ တွေသတိပေးတာကိုသဘောကျပါလိမ့်မယ်။ ဒါ့အပြင် တကယ်လို့ သင်ဟာလူမှုရေးကောင်းသူတစ်ယောက်ဆိုလျှင် သင့်ကိုယ်ဝန်နဲ့ပတ်သက်ပြီးသင်အံ့ဩသဘောကျစိတ်လှုပ်ရှားတာတွေကိုတခြားလူတွေအားလုံးကိုလည်းသိစေပါလိမ့်မယ်။ ဒီလိုမျိုးဆိုရင်တော့ မသိတဲ့လူစိမ်းတစ်ယောက်ကမိမိဝမ်းဗိုက်ကိုထိတွေ့တာမျိုးကိုဘယ်လိုမှကိုနေမှာမဟုတ်ပါဘူး။ ဒါပေမယ့် ကိုယ်ဝန်ဆောင်သည်တွေထဲမှာထိုကဲ့သို့ညွှန်ပြချက်တွေကိုမလိုချင်တဲ့လူမျိုးအနည်းဆုံးတော့ တစ်ယောက်လောက်ရှိတတ်ပါတယ်။

တခြားသူတွေကသင့်ကိုဘယ်လိုလုပ်ရမယ် အကြံတွေပေးတဲ့အခါ သင်ကသင့်ရဲ့ပုံစံပေါ်မူတည်ပြီးအောက်မှာဖော်ပြထားတဲ့ တုံ့ပြန်မှုမျိုးလေးတွေထဲကတစ်ချက်၊ ဒါမှမဟုတ် ပိုပြီးသုံးကြည့်လို့ရပါတယ်။

• ပြုံးပြပြီးခေါင်းလေးပဲညိတ်လိုက်ပါ။ ထိုသို့ပြုမူလိုက်ခြင်းဟာသင်ကသူတို့ကိုနားထောင်နေတယ်လို့ဖော်ပြလိုက်ခြင်းဖြစ်တယ်(သင်တကယ်နားမထောင်နေဘူးဆိုလျှင်တောင်မှ) ပြီးတော့ ဒီလိုနည်းနဲ့ ပြဿနာလေးတွေကိုရှောင်နိုင်တယ်။

• အောက်ဖော်ပြပါတွေထဲကလိုပြောနိုင်ပါတယ်။

ကျွန်မနဲ့ ခင်ပွန်းကဒီလိုဆုံးဖြတ်ထားပြီးပြီမို့လို့ ဒီလိုနည်းကပဲပိုကောင်းမယ်ထင်ပါတယ်။

ဆရာဝန်ကကျွန်မတို့ကိုဒီလိုအကြံပေးထားတာမို့လို့ ကျွန်မတို့နှစ်ယောက်စလုံးဒီလိုပဲလိုက်နာတာကောင်းပါလိမ့်မယ်၊ ဆရာဝန်ကအသိဆုံးဆိုတော့လေဟုတ်လား၊

ကျွန်မသိတာတော့ ဒါက ကျွန်မရွေးချယ်လို့ရတဲ့ထဲမှာအဆိုးဆုံးလို့သိထားတာ..

ကျေးဇူးတင်ပါတယ်၊ ကျွန်မလုပ်ကြည့်လိုက်ပါမယ်နော်၊

ဒါမှမဟုတ် စကားလမ်းကြောင်းလွဲပစ်လိုက်ပါ၊

“ ဟိုဇာတ်လမ်းနောက်ဆုံးပိုင်းကြည့်ဖြစ်လိုက်သေးလား” ဖြစ်ဖြစ်..၊ “ ဈေးဆိုင်အသစ်ဖွင့်တယ်၊ သွားကြည့်ပြီးပြီလား” စသည်ဖြင့်….

သင်နဲ့ရင်းနှီးနေတဲ့လူတွေကလွဲရင် တခြားလူတွေကိုသင့်ကိုယ်ဝန်နဲ့ပတ်သတ်တဲ့အကြောင်းအရာတွေ၊ စိုးရိမ်မှုတွေကိုပြောမပြပါနဲ့။ တချို့လူတွေကဒါကိုအခွင့်အရေးယူပြီးသင်ကသူတို့ကိုနားထောင်ရတော့မယ်လို့တွေးသွားနိုင်ပါတယ်။ ထိုကဲ့သို့အခြေအနေတွေကြုံလာလျှင်တော့ ပြုံးပြပြီးခေါင်းလေးညိတ်လိုက်တာဖြစ်ဖြစ် ပြုံးပြပြီး

ထွက်သွားလိုက်တာမျိုးကလုပ်သင့်ပါတယ်။

“အဖွဲ့အစည်းကနေကြိုဆိုပါတယ်”

ဖော်ပြပါအကြံဉာဏ်မျိုးတွေအပြင် သင့်မွေးရက်နဲ့ ကလေးကယောက်ျားလေးလားမိန်းကလေးလားဆိုတာကိုသင်နဲ့ရင်းနှီးတဲ့လူတွေရဲ့ တဝက်ကျော်ကျော်လောက်ကမေးနိုင်ခြေရှိပါတယ်။ ရင်သွေးလေးရတော့မယ့်ကိစ္စဆိုတာဘက်စ်ကားပေါ်ကစိတ်အဆတ်ဆုံးအဖွားအိုတောင်မှ ပြုံးသွားစေနိုင်လောက်တဲ့ စိတ်လှုပ်ရှားစရာကိစ္စလေးပါ။ ကိုယ်ဝန်ရှိခြင်းကလေးရခြင်းတွေဟာစကြာဝဠာတစ်ခုလုံးကအမျိုးသမီးတွေကြားကိုချည်နှောင်ဆက်စပ်ပေးထားတာပါ။

အဲ့ဒီအရာတွေက ကျွန်ုပ်တို့တွေကိုတူညီအောင်၊ တစ်ချိန်ထဲမှာပဲသူမတူထူးခြားနေအောင်စွမ်းဆောင်ပေးထားပါတယ်။ ဒီမေးခွန်းတွေကအမျိုးသမီးတိုင်းရဲ့ အလိုအလျောက်မေးလေ့ရှိတဲ့ မေးခွန်းလေးတွေဖြစ်ပြီးအချင်းချင်းမသိလိုက်မသိဖာသာနဲ့ ငါတို့အသင်းအဖွဲ့ကကြိုဆိုပါတယ် လို့ပြောနေသယောင် ချည်နှောင်ပေးသယောင်ဖြစ်နေပါတယ်။

စိတ်မရှိပါနဲ့ ဒါကျွန်မဗိုက်ပါ၊

လူစိမ်းတွေဆီကမေးခွန်းတွေကလက်ခံလို့ရနိုင်ပါသေးတယ်။ လူစိမ်းတွေဆီကအကြံဉာဏ်တွေကသင့်ကိုစိတ်အနှောင့်အယှက်ပေးနိုင်ပေမယ့် သည်းခံလို့ရနိုင်ပါသေးတယ်။ ဒါပေမယ့် ခွင့်မပြုဘဲသင့်ဗိုက်ပေါ် လက်တင်တာမျိုးကတော့ သည်းခံနိုင်မှုကိုကျော်လွန်သွားပါပြီ။ ဒါကဖြစ်သင့်တာမဟုတ်သလိုသင်သည်းခံဖို့လည်းမလိုပါဘူး။

အဲဒီလိုဖြစ်လာရင်တော့(တကယ်လို့အဲဒီလိုဖြစ်မလာဘူးဆိုရင်လည်းသင်တော်တော်ကံကောင်းတာပါ)

သင်က “စိတ်မရှိပါနဲ့၊ ဒါပေမယ့် ကျွန်မကိုထိပါးဖို့ထိသင့်ကိုခွင့်မပြုထားပါဘူး” ဟုဆိုကာလက်ကိုဖယ်လိုက်ပြီးတစ်ချက်ကြည့်လိုက်ကာထွက်သွားနိုင်ပါတယ်။

ကိုယ်ဝန်ဆောင်ကာလကိုနှစ်ခြိုက်ခံစားပါ

ကိုယ်ဝန်ဆောင်ရခြင်းဟာသင့်ဘဝရဲ့ အံ့အားသင့် နှစ်လိုဖွယ်ကောင်းတဲ့ စိတ်လှုပ်ရှားစရာအချိန်လေးတွေပါ။ ဟုတ်ပါတယ် ပျို့အန်ခြင်းတွေနဲ့ တခြားကိစ္စတွေဖြစ်လာနိုင်တယ်ဆိုပေမယ့် နောက်ဆုံးရလဒ်ကတော့ တသက်တာချစ်သွားရမယ့် ကျန်းမာသန်စွမ်းတဲ့ ကလေးလေးတစ်ယောက်ပဲမဟုတ်ပေဘူးလား..။