နှလုံးစွမ်းဆောင်ရည်ကျဆင်းခြင်းအကြောင်း

နှလုံးစွမ်းဆောင်ရည်ကျဆင်းခြင်းသည် နှလုံးကသွေးကောင်းစွာမညှစ်နိုင်ခြင်း သို့မဟုတ် သွေးလုံလောက်စွာမရခြင်း ဖြစ်သည့်အခါ ခန္ဓါကိုယ်အနှံ့ကိုသွေးလုံလောက်စွာပို့ရန် နှလုံးမှအလုပ်ပိုလုပ်ရသောကြောင့် ဖြစ်လာသောအခြေအနေရောဂါ တစ်ရပ်ဖြစ်သည်။

ထိုနေရာတွင် နှလုံးသည် လုံးဝအလုပ်မလုပ်နိုင်တော့ဘဲရပ်သွားခြင်းမျိုးမဟုတ်ပါ။ နှလုံး၏လုပ်ဆောင်ရည်ကျဆင်းခြင်းကို အပျော့ဆုံးအဆင့်မှ အသက်အန္တရာယ်ရှိနိုင်သည့် အဆိုးရွားဆိုးအဆင့်အထိပုံစံအမျိုးမျိုးခွဲခြားထားသည်။ ထိုရောဂါသည် ပြင်းထန်သော်လည်းထိရောက်သောကုသမှုမျိုးအမြဲမပြတ်ခံယူလျှင် သင်သည် ကောင်းမွန်စွာနေထိုင်သွားနိုင်လိမ့်မည်။

နှလုံးစွမ်းဆောင်ရည်ကျဆင်းခြင်းရဲ့ လက္ခဏာတွေကဘာလဲ။

ပထမတွင် မသိသာသော်လည်း ကြာလာသည်နှင့်အမျှ နှလုံးကညှစ်အားကျလာကာသင်ပိုခံစားရပေလိမ့်မည်။

• နားနေစဉ်တွင်ပင် နှလုံးခုန်မြန်နေခြင်း

• မောပန်းခြင်း၊ အားအင်ချိနဲ့ခြင်း၊ ခေါင်းမူးခြင်း

• အသက်ရှုရခက်ခဲခြင်းနှင့် အရင်လိုမလှုပ်ရှားနိုင်တော့ခြင်း၊ ခေါင်းအုံးများဆင့်အိပ်မှသက်တောင့်သက်သာရှိခြင်း

• ခြေထောက်၊ခြေချင်းဝတ်နှင့် ခြေဖဝါးများ၊ ဝမ်းဗိုက်ပိုင်းတို့တွင် ဖောရောင်လာခြင်းစသည့်လက္ခဏာများခံစားရပါသည်။

နှလုံးစွမ်းဆောင်ရည် ကျဆင်းခြင်းကိုစစ်ဆေးနိုင်ပါသလား။

သင့်တွင် နှလုံးစွမ်းဆောင်ရည် ကျဆင်းခြင်း၏လက္ခဏာများရှိပါကသင့်ဆရာဝန်က အောက်ပါစစ်ဆေးမှုများထဲမှလိုအပ်သည်တို့ကိုပြုလုပ်ပေးလိမ့်မည်။

• အီးစီဂျီ (ECG)

• အသံလှိုင်းဖြင့်ရိုက်သောနှလုံးအက်ကိုးဓါတ်မှန် (Echo)

• နှလုံးအမောခံနိုင်အားကိုလေ့ကျင့်ခန်းလုပ်ပြီးစစ်ဆေးခြင်း (Stress test)

• ရင်ဘတ်ဓါတ်မှန်ရိုက်ခြင်း

• သွေးစစ်ခြင်း

• နှလုံးသွေးကြောဓါတ်မှန်ရိုက်ခြင်းနှင့် နှလုံးသွေးကြောထဲသို့ပြွန်ချောင်းထည့်ခြင်း

နှလုံးစွမ်းဆောင်ရည်ကျဆင်းခြင်း၏နောက်ဆက်တွဲဆိုးကျိုးတွေကဘာလဲ။

နှလုံးစွမ်းဆောင်ရည်ကျဆင်းခြင်းကိုမကုသဘဲထားလျှင် ပိုဆိုးလာပြီးအသက်အန္တရာယ်ရှိပါသည်။ ထိုသို့ကုသရခြင်း၏ရည်ရွယ်ချက်မှာရောဂါကြောင့်ခံစားရသော ဝေဒနာများ သက်သာလာစေရန်နှင့် ပိုမဆိုးစေရန်ဖြစ်သည်။

ဖြစ်လေ့ရှိသောနောက်ဆက်တွဲဆိုးကျိုးများမှာ

• နှလုံးခုန်မမှန်ခြင်း

• ကျောက်ကပ်ရောဂါဖြစ်ခြင်း

• အသည်းရောဂါဖြစ်ခြင်းတို့ဖြစ်သည်။

သင်ကိုယ်တိုင်အားဖြင့် ဘယ်လိုနည်းတွေနဲ့ကာကွယ်နိုင်သလဲ။

အောက်ပါအချက်များသည် သင့်အတွက်ရောဂါသက်သာစေနိုင်ရန် အသုံးဝင်သောနည်းလမ်းများဖြစ်သည်။

• သင် နေကောင်းသွားသည့်တိုင် ဆေးပတ်ပြည့်အောင် မှန်မှန်ကန်ကန် သောက်ဖို့လိုသည်။

• သင့်ရောဂါလက္ခဏာများကိုဂရုထားစောင့်ကြည့်ပါ။

• ရုတ်တရက် ကိုယ်အလေးချိန်တက်လာပါက ဆရာဝန်၊ သူနာပြုနှင့်ပြပါ။

• ဆားကိုလုံးဝမစားပါနှင့်။

• အဝလွန်နေလျှင် ကိုယ်အလေးချိန်လျှော့ပါ။

• ဆေးလိပ်ဖြတ်ပါ။

• အရက်ကိုအတိုင်းအတာတခုထက်ပို၍မသောက်ရ။

• တက်ကြွစွာနေထိုင်ပါ။

• မည်သည့်ဆေး၊ ဖြည့်စွက်စာကိုမဆို ဆရာဝန်နှင့်တိုင်ပင်ပြီးမှစားပါ။

အချုပ်ဆိုရသော် နှလုံးစွမ်းဆောင်ရည် ကျဆင်းခြင်းသည် တွေ့ရများသောရောဂါဖြစ်ပြီးအမြစ်မပြတ်သော်လည်းထိရောက်သောကုသမှုမျိုးခံယူလျှင် ရောဂါကိုမဆိုးလာစေသောကြောင့် တသက်လုံးပျော်ရွှင်စွာနေထိုင်သွားနိုင်ပါသည်။

Hello Health Group သည် ဆေးပညာအကြံပြုချက်များ၊ ရောဂါရှာဖွေမှုများနှင့် ကုသမှုများကို မပြုလုပ်ပေးပါ