အအိပ်မမှန်တာ ဒါတွေနဲ့ဆိုင်တယ်နော်

လူက ညဘက်အိပ်မပျော်တာလားဆိုတော့လည်းမဟုတ်ဘူး။ အိပ်ရေးဝတဲ့အခါ ဝတယ်၊ အိပ်မပျော်တဲ့အခါမပျော်ဘူး။ တစ်ညနဲ့တစ်ည အိပ်ပျော်လိုက်၊ မပျော်လိုက် အအိပ်မမှန်ဖြစ်နေတာ ကိုယ်တစ်ယောက်တည်းတော့မဟုတ်လောက်ပါဘူး။ ဒီလိုဖြစ်လေ့ဖြစ်ထရှိကြတာ ဘာတွေကြောင့်လဲဆိုတာ နည်းနည်းစပ်စုကြည့်ရအောင်။

ကိုယ်စားထားတဲ့အစားအသောက်တွေနဲ့သက်ဆိုင်နေပါတယ်

အိပ်ချိန်မှန်ပြီး အိပ်ရေးဝဖို့က နာရီ alarmပေးထားပြီး အတင်းဝင်အိပ်ရုံနဲ့၊ အိပ်ရာထဲလှိမ့်နေရုံနဲ့မရပါဘူး။ နှစ်နှစ်ခြိုက်ခြိုက်အိပ်ပျော်အောင်လို့ အစားအသောက်က အရေးပါတယ်ဆိုတာ သိရင် ပိုအဆင်ပြေပါလိမ့်မယ်။ အိပ်ရေးဝဖို့ ဘာကိုဆောင်သင့်လဲ၊ ဘာကိုရှောင်သင့်လဲ ဆိုတာ သိရအောင် ဆက်ပြီးဖတ်ကြည့်ပါဦး။

Tryptophan ကြွယ်ဝတာတွေစားပါ

ညအိပ်ခါနီး နွားနို့ပူပူလေးသောက်ရင် ကောင်းကောင်း အိပ်ပျော်တယ်လို့ပြောလေ့ရှိကြတယ်။ ဘာလို့လဲသိလား။ နို့ထွက်ပစ္စည်းတွေမှာtryptophan ပါဝင်လို့ဖြစ်ပါတယ်။tryptophan ဆိုတာ အိပ်စက်ခြင်းကို အထောက်အကူပေးတဲ့ဓါတ်ပစ္စည်းဖြစ်ပြီး အစေ့အဆန်တွေ၊ ငှက်ပျောသီး၊ ပျားရည်နဲ့ ကြက်ဥတို့မှာလည်း ပါဝင်တတ်ပါတယ်။

ကာဗိုဟိုက်ဒရိတ်စားပါ (နည်းနည်းပေါ့)

ကာဗိုဟိုက်ဒရိတ်ကြွယ်ဝတဲ့အစားအစာတွေကသွေးထဲမှာtryptophan ကိုတိုးစေပါတယ်။ ဒါ့ကြောင့်ကွေကာနဲ့ နို့၊ အစေ့အဆန်နဲ့ခရက်ကာ၊ပေါင်မုန့်နဲ့ချိစ် အတွဲအစပ်တွေလိုမျိုးကို ညဘက်စားသုံးရင် ပိုအိပ်ပျော်စေပါတယ်။

အိပ်ခါနီး အဆာပြေစားပါ

အိပ်မပျော်တတ်ဘူးဆိုရင် အိပ်ရာဝင်ခါနီးမှာ အဆာပြေတစ်ခုခုစားခြင်းက အထောက်အကူဖြစ်စေနိုင်ပါတယ်။ ဒါပေမယ့် နည်းနည်းပဲစားသင့်ပါတယ်နော်။ များခဲ့ရင် အစာကြေဖို့မလွယ်သလို အဆီတက်တာလည်းများပါလိမ့်မယ်။ ဒါဆို အိပ်ပျော်ဖို့ ပိုတောင်ခက်စေနိုင်ပါတယ်။

အဆီများတာတွေ သိပ်မစားပါနဲ့

နေ့ဘက်မှာဖြစ်ဖြစ်၊ ညဘက်မှာဖြစ်ဖြစ် အဆီများတာတွေမကြာခဏစားတတ်သူတွေက ပိုဝလာမယ်၊ နှစ်နှစ်ခြိုက်ခြိုက်အိပ်ပျော်ဖို့ခက်တယ်လို့ သုတေသနတွေ့ရှိချက်တွေကဆိုပါတယ်။ အဆီများတော့ အစာမကြေ၊ အိပ်မပျော်၊ အစာခြေစနစ်ပြဿနာတွေရှိလာနိုင်တယ်။

ကဖင်းတွေကို သတိထားပါ

ညနေပိုင်းမှာကော်ဖီသောက်ရင် ညကျသိပ်အိပ်မပျော်တော့ဘူးမလား။ ကဖင်းဓါတ်ဟာတော်တန်ရုံပမာဏလောက်နဲ့တင် အိပ်စက်ခြင်းကို အနှောင့်အယှက်ပေးနိုင်ပါတယ်။ ဒါပေမယ့်ကော်ဖီနဲ့လက်ဖက်ရည်ကိုပဲသတိထားနေလို့မရပါဘူး။ချောကလက်၊ ကိုလာနဲ့ လက်ဖက်သုပ်တို့မှာ လည်း ကဖင်းပါဝင်ပါတယ်နော်။ကောင်းကောင်းအိပ်ပျော်ချင်တယ်ဆိုရင်တော့ မအိပ်ခင် ၄ နာရီကနေ ၆ နာရီအလိုတည်းက ကဖင်းကိုရှောင်သင့်ပါတယ်။

ဆေးဝါးကြောင့်လည်း မျက်စိကြောင်နိုင်တယ်

အကိုက်အခဲပျောက်ဆေး၊ အဆီကျဆေးတွေ၊ ဆီးဆေးတွေနဲ့ အအေးမိပျောက်ဆေးတွေမှာ ကဖင်းဓါတ်တွေပါဝင်တတ်ပါတယ်။ တချို့ဆိုကော်ဖီတစ်ခွက်ထက်တောင် ကဖင်းပိုများနေတတ်ပါတယ်။ ညညအိပ်မရဖြစ်နေတယ်ဆို ကိုယ်သောက်သုံးနေတဲ့ဆေးဝါးကြောင့်များလားဆိုတာ တစ်ချက်ထည့်စဉ်းစားပေးပါ။

အိပ်ခါနီးတစ်ခွက်သောက်တတ်လား

မူးရင် ဘာမှမသိတော့ဘဲ အိပ်ပျော်သွားရောလို့ ထင်ကြပေမယ့် တကယ်တမ်းကျ နှစ်နှစ်ခြိုက်ခြိုက်အိပ်ပျော်ဖို့က မဖြစ်နိုင်ပါဘူး။ ကိုယ်ကမသိပေမယ့် ဟိုလှိမ့်ဒီလှိမ့်၊အငြိမ်မနေဘဲ အိပ်တာမို့ အိပ်ရေးဝမှာမဟုတ်ပါဘူး။ ဒါ့ကြောင့် အိပ်ပျော်ချင်တယ်ဆို သောက်မယ့်အချိန်ကို အိပ်ရာမဝင်ခင် ၄ နာရီ သို့မဟုတ် ၆ နာရီလောက်တော့ခြားပါ။

အိပ်ရာဝင်ချိန်မှာ ပရိုတင်းလျှော့စားပါ

ပရိုတင်းဓါတ်ကို တစ်နေ့တာမှာလိုအပ်တာမှန်ပေမယ့် အိပ်ရာဝင်ခါနီးမှာတော့ များများမစားသင့်ပါဘူး။ ပရိုတင်းကိုချေဖျက်ဖို့ခက်ခဲပြီး အမိုင်နိုအက်စစ်tyrosine ပါဝင်လို့ ဦးနှောက်ကိုလှုပ်ရှားမှုပိုများစေနိုင်ပါတယ်။ ဒါကြောင့် အိပ်ရာမဝင်ခင်မှာ ပရိုတင်းများတာတွေသိပ်မစားပါနဲ့။

အနားယူချိန်ဆိုပြီး ဆေးလိပ်တွေလှိမ့်မသောက်ပါနဲ့

ဆေးလိပ်သောက်သူတွေရဲ့အကျင့်ကဆေးလိပ်လေးဖွာရှိုက်ရင်း အတွေးနယ်ချဲ့တာပါပဲ။ အနားယူချိန်၊ စိတ်ကိုဖြေလျှော့ချိန်မှာဆေးလိပ်ကိုအားကိုးတတ်ကြပါတယ်။ ဆေးလိပ်ရဲ့ Nicotine ဆိုတာ ကဖင်းလိုပဲ နိုးကြားစေတဲ့အာနိသင်ရှိပါတယ်။ အိပ်ခါနီး ဆေးလိပ်လေးဖွာပြီး အတွေးများတာ၊ ညလယ် တရေးနိုးမှာဆေးလိပ်ထသောက်တာမျိုးရှောင်ပါ။

Hello ဆရာဝန်ရဲ့ စာဖတ်သူတို့ အိပ်ရေးဝဝနဲ့ အိပ်မက်လှလှမက်ပါစေနော်။

Hello Health Group သည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပါ။

မှ အချက်အလက် စစ်ဆေးထားပါသည်။

Hello Sayarwon Panel

Yun Sandi Nan Mon မှ ရေးသားသည်။ · 09/08/2022 တွင် အသစ်ဖြည့်စွက်ခဲ့သည်။