ဒဏ်ရာအနာတရကင်းဝေးသော လေ့ကျင့်ခန်းများအတွက် ဘေးကင်းစေမည့်အချက် ၁၁ ချက်

ဒဏ်ရာအနာတရကင်းသော လေ့ကျင့်ခန်းများ – ဘေးကင်းစေတဲ့အချက်၁၁ချက်

သင့်လှုပ်ရှားမှုကိုတိုးမြှင့်ခြင်းက ဆီးချိုအတွက်သာမက သင့်ကျန်းမာရေးတစ်ခုလုံးအတွက် ကောင်းပါတယ်။ ဒါပေမယ့် ပျော်စရာကောင်းဖို့နဲ့ ဘေးကင်းဖို့တော့ လိုတာပေါ့။ အခုပြောပြသွားမှာကလေ့ကျင့်ခန်းလုပ်ချိန်မှာအနာတရတွေ ရေဓါတ်ခမ်းခြင်းတွေသွေးပေါင်ကျခြင်းတွေမဖြစ်စေဖို့လုပ်ရမယ့်အရာတွေပါ။

• သင်အရင်က လှုပ်လှုပ်ရှားရှား လုံးဝမနေဖူးရင် ဒါမှမဟုတ်လှုပ်လှုပ်ရှားရှားမနေတာကြာပြီဆိုရင် ဖြည်းဖြည်းချင်းစလုပ်ပါ။ သင့်ကျန်းမာရေးကို သင်စိတ်မချရင် သင့်ဆရာဝန်ကိုဘယ်လေ့ကျင့်ခန်းက သင့်အတွက် သင့်တော်လဲ အကြံတောင်းပါ။ သင့်ဆရာဝန်ရဲ့အကြံဉာဏ်ကသင့်ရဲ့နှလုံး၊သွေးကြော၊မျက်စိ၊ ကျောက်ကပ်၊ ခြေထောက်နဲ့အာရုံကြောအခြေအနေတွေအပေါ်မူတည်ပြီးဆုံးဖြတ်သွားမှာပါ။ ဒါပေမယ့်ဆီးချိုရှိသူတွေကလည်းသာမန်လူတွေလုပ်တဲ့ လေ့ကျင့်ခန်းတွေလုပ်နိုင်ပါတယ်။
• လေ့ကျင့်ခန်းမစခင် ၅မိနစ်သွေးပူအောင်လုပ်ပြီး လေ့ကျင့်ခန်းပြီးသွားရင်လည်း၅မိနစ်အကြောဖြေပါ။ သွေးပူခြင်းနဲ့အကြောဖြေခြင်းက လေ့ကျင့်ခန်းလုပ်တာလောက် မပြင်းထန်ရပါဘူး။ ဒါကသင့်သွေးလည်ပတ်မှုကိုကောင်းစေသလိုအဆစ်တွေကိုလည်းလိုက်လျောညီထွေဖြစ်စေပါတယ်။
• ပူလွန်း၊အေးလွန်းတဲ့အခြေအနေတွေမှာ လေ့ကျင့်ခန်းမလုပ်ပါနဲ့။ ရာသီဥတုကပြင်းထန်နေရင်အိမ်ထဲမှာပဲလုပ်ပါ။
• လေ့ကျင့်ခန်းလုပ်ခင်၊လုပ်နေစဉ်နဲ့လုပ်ပြီး မှာရေဓါတ်မခမ်းအောင် ရေများများသောက်ပါ။
• သွေးတွင်းသကြားဓါတ် ကျနေတယ်လို့ ခံစားရရင်သွားစစ်ဆေးပြီးကုသပါ။ သင်နဲ့အတူကာဗိုဟိုက်ဒရိတ်ကြွယ်ဝတဲ့စားစရာတစ်ခုခုကိုအမြဲဆောင်ထားပါ။ ဒါမှသာသွေးတွင်းသကြားဓါတ် ရုတ်တရက် ထိုးကျသွားရင်အဆင်သင့်ဖြစ်နေမှာပါ။ တကယ်လို့သင့်မှာဆီးချိုသွေးချို အမျိုးအစား (၂)ရှိနေရင်ဒါမှမဟုတ် အင်ဆူလင်သုံးနေရရင် ဒါကပိုအရေးကြီးပါတယ်။
• တကယ်လို့သင်ကတစ်နာရီနှစ်နာရီလောက် အချိန်ကြာတဲ့ လေ့ကျင့်ခန်းလုပ်မယ်ဆိုရင်ကာဗိုဟိုက်ဒရိတ်တွေဖြည့်ပေးတဲ့အားဖြည့်အချိုရည်တွေလိုလာပါလိမ့်မယ်။ ဒါပေမယ့်အာဟာရ အညွှန်းအချက်အလက်တွေကိုဖတ်ပါ။ ဒါမှသာ အလွံအကျွံမဖြစ်အောင ်မသောက်သုံးမိမှာပါ။ မဟုတ်ရင် သွေးတွင်း သကြားဓါတ်ထိုးတက်တာမျိုးဖြစ်နိုင်ပါတယ်။
• သင်ဟာ ဆီးချိုဝေဒနာရှင်ဖြစ်ကြောင်းပြတဲ့ ဆေးမှတ်တမ်း လက်ပတ်၊လည်ပတ်၊ကဒ်ပြားစတာတွေကို ဝတ်ထားချိတ်ထားပါ။ ဒါမှသာ အရေးပေါ်အခြေအနေတွေမှာ စိတ်ချရမှာပါ။ သင့်ဖုန်းကိုလည်း လိုအပ်လာရင် တစ်ယောက်ယောက်ကိုခေါ်ဖို့ဆောင်ထားပါ။
• လေ့ကျင့်ခန်းတွေက သွက်သွက်လက်လက် ဖြစ်စေတာမျိုးဆိုပေမယ့်အရမ်းခက်တာတွေတော့မလုပ်သင့်ပါဘူး။
• သင် လေ့ကျင့်ခန်း အလွံအကျွံလုပ်နေလားသိအောင်စမ်းသပ်နည်းတစ်ခုရှိပါတယ်။ ဒါဟာ စကားပြောကြည့်တာပဲဖြစ်ပါတယ်။ တကယ်လို့သင်ကအရမ်းမောပြီး အသက်ရှူမဝဖြစ်နေရင် သင်စကားပြောနိုင်မှာ မဟုတ်ပါဘူး။ ဒီလိုဖြစ်လာရင် လေ့ကျင့်ခန်းကိုအရှိန်လျှော့ပြီးနားလိုက်ပါ။ ဒါကသင့်လေ့ကျင့်ခန်း ကို အရှိန်တိုးပြီးလုပ်စအချိန်မှာ ဖြစ်တတ်ပြီး အရေးကြီးပါတယ်။ သင်ကျန်းမာလာပြီးကျင့်သားရလာတဲ့အခါပိုပြင်းထန်တဲ့လေ့ကျင့်ခန်းတွေလုပ်လာနိုင်ရုံသာမကလုပ်နေစဉ်အခြားသူတွေနဲ့လည်းစကားပြောနိုင်မှာပါ။
• သင့်ခြေထောက်မှာ သင်နဲ့တော်တဲ့သန့်ရှင်းတဲ့ခြေအိတ်တွေရှူးတွေ ဝတ်ထားပါ။ မဝတ်ခင်မှာရှူးရဲ့အတွင်းပိုင်းကိုလည်းစစ်ဖို့လိုအပ်ပါတယ်။ စီလီကာဂျယ်လ်(silica gel) တွေပါတဲ့ရှူးဖိနပ်၊လေပေါက်တွေပါတဲ့ရှူးဖိနပ်တွေက ကိုယ်အလေးချိန်နဲ့ ဖိထားရတဲ့လမ်းလျှောက်ခြင်းလိုမျိုး လေ့ကျင့်ခန်းတွေလုပ်တဲ့အခါခြေထောက်နဲ့အဆစ်တွေကို အရမ်းဝန်မပိစေတဲ့အတွက် အကောင်းဆုံးပါ။ ပွန်းခြင်းနဲ့စိုစွတ်ခြင်းကိုသက်သာစေတဲ့ကုန်ကြမ်းတွေနဲ့လုပ်ထားတဲ့ ခြေအိတ်တွေကလည်းသင့်ခြေထောက်တွေကိုကာကွယ်ပေးပါတယ်။ တချို့ဥပမာတွေက – Coolmax, polypropylene, acrylic အသားတွေပဲဖြစ်ပါတယ်။ ချည်သားကိုတော့ဝေးဝေးရှောင်ပါ။
• သင့်ခြေထောက်ကို လေ့ကျင့်ခန်းမလုပ်မီနဲ့လုပ်ပြီး ရေကြည်ဖုတွေ၊ ရောင်ရမ်းတာတွေ၊တခြားကျိန်းစပ်တာတွေရှိမရှိစစ်ဆေးပါ။ တကယ်လို့သင့်ခြေထောက်မှာ အနာမကျက်တဲ့ ရေကြည်ဖုတွေ၊ပြတ်ရှရာတွေ၊အနာတွေရှိရင်ဆရာဝန်ကိုအသိပေးပါ။
• သင်နာကျင်လာရင် အသက်ရှူကျပ်လာရင် ခေါင်းမူးလာရင်လေ့ကျင့်ခန်းကိုရပ်လိုက်ပါ။ သင့်ဆရာဝန်ကို သင်ခံစားရတဲ့ မူမမှန်တာတွေကိုပြောပြပါ။