အရေပြားအတွက် သလဲသီးက ဘယ်လိုအထောက်အကူပြုတာလဲ

လူတစ်ယောက်ရဲ့ သွင်ပြင်ပေါ်မှာ အများကြီးသက်ရောက်နေတဲ့အရာတစ်ခုက အသားအရေကျန်းမာလှပမှုပါ။ အသားအရေကျန်းမာလှပမှုအပေါ်မှာ သက်ရောက်နေတဲ့အချက်က အသားအရေထိန်းသိမ်းမှုအပြင် အစားအသောက်ကလည်း တော်တော်လေးသက်ရောက်မှုအားကြီးပါတယ်။ ဒီတစ်ခေါက်တော့ အသားအရေ အပေါ်မှာ သက်ရောက်မှုအားကြီးတဲ့ အစားအစာတစ်ခုအကြောင်း ပြောပြပေးပါရစေ။

အသားအရေကျန်းမာခြင်းအတွက်ဓာတ်စာ သလဲသီး

သလဲသီးက နေရောင်ခြည်မှာပါတဲ့ ခရမ်းလွန်ရောင်ခြည်ကြောင့် အသားအရေထိခိုက်ပျက်စီးတာကို အထိရောက်ဆုံးကာကွယ်ပေးနိုင်ပြီး free radicals တွေကြောင့် အသားအရေထိခိုက်ပျက်စီးတာကို အထိရောက်ဆုံး ကာကွယ်ပေးနိုင်ပါတယ်။ အသားအရေနေလောင်ပျက်စီးမှုတွေကို အထိရောက်ဆုံးသက်သာစေနိုင်ပါတယ်။ အသားအရေကျန်းမာဖို့အတွက် တစ်နေ့ကို သလဲသီးဖျော်ရည် ၁ ခွက်သောက်ပေးရုံပါ။ ဒီလိုမှမဟုတ်လဲ အသားအရေနေလောင်ပျက်စီးသွားတဲ့အခါ သလဲသီးအခွံကို ကြိတ်ခြေပြီး အနှစ်လုပ်လို့ သံပရာရည် တစ်စက် နှစ်စက်လောက်နဲ့ရောမွှေပြီး နေလောင်သွားတဲ့နေရာမှာ လူးပေးပါ။ ခြောက်သွားရင် ရေနွေးနွေးလေးနဲ့ဆေးချလိုက်ပါ။

အသားအရေကို တင်းရင်းစေနိုင်တယ်

ဇရာက ရှောင်လွှဲလို့မရတာမှန်ပေမယ့် အရွယ်မတိုင်ခင်အိုမင်းမှုကိုတော့ မဖြစ်မနေကာကွယ်ပေးဖို့လိုပါမယ်။ နေရောင်ဒဏ် ပတ်ဝန်းကျင်က ညစ်ညမ်းတဲ့အရာတွေနဲ့ ထိတွေ့မိတာကြောင့် အသားအရေပျက်စီးတဲ့အခါ အရွယ်မတိုင်ခင်အိုမင်းတာကို ဖြစ်စေနိုင်ပါတယ်။ ဒီလိုအခါမျိုးတွေမှာ ဓာတ်တိုးဆန့်ကျင် အာနိသင်ပါဝင်နေတဲ့ သလဲသီးလေးရဲ့အကူအညီကို ရယူလိုက်ပါ။သလဲသီးက ကော်လာဂျင်ကိုထွက်စေပြီ အသားအရေကို တင်းရင်းကျန်းမာစေသလို အရွယ်မတိုင်ခင် အိုးမင်းတာမျိုးမဖြစ်အောင် အထိရောက်ဆုံး ကာကွယ်ပေးပါတယ်။

အရေးအကြောင်းတွေမဖြစ်အောင် ကာကွယ်ပေးနိုင်တယ်

သလဲသီးစေ့မှာ fatty acid တစ်မျိုးဖြစ်တဲ့ punicic acid ပါင်နေတာကြောင့် အသားအရေကို အစိုဓာတ်ထိန်းပေးပြီး အရေးအကြောင်းမဖြစ်အောင် ကာကွယ်ပေးပါတယ်။ သလဲသီးက နေရောင်ခြည်မှာပါတဲ့ UVB ကြောင့် အရေးအကြောင်း တွေမဖြစ်အောင် အထိရောက်ဆုံးကာကွယ်ပေးနိုင်တာကြောင့် အရေးအကြောင်းကင်းချင်ရင် သလဲသီးကို ပုံမှန်လေး စားပေးဖို့ ပြောပါရစေ။

အသားအရေကို ကြည်လင်ဝင်းပစေနိုင်တယ်

အသားအရေလေး Glow ချင်တယ်ဆိုရင်တော့ သလဲသီးကိုသာစားပေးပါ။ သလဲသီးက နေရောင်ကြောင့်ဖြစ်တဲ့ အစက်အပြောက်တွေကို သက်သာစေနိုင်သလို အရွယ်မတိုင်ခင် အိုမင်းတာမျိုးမဖြစ်အောင်လည်း ကာကွယ်ပေးနိုင် ပါတယ်။ သလဲသီးမှာပါတဲ့ ဗီတာမင် C ကလည်း အသားအရေကို ကြည်လင်စေဖို့ အကောင်းဆုံးအားဖြည့်ပေးနိုင်ပါတယ်။

အရေပြားပေါ်က ဆဲလ်သေတွေကို ဖယ်ရှားချင်တယ်ဆိုရင်တော့ သလဲသီးအခွံနဲ့အစေ့ကိုရောကြိတ်ပြီးရလာတဲ့အနှစ်ကို အရေပြားပေါ်မှာ ပွတ်လိမ်းပေးပါ။ ပြီးရင်ရေဆေးချလိုက်ပါ။

ဝက်ခြံသက်သာစေနိုင်တယ်

ဝက်ခြံသက်သာစေဖို့အတါက်လည်း သလဲသီးကို အားကိုးလို့ရပါတယ်။ မကြာခဏဝက်ခြံဖြစ်တတ်တဲ့သူတွေမှာ ဟော်မုန်းပြဿနာရှိတာနဲ့ အစားခြေစနစ်ပြဿနာရှိနေတာတွေကြောင့် အဆီပိုတွေအများကြီးထုတ်လုပ်မိနေတဲ့အတွက် ဝက်ခြံဖြစ်ရတာလို့ တွေ့ရှိရပါတယ်။ ဒီပြဿနာကိုအကောင်းဆုံးဖြေရှင်းဖို့ဆိုရင်တော့ အရေပြားကျန်းမာရေးအတွက် ဆရာဝန်တွေဖြစ်ကြတဲ့ ဗီတာမင် A၊ ဗီတာမင် E နဲ့ ဗီတာမင် C တို့ကြွယ်ဝစွာပါဝင်နေပြီး ဓာတ်တိုးဆန့်ကျင် အာနိသင်ရှိတဲ့ သလဲသီးက အကောင်းဆုံးအားဖြည့်ပေးနိုင်မှာပါ။ ဒါကြောင့် ဝက်ခြံကင်းစင်ပြီး ကြည်လင်တဲ့ အသားအရေကို ပိုင်ဆိုင်ချင်တယ်ဆိုရင် သလဲသီးစားပေးပါ။ သလဲသီးခွံကိုကြိတ်ပြီး မျက်နှာပေါင်းတင်ပေးလို့လည်းရပါတယ်။

ရေဓာတ်ဖြည့်ပေးနိုင်တယ်

ဝက်ခြံဖြစ်လွယ်ပြီး အဆီပြန်လွယ်တဲ့အသားအရေအတွက်ပဲ သလဲသီးကို သုံးလို့ရတာမဟုတ်ပါဘူး။ ခြောက်သွေ့တဲ့ အသားအရေကို ရေဓာတ်ဖြည့်တင်းစေဖို့အတွက် သလဲသီးကို အားကိုးလို့ရပါသေးတယ်။ သလဲသီးမှာပါတဲ့ punicic acid နဲ့ သလဲသီးစေ့မှာပါတဲ့ oleic acid တို့က အရေပြားကို အစိုဓာတ်ဖြည့်ပေးပြီး အသားအရေကို ကျန်းမာအောင် အားဖြည့်ပေးနိုင် ပါတယ်။ ဗီတာမင် C ကြွယ်ဝမှုကလည်း အသားအရေကြမ်းတမ်းမှုကို လျှော့ချပေးနိုင်ပါတယ်။

အနာကျက်စေနိုင်တယ်

အနာတွေဖြစ်တဲ့အခါ အမာရွတ်ကျန်မှာစိုးတယ်ဆိုရင်တော့ သလဲသီးဖျော်ရည်သာသောက်ပေးပါ။ အနာကို သလဲသီးခွံကြိတ်ခြေပြီး အုံပေးလို့လည်းရပါတယ်။ ဒီလိုလုပ်ဆောင်ပေးတာက အနာပိုးဝင်တာမျိုး မဖြစ်အောင် ကာကွယ် ပေးပြီး အနာကျက်မြန်စေနိုင်ပါတယ်။ ဆီးချိုရှိသူတွေအနေနဲ့လည်း အနာကျက်စေဖို့ သလဲသီးစားပေးလို့ရပါတယ်။

အရေပြားကင်ဆာကာကွယ်ပေးနိုင်ပါတယ်

အရေပြားရောဂါကင်းပြီး ကျန်းမာတဲ့ အသားအရေကို ပိုင်ဆိုင်ဖို့ နဲ့ အရေပြားကင်ဆာကို ကာကွယ်ချင်တယ်ဆိုရင်တော့ ဗီတာမင် C၊ ဗီတာမင် E နဲ့ ဓာတ်တိုးဆန့်ကျင် အာနိသင်တွေကြွယ်ဝစွာပါဝင်နေတဲ့ သလဲသီးကို ပုံမှန်စားသုံးပေးပါ။ အသားအရေကို အဆိပ်အတောက်တွေကြောင့် ထိခိုက်နိုင်ခြေကနေ အထိရောက်ဆုံးကကွယ်ပေးပါတယ်။ သလဲသီးစေ့ အဆီက အရေပြားကင်ဆာကို ကာကွယ်ပေးနိုင်တယ်၊ လို့ လေ့လာမှုတွေအရ သိရပါတယ်။

ဘယ်သူတွေမစားသင့်ဘူးလဲ…….

သလဲသီးက အရေပြားအတွက် ကောင်းကျိုးများတယ်ဆိုပေမယ့် ဒီလိုအခြေအနေမျိုးဆိုရင်တော့ မစားသင့်ပါဘူး။

• ဝမ်းပျက်ဝမ်းလျှောဖြစ်နေမယ်

• ကိုယ်ဝန်ဆောင် မိခင်ဖြစ်နေမယ်

• သွေးပေါင်ကျဆေးသောက်နေရမယ်

• သွေးတွင်းကိုလက်စထရောကျအောင် ဆေးသောက်နေရမယ်ဆိုရင်တော့ သလဲသီးကို မစားသင့်ပါဘူး။

Hello Health Groupသည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပါ။