ကိုယ်ဝန်ဆောင်လိုသည့် အမျိုးသမီးများအတွက် လိုအပ်သော အာဟာရဓာတ်များ

ကိုယ်ဝန်ဆောင်ခြင်းက အမျိုးသမီးတို့ရဲ့ဘဝမှာ အမှတ်တရကိစ္စတစ်ခု ဖြစ်ပါတယ်။ ကိုယ်ဝန်ဆောင်နိုင်ဖို့ဆိုရင် ကိုယ်ခန္ဓာကို အကောင်းဆုံး အာဟာရဓာတ်ရရှိအောင် စားသောက်ပေးဖို့လည်း လိုပါတယ်။ ပုံမှန်အားဖြင့် ဗီတာမင်၊ သတ္တုဓာတ်နဲ့ ကိုယ်ဝန်ဆောင်နိုင်စွမ်းကို မြင့်တက်စေတဲ့ အာဟာရဓာတ်တွေ မျှတအောင် စားသောက်ပေးဖို့ လိုပါတယ်။ ဒီတစ်ခေါက်တော့ ကိုယ်ဝန်ဆောင်လိုသည့် အမျိုးသမီးများအတွက် လိုအပ်သော အာဟာရဓာတ်များ အကြောင်း ပြောပြပေးချင်ပါတယ်။

ကိုယ်ဝန်ဆောင်လိုသည့် အမျိုးသမီးများအတွက် လိုအပ်သော အာဟာရဓာတ်များ

အောက်ပါ အာဟာရဓာတ်များကတော့ ကိုယ်ဝန်ဆောင်လိုသည့် အမျိုးသမီးများအတွက် လိုအပ်သော အာဟာရဓာတ်များပဲ ဖြစ်ပါတယ်။

• ဇင့်

အမေရိကန်နိုင်ငံ ပန်ဆယ်ဗေးနီးယားပြည်နယ်တက္ကသိုလ်ရဲ့ ထုတ်ပြန်ချက်တစ်ခုအရ ဇင့်ဓာတ်ချို့ယွင်းခြင်းဟာ မျိုးဥသန္ဓေအောင်နိုင်စွမ်းအပေါ် ထိခိုက်နိုင်ခြေရှိကြောင်း သိရပါတယ်။ မကြာသေးမီက တွေ့ရှိခဲ့တဲ့ သုတေသနတွေအရ ဇင့်ဓာတ်ဟာ သန္ဓေအောင်ဖို့ အရေးကြီးတဲ့ သတ္တုဓာတ်တစ်မျိုး ဖြစ်ပါတယ်။

မျိုးဥများ ဆဲလ်ကွဲပွားခြင်း၊ ဒီအန်အေဖွဲ့စည်းဖြစ်ပေါ်ခြင်း၊ သားလောင်းများ ဖွံ့ဖြိုးခြင်း စတာတွေအတွက် ဇင့်က အရေးပါပါတယ်။ အရွယ်ရောက်ပြီး အမျိုးသမီးတစ်ဦးအတွက် တစ်နေ့တာ ဇင့်ဓာတ်လိုအပ်ချက်ကတော့ ၈ မီလီဂရမ်ဖြစ်ပြီး ကိုယ်ဝန်ဆောင်ချိန်နဲ့ မိခင်နို့တိုက်ချိန်နေမှာတော့ ၁၂ မီလီဂရမ် ဖြစ်ပါတယ်။

ဒါပေမယ့် သတိပြုရမယ့်အချက်ကတော့ ဇင့်ဓာတ်ကို လွန်ကဲစွာစားသုံးမိရင်လည်း ကြေးနီဓာတ်စုပ်ယူခြင်းနဲ့ ဇီဝဖြစ်ပျက်မှုမှာ အနှောင့်အယှက်ဖြစ်စေပါတယ်။

• ကိုလင်း (Choline)

ကိုလင်းဟာ ဘယ်အသက်အရွယ်မှာမဆို လိုအပ်တဲ့ အာဟာရဓာတ် ဖြစ်ပါတယ်။ ဘဝရဲ့ အစောပိုင်းကာလတွေမှာ ဦးနှောက်ဖွံ့ဖြိုးမှုအတွက် မရှိမဖြစ် လိုအပ်ပါတယ်။ အသက်ကြီးပိုင်းကာလတွေမှာလည်း ဦးနှောက်နဲ့အာရုံကြောပိုင်းဆိုင်ရာများ ဆုတ်ယုတ်ကျဆင်းလာနိုင်ခြေကို တားဆီးပေးပါတယ်။

ကိုလင်းကြွယ်ဝတဲ့ အစားအစာတွေကတော့ ဆယ်လ်မွန်ငါး၊ ဥအမျိုးမျိုး၊ ပန်းပွင့်စိမ်း၊ ပဲထောပတ်၊ အမဲအသည်း၊ ကြက်အသည်း စတာတွေ ဖြစ်ပါတယ်။ ကိုလင်းဓာတ်အတွက် တနေ့တာလိုအပ်ချက်ကတော့ ၅၅၀ မီလီဂရမ် ဖြစ်ပါတယ်။ ကိုယ်ဝန်ဆောင်အားဆေးတိုင်းမှာ ကိုလင်းမပါဝင်တာမို့ အားဆေးများ၊ ဖြည့်စွက်စာများ ဝယ်ယူသုံးစွဲတဲ့အခါ အညွှန်းစာကို ဖတ်ရှုသင့်ပါတယ်။

• Omega-3

Omega-3 ကို Docosahexaenoic acid (အတိုကောက်အားဖြင့် DHA) လို့ခေါ်ပြီး ကလေးငယ်များ ဦးနှောက်နဲ့ မျက်စိပိုင်းဆိုင်ရာ ဖွံ့ဖြိုးရေးအတွက် မရှိမဖြစ် အရေးကြီးပါတယ်။ ၂၀၁၆ ခုနှစ်မှာ ပြုလုပ်ခဲ့တဲ့ သားဖွားမီးယပ်ဆိုင်ရာ သုတေသနအရ Omega-3 သုံးစွဲခြင်းကြောင့် လမစေ့ဘဲ မီးဖွားနိုင်ခြေကို လျော့နည်းစေတယ်လို့ သိရပါတယ်။

အခြားသုတေသနတစ်ခုမှာ ဖော်ပြထားတာကတော့ ကိုယ်ဝန်ဆောင် တတိယသုံးလပတ်မှာ Omega-3 သုံးစွဲခြင်းဟာ မွေးဖွားလာမယ့် ကလေးမှာ ပန်းနာရင်ကျပ်ရောဂါ၊ အဆုတ်ရောဂါ စတာတွေကို ဖြစ်နိုင်ခြေ လျော့နည်းစေတယ် ဆိုတာပါပဲ။ ကိုယ်ဝန်ဆောင်နဲ့ နို့တိုက်မိခင်တွေအတွက် တစ်နေ့တာ DHA လိုအပ်ချက်ကတော့ ၃၀၀ မီလီဂရမ် ဖြစ်ပါတယ်။

• Probiotics (အကျိုးပြုဘက်တီးရီးယားများ)

Probiotics (အကျိုးပြုဘက်တီးရီးယားများ)ဟာ အစာအိမ်အူလမ်းကြောင်းပိုင်းသာ အကျိုးပြုရုံမကဘဲ ကိုယ်ဝန်ရနိုင်ခြေကိုလည်း မြင့်တက်စေပါတယ်။ Probiotics များဟာ ကိုယ်ခန္ဓာရဲ့ ရောင်ရမ်းမှု များကို လျော့ကျသက်သာစေပါတယ်။ ကိုယ်ခန္ဓာရောင်ရမ်းမှုများကြောင့် ကိုယ်ဝန်ရနိုင်ခြေနည်းပါးခြင်းပြဿနာကို လျော့နည်းစေပါတယ်။

• သံဓာတ်

သံဓာတ်ဟာ အောက်ဆီဂျင်သယ်ယူပို့ဆောင်ပေးတဲ့ သွေးနီဥတွေဖြစ်ပေါ်ဖို့ အရေးကြီးပါတယ်။ ကိုယ်ဝန်ဆောင်လိုတယ်ဆိုရင် သံဓာတ်ချို့တဲ့ခြင်းလည်း မဖြစ်ဖို့ လိုပါတယ်။ သံဓာတ်နည်းခြင်းဟာ မျိုးဥကြွေခြင်းအပေါ် ထိခိုက်နိုင်ပြီး ကိုယ်ဝန်ဆောင်နိုင်ဖို့ အဟန့်အတား ဖြစ်စေပါတယ်။ အရွယ်ရောက်ပြီး အမျိုးသမီးတစ်ဦးအနေနဲ့ တစ်ရက်တာမှာ သံဓာတ် ၁၈ မီလီဂရမ် လိုအပ်ပါတယ်။ ကိုယ်ဝန်ဆောင်ချိန်မှာ ၂၇ မီလီဂရမ် လိုအပ်ပါတယ်။

• ဖောလစ်အက်ဆစ်

ကိုယ်ဝန်ဆောင်လိုသူများအနေနဲ့ ဖောလစ်အက်ဆစ်ကို ကြိုတင်သောက်သုံးပေးသင့်ပါတယ်။ တစ်နေ့တာ လိုအပ်ချက်ကတော့ ၄၀၀ မိုက်ခရိုဂရမ် ဖြစ်ပါတယ်။ ဖောလစ်အက်ဆစ်ဟာ ကိုယ်ဝန်ရနိုင်ခြေကို မြင့်မားစေတဲ့အပြင် ရလာပြီးတဲ့ ကိုယ်ဝန်ကိုလည်း ကျန်းမာသန်စွမ်းအောင် ထိန်းသိမ်းပေးနိုင်ပါတယ်။

ကိုယ်ဝန်ဆောင်လိုသည့် အမျိုးသမီးများအတွက် လိုအပ်သော အာဟာရဓာတ်များ ပြည့်ဝမှ မေမေရော ဘေဘီလေးပါ ကျန်းမာမှာပါ။