ဘေဘီလေးတွေမှာဖြစ်တတ်တဲ့ အစာခြေစနစ်ပြဿနာတွေ

ဘေဘီလေးတွေမွေးဖွားပြီးတဲ့အခါ အချိန်တိုင်းကသူတို့အတွက်ဖြစ်သွားပါပြီ။ သူတို့လေးတွေရဲ့ လှုပ်ရှားမှုအပြုအမူတိုင်းကို မျက်ခြေမပြတ်စောင့်ကြည့်နေမိပါတယ်။ အပြုအမူကိုကြည့်ပြီး သူတို့လေးတွေ ဘာဖြစ်နေလဲဆိုတာကို ဆုံးဖြတ်ရတာကိုး။ သူတို့လေးတွေငိုနေတဲ့ အခါ၊ မအီမသာနဲ့ဂျီကျနေတဲ့အခါတော်တော်လေးစိတ်ညစ်ရပါတယ်။ သားဦးမိဘတွေမှာဆိုပိုဆိုးမှာပါ။ ဒီလိုစိတ်ညစ်ရတာက တစ်ယောက်တည်းမဟုတ်ပါဘူး ကလေးလေးတွေမွေးဖွားထားတဲ့ မိဘတိုင်း မဖြစ်မနေကြုံရမယ့်ပြဿနာပါ။

ကိုယ်ပေါ်မှာဖြစ်တဲ့အနာလိုမျိုး၊ ဖျားတာလိုမျိုးကပြင်ပမှာလက္ခဏာတွေကိုမြင်တွေ့နိုင်တာမို့ဖြစ်နေတဲ့အနေအထားကိုသိရှိနိုင်တယ်ဆိုပေမယ့် ကလေးရဲ့ ဝမ်းဗိုက်( အစာခြေစနစ်) မှာဖြစ်နေတဲ့ပြဿနာမျိုးကတော့ ဆုံးဖြတ်နားလည်ဖို့ခက်မှာပါ။ ကလေးကလည်း မပြောနိုင်သေးတဲ့အရွယ် ကိုယ်ကလည်း တစ်ခုခုကို ဆုံးဖြတ်သိမြင်နိုင်သူမဟုတ်တော့ ဒီလိုအနေအထားကတော်တော်လေး အခက်တွေ့စေမှာ အသေအချာပါ။

ဘေဘီလေးတွေမှာ ခံစားရနိုင်တဲ့ အစာခြေစနစ်ပြဿနာတွေက

စားချဉ့်ရည်ပြန်တက်ခြင်း

အသက် ၄ လသားကနေ ၁၂ လသားအရွယ်ကလေးငယ်တွေမှာ စားချဉ့်ရည်ပြန်တက်တဲ့ပြဿနာအဖြစ်များပါတယ်။သောက်လိုက်တဲ့ မိခင်နို့ရည်က ကလေးရဲ့အစာအိမ်ထဲမှာ အချိန်ကြာမြင့်စွာရှိနေပြီး အစာမကြေဖြစ်တာကြောင့် အစာရေမြိုတစ်လျှောက်ပြန်ဆန်တက်လာတဲ့အခြေအနေပါ။

အော့အန်ခြင်း

ကလေးငယ်လေးတွေမှာအော့အန်တာက အဖြစ်များတဲ့ အစာခြေစနစ်ပြဿနာတစ်ခုပါ။ ကလေးတွေမှာအော့အန်မှုကိုဖြစ်စေတဲ့ အဓိကအကြောင်းအရင်းက အစာအိမ်အူလမ်းကြောင်းတစ်လျှောက်မှာ ဗိုင်းရပ်စ်ကူးစက်တာကြောင့်ပါ။ ကလေးငယ်လေးတွေဖျားနာတဲ့အခါမျိုးမှာလည်းအော့အန်နိုင်ပါတယ်။ ဝမ်းလျှောတာကလည်း ကလေးတွေကိုအော့အန်စေရတဲ့ အကြောင်းအရင်းတစ်ခုပါ။

ဝမ်းချုပ်ခြင်း

ကလေးကနို့သောက်နေရာကနေ အစားစစားတဲ့အခါမျိုး ဝမ်းချုပ်နိုင်ပါတယ်။ ကလေးလေးတွေက များသောအားဖြင့် ၁ နှစ်သားအရွယ်လောက်မှာ ဝမ်းချုပ်တာဖြစ်နိုင်ပါတယ်။ နို့တွေအများကြီးသောက်တတ်တဲ့ကလေးငယ်တွေမျာလည်း ဝမ်းခပ်မာမာသွားတာမျိုးဖြစ်နိုင်ပါတယ်။ ကလေးကို ဝမ်းချုပ်တာကင်းဝေးစေချင်တယ်ဆိုရင်တော့ ကလေးငယ်ကို တစ်နေ့ကိုရေ ၁၆အောင်စတိုက်ပေးပါ။

လေနာခြင်း

ကလေးငယ်ငယ်လေးတွေမှာလေနာဖြစ်လေ့ဖြစ်ထရှိပါတယ်။လေနာဖြစ်တဲ့အခါ ကလေးက တစ်ချိန်လုံးငိုနေတာ၊အော်နေတာမျိုးတွေဖြစ်နိုင်ပါတယ်။ ကလေးက အကြောင်းအရင်းမရှိဘဲ တစ်ချိန်လုံးငိုနေမယ်ဆိုရင်တော့လေနာဝေဒနာခံစားနေရတာဖြစ်နိုင်ပါတယ်။ဘေဘီလေးတေါကမွေးစကတည်းကလေနာဝေဒနာကို ခံစားလာရတာမဟုတ်ပါဘူး။ အသက် ၃ လလောက်မှစပြီးလေနာဝေဒနာကိုခံစားရတာပါ။

ဝမ်းလျှောခြင်း

ကလေးငယ်အများစုမှာ ဝမ်းလျှောတာက Rotavirusကြောင့်ဖြစ်တာများပါတယ်။ဆောင်းရာသီ၊ မိုးရာသီတို့လိုမျိုးအေးတဲ့ရာသီတွေမှာ အဖြစ်များပါတယ်။ ကလေးဝမ်းသွားတဲ့အခါ ငိုတာမျိုး၊ ဝမ်းသွားတာက ၂ ပတ် ၃ ပတ်လောက်အထိမသက်သာဘဲဖြစ်နေတာမျိုး၊ ဝမ်းထဲမှာသွေးတွေ၊ချွဲတွေပါလာတာမျိုးဖြစ်မယ်ဆိုရင်တော့ နီးစပ်ရာဆေးခန်းမှာ အမြန်ဆုံးသွားရောက်ပြသပေးသင့်ပါတယ်။ ကလေးက ဝမ်းသွားနေတဲ့အခါရေနဲ့စွပ်ပြုတ်ပူပူလေးတိုက်ပေးပါ။

ကလေးတွေကငယ်သေးတဲ့အခါ သူတို့ခံစားရတဲ့ဝေဒနာကိုဖော်ပြပေးနိုင်တဲ့ အမူအရာက ငိုတာတစ်ခုတည်းဖြစ်တာမို့ ကလေးငယ်လေလေသူတို့ကိုသေချာဂရုစိုက်စောင့်ကြည့်ပေးဖို့ လိုလေလေပါ။ အစာခြေစနစ်မှာပြဿနာတစ်စုံတရာရှိတဲ့အခါလူကြီးတွေတောင် ခံစားရခက်တာမို့ ကလေးငယ်လေးတွေကိုသေချာဂရုစိုက်ပေးဖို့ လိုမယ်ဆိုတာပြောစရာတောင်လိုမယ်မထင်ပါဘူး။ ဒါပေမယ့် သတင်းကောင်းတစ်ခုကတော့ အချို့သောအစာခြေစနစ်ပြဿနာတွေကိ ကလေးအရွယ်ရောက်လာတဲ့အခါ အလိုလိုသက်သာသွားနိုင်တာပါ။ ဘေဘီလေးတွေရဲ့ မေမေဖေဖေတွေအနေနဲ့ ကလေးကို အစာခြေစနစ်ပြဿနာကင်းအောင်စောင့်ရှောက်ပေးနိုင်ကြပါစေနော်။

Hello Health Group သည် ဆေးပညာအကြံပေးချက်များ၊ ရောဂါစစ်ဆေးအတည်ပြုချက်များနှင့် ကုသမှုများမပြုလုပ်ပေးပါ။