ခြေထောက်ကျိုးတဲ့အခါ ဂရုစိုက်သင့်တဲ့အချက်များ

ချော်လဲလို့၊ အရိုက်နှက်ခံရလို့၊ ယာဉ်မတော်တဆမှုဖြစ်လို့ စသည်ဖြင့် ခြေထောက်ကျိုးရတဲ့ အကြောင်းရင်းတွေက အများကြီးရှိနိုင်ပါတယ်။ ဘာကြောင့်ပဲဖြစ်ဖြစ် အရိုးကျိုးအက်တဲ့အခါ ဆေးရုံကားက ချက်ချင်းမလာနိုင်သလို ဆေးရုံဆေးခန်းကို ချက်ချင်းရောက်နိုင်ဦးမှာမဟုတ်ပါဘူး။ ဖြစ်ဖြစ်ချင်းမှာ ဘေးကလူက စနစ်တကျကူညီစောင့်ရှောက်ပေးမှ ဆရာဝန်ဆီမရောက်ခင် ဝေဒနာလျော့ပါးရမှာပါ။ ကိုယ့်ရင်းနှီးချစ်ခင်ရသူ သို့မဟုတ် တခြားတစ်ယောက်ယောက်မှာ ခြေထောက်ကျိုးတဲ့အခါ အရေးပေါ်ပြုစုနိုင်အောင် ဒါလေးတွေသိထားသင့်ပါတယ်။

ခြေထောက်ကျိုးတဲ့အခါ အရေးပေါ်ပြုစုနည်း

ထပ်ပြီးထိခိုက်နိုင်ခြေရှိတဲ့ အခြေအနေမျိုးကနေ ရှောင်လွှဲဖို့က လွဲရင် လူနာကိုနေရာမရွှေ့ပါနဲ့။ ဆေးရုံမရောက်ခင်မှာ လုပ်ပေးထားသင့်တာက –

• သွေးထွက်နေရင် တိတ်အောင်လုပ်ပေးပါ။ ပိုးသတ်ထားတဲ့ ပတ်တီး၊ အဝတ်သန့်သန့်တစ်ခုနဲ့ ဒဏ်ရာကို ဖိထားပါ။
• ထိခိုက်တဲ့နေရာကို မလှုပ်ရှားမိပါစေနဲ့။ ပုံစံပျက်ယွင်းသွားတဲ့အရိုးကို ပြန်ညှိတာ၊ တွန်းထည့်တာတွေ မလုပ်ပါနဲ့။
• ရေခဲကပ်ပေးပါ။ ရောင်ရမ်းမှုကို ထိန်းဖို့နဲ့ နာကျင်မှုကို သက်သာစေဖို့ ရေခဲဝတ်နဲ့ ကပ်ပေးပါ။
• လူနာကို ဂရုစိုက်ပါ။ လူနာက သတိလစ်တော့မတတ် နာကျင်နေမယ်။ အသက်ရှူမြန်နေတယ်ဆိုရင် လူနာကို လှဲလျောင်းစေပြီး ခြေထောက်ကို မြှင့်ထားပေးပါ။

ခြေထောက်ကျိုးတာ၊ အက်တာ သက်သာဖို့က သိပ်မပြင်းထန်ရင် ၆ ပတ်ကနေ ၈ ပတ်အထိ ကြာနိုင်ပါတယ်။ ဒီကြားထဲမှာ ခြေပြန်မထောက်နိုင်သေးတဲ့အချိန်အထိ ချိုင်းထောက် သို့မဟုတ် ဘီးတပ်ကုလားထိုင်သုံးဖို့ လိုနိုင်ပါတယ်။ ပိုပြင်းထန်တဲ့ အရိုးကျိုးအက်မှုတွေကတော့ အပြည့်အဝပြန်ကောင်းဖို့ ၃ လကနေ ၆ လကြာနိုင်ပါတယ်။

ကုသတဲ့အခါမှာလည်း ကျောက်ပတ်တီး စည်းသင့်ရင်စည်း၊ ခွဲစိတ်သင့် ခွဲစိတ်ရတာမျိုး ခြေထောက်ကျိုးတဲ့ အခြေအနေကို မူတည်ပြီး ဆုံးဖြတ်ကြပါတယ်။ မြန်မြန်ပြန်ကောင်းဖို့ကတော့ ကိုယ်ဘယ်လောက် ဂရုတစိုက်နေထိုင်သလဲဆိုတာနဲ့ သက်ဆိုင်ပါတယ်။ နောက်ဆက်တွဲ ဂရုစိုက်စောင့်ရှောက်မှုက ကုသမှုနဲ့ဘေးအန္တရာယ်ကင်းမှုမှာ အရေးပါတဲ့အပိုင်းဖြစ်လို့ ဆရာဝန်နဲ့ ရက်ချိန်းမှန်အောင်ပြပါ။ ဆရာဝန်ညွှန်ကြားတဲ့ဆေးကို ဂရုစိုက်သောက်သုံးပါ။

အိမ်မှာ ဘယ်လိုဂရုစိုက်ရမလဲ

• နောက်သုံးရက်လောက်အတွင်းတော့ ခြေထောက်ကို အနည်းဆုံး ၁၀ မိနစ်လောက်ရေခဲကပ်ပေးပါ။ ဒါပေမယ့် ကျောက်ပတ်တီး သို့မဟုတ် ကျပ်စည်းပတ်တီးကိုတော့ မစိုအောင် ဂရုစိုက်ပါ။
• ဒဏ်ရာကို ဆရာဝန်ညွှန်ကြားလိုက်တဲ့အတိုင်း ဂရုစိုက်စောင့်ရှောက်ပါ။ ကျောက်ပတ်တီး စည်းလာတယ်ဆိုရင် ဒါမှမဟုတ် ခွဲစိတ်ထားတယ်ဆိုရင် ညွှန်ကြားချက်ကလွဲပြီး ကိုယ့်သဘောနဲ့ကိုယ် ပြုမူနေထိုင်တာတွေ ရှောင်ပါ။
• စိတ်ချရတဲ့အဆင့်ထိ ကောင်းမွန်မလာသေးခင်မှာ ခြေထောက်ကို ဝန်မပိအောင် ဂရုစိုက်ပါ။ ချိုင်းထောက် သုံးသင့်သုံးပါ။
• ဒဏ်ရာရပြီး ပထမရက်အနည်းငယ်အတွင်းတော့ လှဲအိပ်တဲ့အခါ ခြေထောက်ကို ခေါင်းအုံး သို့မဟုတ် စောင်ခုပြီးမြှင့်ထားပါ။ ဒါမှ ရောင်ရမ်းမှု လျော့စေမှာပါ။
• ရောင်ရမ်းနေတာ၊တောင့်တင်းနေတာတွေ သက်သာစေဖို့ ခြေချောင်းလေးတွေ မကြာခဏ လှုပ်ရှားကစားပေးပါ။
• ပုံမှန်လုပ်နေကျ လုပ်ရှားမှုတွေ၊ အလုပ်တွေကို ပြန်လုပ်နိုင်ဖို့ အရမ်းမလောပါနဲ့။ နာကျင်မှု သက်သာတာနဲ့ပဲ ကျိုးအက်သွားတဲ့အရိုးက လုံးဝကောင်းသွားတာမဟုတ်ပါဘူး။
• သက်သာလာတဲ့အခါ ခြေထောက်သန်မာစေဖို့ လိုအပ်တဲ့လေ့ကျင့်ခန်းတွေ ဆရာဝန်က အကြံပြုပါလိမ့်မယ်။ အိမ်မှာပဲ ကိုယ့်ဘာသာ လုပ်လို့ရတဲ့လေ့ကျင့်ခန်းတွေကို ဖြည်းဖြည်းချင်း လုပ်ကြည့်ပါ။ အားသိပ်မစိုက်ဖို့၊ အလောတကြီး၊ ခပ်ကြမ်းကြမ်း မလှုပ်ရှားမိဖို့ သတိထားပါ။
• အရေးကြီးတာက အရိုးအဆစ်နဂိုအတိုင်းပြန်ဖြစ်ဖို့ ပြန်လည်တည်ဆောက်နေချိန်အတွင်းမှာ ဒဏ်ရာရထားတဲ့ ခြေထောက်ကို အားမပြုဖို့၊ ဝန်မပိစေဖို့ဖြစ်ပါတယ်။ ချိုင်းထောက်လို အကူအညီမပါဘဲ ထမရပ်ပါနဲ့။ ဘီးတပ်ကုလားထိုင် သုံးသင့်ရင်သုံးပါ။ ကိုယ့်အသက်အရွယ်နဲ့ ဒဏ်ရာအနေအထားကို မူတည်ပြီး လုံးဝပျောက်ကင်းသက်သာဖို့က လပိုင်းကနေ နှစ်နဲ့ချီတဲ့အထိ ကြာနိုင်ပါတယ်။

တကယ်လို့

• ခြေထောက်က အရမ်းနာကျင်ကိုက်ခဲလာရင်
• ခြေထောက်အေးစက်ပြီး ဖြူဖျော့ သို့မဟုတ် အရောင်ပြောင်းလာရင်
• ခြေချောင်းတွေ ထုံကျဉ်လာရင်
• ပတ်တီး သို့မဟုတ် ကျောက်ပတ်တီးက အရမ်းတင်းကျပ်နေရင်
• ခြေထောက်မှာ သွေးခဲပိတ်တဲ့လက္ခဏာ ဖြစ်လာရင် (ခြေသလုံးကြွက်သား၊ ဒူးကောက်ကွေး၊ ပေါင် သို့မဟုတ် ပေါင်ခြံမှာ နာကျင်လာတာ၊ ခြေထောက်မှာ နီရဲရောင်ရမ်းလာတာ) အမြန်ဆုံး ဆရာဝန်ပြန်ပြပါ။