သက်ကြီးရွယ်အိုတွေကို နွေရာသီမှာ ဘယ်လိုစောင့်ရှောက်ပေးမလဲ

နွေရာသီက လူအများစုအတွက်ပျော်ရွှင်စရာကောင်းသလို အပန်းဖြေလို့လည်းကောင်းတဲ့ ရာသီတစ်ခုပါ။ ဒါပေမယ့် လူကြီးတွေအတွက်တော့ ဒီလိုမဟုတ်ပါဘူး။နွေရာသီရဲ့ အပူရှိန်က အမှုမဲ့အမှတ်မဲ့နေလိုက်မယ်ဆိုရင် အန္တရာယ်များတဲ့ အခြေအနေတွေတောင်ဖြစ်နိုင်ပါတယ်။ နွေရာသီမှာ အပူရှိန်ပြင်းထန်တာကြောင့် ဖျားနာတာတွေတော်တော်လေးဖြစ်နိုင်ပါတယ်။ လူကြီးတွေကနွေရာသီရဲ့ အပူဒဏ်ကို ခံနိုင်ရည်မရှိကြပါဘူး။ အပူရှိန်အရမ်းပြင်းတာက အရွယ်သုံးပါးစလုံးအတွက် အန္တရာယ်ရှိနိုင်ပါတယ်။

လူကြီးတွေဘာလို့ အပူဒဏ်ကိုမခံနိုင်ကြတာလဲ

အသက်အရွယ်ရလာတာနဲ့အမျှ ခန္ဓါကိုယ်ရဲ့ စနစ်တွေက ပုံမှန်အလုပ်မလုပ်နိုင်တော့ပါဘူး။ တဖြည်းဖြည်းချင်းနှေးလာနေပါတယ်။ချွေးဂလင်းတွေနဲ့ကိုယ်တွင်းသွေးလည်ပတ်မှုတွေကနေတဆင့် ခန္ဓါကိုယ်အပူချိန်ကို ထိန်းညှိပေးနိုင်စွမ်းကျဆင်းသွားတာက လူကြီးတွေ အပူဒဏ်ကိုမခံနိုင်ရခြင်းရဲ့ အဓိကအကြောင်းအရင်းတစ်ခုပါ။ ခန္ဓါကိုယ်မှာ ကိုယ်ခံအားနည်းလာတာ၊ နှလုံးရောဂါခံစားနေရတာ၊သောက်သုံးနေရတဲ့ဆေးဝါးတွေရဲ့ဘေးထွက်ဆိုးကျိုးတွေကြောင့် အပူဒဏ်ကိုခံနိုင်စွမ်းနည်းရတာမျိုးလည်းရှိပါတယ်။

သက်ကြီးရွယ်အိုတွေကို နွေရာသီမှာ ဘယ်လိုစောင့်ရှောက်ပေးမလဲ

သက်ကြီးရွယ်အိုတွေကို နွေရာသီမှာ ဘယ်လိုစောင့်ရှောက်ပေးမလဲ ………. ပူပြင်းတဲ့နွေရာသီမှာ ကိုယ်ချစ်ရတဲ့ လူကြီးမိဘတွေကို ကျန်းမာစေဖို့အတွက် ဂရုစိုက်ပေးလို့ရတဲ့ နည်းလမ်းတွေကိုပြောပြပေးပါရစေ။

အိမ်ထဲမှာအေးနေအောင်ထားပါ – တကယ်လို့ အိမ်မှာ လေအေးပေးစက်ရှိတယ်ဆိုရင်နွေရာသီရက်တွေမှာလေအေးပေးစက်ကို အချိန်ပြည့်ဖွင့်ထားပေးပါ။လေအေးပေးစက်မရှိဘူးဆိုရင်နေ့ခင်းဘက် အိမ်ထဲကိုနေရောင်တိုက်ရိုက်မဝင်နိုင်အောင်ပြတင်းပေါက်မှန်တွေကို ကာထားပေးပြီး အိမ်ထဲမှာအေးနေအောင်ထားပေးပါ။ ညဘက်မှပြတင်းတံခါးကိုဖွင့်ပြီးလေကောင်းလေသန့်ရအောင်လုပ်ပါ။ မျက်နှာကျက်မှာ ပန်ကာတပ်ထားတယ်ဆိုရင် ပန်ကာဖွင့်ပေးလိုက်ပါ။

သက်တောင့်သက်သာရှိမယ့် အဝတ်အစားတွေ ဝတ်ပေးပါ –နွေရာသီမှာ အနက်ရောင်အထည်တွေ နဲ့ ထူထဲတဲ့အဝတ်အစားတွေကို မဝတ်ပေးပါနဲ့။ချောင်ချောင်ချိချိပေါ့ပေါ့ပါးပါးဖြစ်မယ့် ချည်ထည်လေးတွေ လီနင်ထည်လေးတွေဝတ်ပေးပါ။ ချွေးစုပ်တဲ့အထည်မျိုးလေးတွေ ကိုနွေရာသီဝတ်ဖို့ပြင်ဆင်ပေးလိုက်ပါ။

ရေဓါတ်ပြည့်နေအောင်ထားပေးပါ –ရေ၊သစ်သီးဖျော်ရည်လိုမျိုး အရည်တွေကိုတိုက်ပေးပါ။ ကဖင်းဓါတ်နဲ့ အယ်လ်ကိုဟောပါတာတွေကို တတ်နိုင်သမျှမတိုက်ပါနဲ့။ ကဖင်းဓါတ်နဲ့ အယ်လ်ကိုဟောပါတဲ့သောက်စရာတွေက ခန္ဓါကိုယ်ရေဓါတ်ကို ဆုံးရှုံးစေနိုင်ပါတယ်။ လိုအပ်ရင် ဆရာဝန်နဲ့တိုင်ပင်ပြီး ဓါတ်ဆားတိုက်ပေးလို့ရပါတယ်။

နေ့ခင်းနေပြင်းချိန်တွေ အိမ်ထဲမှာပဲနေခိုင်းပါ –နေ့တစ်နေ့တာမှာ မနက်ခင်း ၁၀ နာရီကနေ ညနေခင်း ၃ နာရီလောက်အထိက အပူချိန်အမြင့်ဆုံးပါ။ ဒီလိုအချိန်တွေမှာ အိမ်ထဲမှာနေတာကအကောင်းဆုံးပါ။ အပြင်ထွက်မယ်ဆိုရင်လည်း ချည်သားအင်္ကျီလက်ရှည်ဝတ်တာ၊ ထီးဆောင်းတာမျိုးလုပ်သွားဖို့လိုပါမယ်။ အရိပ်ရတဲ့နေရာတွေကနေဖြတ်သန်းသွားတာကအဆင်အပြေဆုံးဖြစ်မှာပါ။နေလောင်ကာခရင်မ်လူးသွားဖို့လည်း မမေ့ပါနဲ့။

လေ့ကျင့်ခန်းပြင်းပြင်းထန်ထန်မလုပ်ပါနဲ့ –တကယ်လို့လေ့ကျင့်ခန်းကို အပြင်မှာလုပ်တတ်တဲ့ အလေ့အကျင့်ရှိတယ်ဆိုရင် မနက်ခင်း စောစောပိုင်းလေး ဒါမှမဟုတ် ညနေနေအေးချိန်လောက်မှ လုပ်ပါ။ အပူရှိန်မြင့်နေချိန်မှာချွေးအရမ်းထွက်စေမယ့် လှုပ်ရှားမှုတွေမလုပ်ပါနဲ့။ပေါ့ပေါ့ပါးပါးလေ့ကျင့်ခန်းမျိုးပဲပေးလုပ်ပါ။လေ့ကျင့်ခန်းလုပ်တဲ့အခါမှာလည်း တဆက်တည်း မလုပ်ဘဲ အနားယူပြီးဖြည်းဖြည်းချင်းလုပ်ခိုင်းပါ။

အစားအသောက်ဂရုစိုက်ပါ –သွေးတိုးရှိတယ်ဆိုရင် အငန်များတဲ့ အစားအစာတွေကို မစားမိဖို့ သတိထားဖို့လိုပါမယ်။နွေအရမ်းပူတဲ့အခါသွေးတက်စေနိုင်တဲ့ အစားအစာတွေ၊ အငန်ဓါတ်နဲ့ အစပ်ကဲတဲ့အစားအစာတွေ၊ အချဉ်စူးတာမျိုးတွေ၊ အဆီများတာမျိုးတွေကို မကျွေးမိဖို့ သတိထားရပါမယ်။

ဆက်သွယ်ရမယ့်ဖုန်းနံပါတ်တွေကို သိထားပါ –အရေးပေါ်အခြေအနေဖြစ်လာခဲ့ရင် ဆက်သွယ်ရမယ့် ဖုန်းနံပါတ်တွေကို အလွယ်တကူရနိုင်မယ့်နေရာမှာထားပါ။

သိထားရမယ့်အချက်လေးများ

• ရာသီဥတု အခြေအနေနဲ့ ကိုက်ညီအောင်ဝတ်ဆင်ပေးပါ။
• အပူချိန်က အရမ်းပူနေတဲ့အခါ အပြင်မထွက်မိအောင် သတိထားပေးပါ။ အပူကြာင့် ဖျားနာတာမျိုးဖြစ်နေတဲ့ လက္ခဏာတစ်ခုခုရှိနေလားဆိုတာကိုသေချာဂရုစိုက်စောင့်ကြည့်ပါ။
• ရေငတ်မှရေသောက်တာမျိုးမလုပ်ပါနဲ့။ရေငတ်ချိန်မှသောက်မယ်ဆိုရင် ခန္ဓါကိုယ်မှာရေဓါတ်ခမ်းခြောက်နေလောက်ပါပြီ။
• သွားလေရာကိုရေဗူးယူသွားပေးလိုက်ပါ။
• ရေဓါတ်ဖြည့်ပေးနိုင်မယ့် အစားအသောက်တွေဖြစ်တဲ့ သခွားသီး၊ မုန်လာဥဖြူ၊ ဖရဲသီး၊ စတော်ဘယ်ရီသီးလိုမျိုး အသီးတွေစားပေးပါ။

နွေရာသီမှာ ဖြစ်နိုင်တဲ့ ကျန်းမာရေးပြဿနာတွေက

ရေဓါတ်ခမ်းခြောက်တာ –ရေဓါတ်ခမ်းခြောက်တာကနွေရာသီမှာ လူကြီးတွေအဖြစ်များတဲ့ ကျန်းမာရေးပြဿနာတစ်ခုပါ။ လူကြီးတွေက အသက်ကြီးလာတာနဲ့အမျှရေသောက်နည်းသွားတာကြောင့် ပူပြင်းတဲ့အချိန်မှာ အလွယ်တကူရေဓါတ်ခမ်းခြောက်နိုင်ပါတယ်။နေပြင်းတဲ့အခါ ပုံမှန်ထက်ရေပိုသောက်ဖြစ်အောင်ဂရုစိုက်ပေးပါ။

ရာသီဥတုပူတာကြောင့်ခြေကုန်လက်ပန်းကျတာ – ရာသီဥတုပူပြင်းတာကြောင့်ခြေကုန်လက်ပန်းကျတာက အသက်အန္တရာယ်မရှိပေမယ့် နည်းနည်းတော့ပြင်းထန်ပါတယ်။နေ့စဉ်ရက်ဆက်နေပူဒဏ်ခံရတဲ့အခါ ခန္ဓါကိုယ်က ဆားဓါတ်နဲ့ရေဓါတ်ဆုံးရှုံးလာပါတယ်။ ဒီလိုဖြစ်လာတဲ့အခါ ညီးစီစီဖြစ်လာတာ၊ခေါင်းကိုက်တာ၊ ကြွက်တက်တာ၊မောပန်းနွမ်းနယ်တာ၊အားနည်းလာတာ၊အမြင်တွေဝါးလာတာ၊အော့အန်တာ၊ နှလုံးခုန်မြန်လာတာ၊ချွေးအရမ်းထွက်တာ၊ခေါင်းထဲက ရိပ်တိပ်တိပ်နဲ့မူးလာတာမျိုးတွေတွေခံစားရနိုင်ပါတယ်။

အပူလျှပ်တာ –အပူလျှပ်တာက အပူဒဏ်ကြောင့်ဖြစ်တဲ့ အရမ်းပြင်းထန်တဲ့ ကျန်းမာရေးပြဿနာတစ်ခုပါ။ ခန္ဓါကိုယ်က သူ့ဘာသာအေးမြအောင်မလုပ်နိုင်တဲ့အခါ အပူလျှပ်တာဖြစ်လာပါတော့တယ်။ အပူလျှပ်တဲ့အခါခေါင်းကိုက်တာ၊ ရိပ်တိပ်တိပ်မူးတာ၊ စိတ်ရှုပ်ထွေးတာ၊ စိတ်ရှုပ်တာ၊ သတိလစ်တာမျိုးတွေခံစားရနိုင်ပါတယ်။ ဒီလိုအခြေအနေတွေဖြစ်လာရင်တော့ နီးစပ်ရာဆေးခန်းကိုသွားရောက်ပြသတာ အကောင်းဆုံးဖြစ်မှာပါ။

အခုပြောပြခဲ့တဲ့ နည်းလမ်းလေးတွေကို လိုက်လုပ်ကြည့်ပြီး ပူပြင်းတဲ့နွေရာသီမှာချစ်ခင်ရတဲ့ လူကြီးမိဘတွေကို အပူဒဏ်ကြောင့် ကျန်းမာရေးပြဿနာတွေ မကြုံတွေ့အောင်လုပ်ဆောင်ပေးနိုင်ကြပါစေကြောင်း