ရာသီစောစောလာစေမယ့် နည်းလမ်း(၇)ခု

တစ်ခုတော့ရှိတာပေါ့။ တစ်ရက်နှစ်ရက်အတွင်း ဝုန်းဆို ချက်ချင်းရာသီလာမယ်လို့တော့ အာမခံနိုင်တဲ့နည်းလမ်းမရှိပါဘူး။ ရက်ပိုင်းအနည်းငယ်တော့စောင့်ရပါလိမ့်မယ်။ အရင်ဆုံး ရာသီလာအောင် ကူညီပေးမယ့် အစားအသောက်လေးတွေပြောပြမယ် –

(၁) နာနတ်သီး

နာနတ်သီးမှာ အက်စထရိုဂျင်နဲ့တခြားဟော်မုန်းတွေကို သက်ရောက်မှုရှိနိုင်တဲ့ အင်ဇိုင်းတစ်မျိုးဖြစ်တဲ့bromelain ကြွယ်ဝပါတယ်။bromelain က ရောင်ရမ်းမှုတွေကိုလည်း လျော့ပါးစေတယ်။ ရာသီမမှန်ဖြစ်စေတဲ့ အကြောင်းရင်းတချို့ကို နာနတ်သီးက ကူညီကုစားပေးနိုင်ပါတယ်။ ဒါ့ကြောင့် ရာသီစောလာချင်တဲ့သူတွေရော၊ ရာသီမမှန်တဲ့သူတွေပါ နာနတ်သီးစားပေးလို့ရပါတယ်။

(၂) ဗီတာမင် စီ (Vitamin C)

ဗီတာမင် စီပါတဲ့အစားအသောက်တွေ အများကြီးစားရင် ရာသီလာစေနိုင်တယ်လို့ အတော်များများက ယုံကြည်ထားကြပါတယ်။ ဒါဟာ ဗီတာမင် စီ က အက်စထရိုဂျင်နဲ့ ပရိုဂျက်စတုန်းပမာဏအပေါ် သက်ရောက်မှုရှိနိုင်တာကြောင့်ဖြစ်ပါလိမ့်မယ်။ ဒီဟော်မုန်းနှစ်မျိုးလုံးက ဘယ်အချိန်မှာ ရာသီလာမလဲဆိုတာနဲ့ သက်ဆိုင်နေတာပါ။

ဆေးပညာအထောက်အထား အတိအကျမရှိပေမယ့် ခန္ဓာကိုယ်အတွက် မရှိမဖြစ်လိုအပ်တဲ့ဓါတ်တစ်မျိုးဖြစ်တဲ့ ဗီတာမင်စီကို စားသုံးတာက လွန်တယ်တော့မရှိပါဘူး။ ဗီတာမင် စီ ကြွယ်ဝတာတွေက –

• အစိမ်းရင့်ရောင် အသီးအရွက်တွေ (ဥပမာ ကိုက်လန်ရွက်)
• အရည်ရွှမ်းအချဉ်သီးတွေ (လိမ္မော်၊ ကဗ္ဗလာသီး)
• ဂေါ်ဖီထုပ်နွယ်ဝင်တွေ ( ပန်းဂေါ်ဖီစိမ်း)

(၃) ချင်း

ချင်း ကတော့ မိန်းကလေးတွေရဲ့ ရာသီစက်ဝန်းနဲ့ပတ်သက်ရင် ဟိုအရင်တည်းကသုံးကြတဲ့ဆေးဖက်ဝင်ပစ္စည်းပါပဲ။ ရာသီလာချိန်ကိုက်ခဲမှုလျော့ပါးစေဖို့၊သွေးသားသန့်စင်စေဖို့ဆိုပြီး ရာသီလာချိန်မှာ ချင်းရေနွေးကြမ်းသောက်လေ့ရှိကြပါတယ်။

အလွှာပြားလေးတွေလှီးထားတဲ့ ချင်းကိုရေနွေးဆူဆူမှာ ခတ်ပြီး ၅ မိနစ်လောက်တည်ပါ။ အရည်ကိုယူပြီး ပျားရည် သို့မဟုတ် သကြားလေးထည့်သောက်ပါ။

(၄) တရုတ်နံနံ

တရုတ်နံနံမှာ ဗီတာမင် စီပါဝင်မှုပမာဏမြင့်မားသလို သားအိမ်ကျုံ့ဆန့်နိုင်အားကိုကောင်းစေတဲ့apiol ဓာတ်လည်းကြွယ်ဝပါတယ်။ ဒါ့ကြောင့် တရုတ်နံနံခတ်ထားတဲ့ ဟင်းချို သို့မဟုတ်ရေနွေးကြမ်းကိုသောက်ပေးသင့်ပါတယ်။

ရေနွေးပူတစ်ခွက်ထဲ တရုတ်နံနံခတ်၊ ၅ မိနစ်လောက်နှပ်ထားပြီးသောက်ပါ။ ဒါပေမယ့်apiol က ကိုယ်ဝန်ဆောင်တွေအတွက် မသင့်တော်တာကြောင့် ကိုယ်ဝန်ဆောင်၊ နို့တိုက်မိခင်နဲ့ကျောက်ကပ်မကောင်းသူတွေ မသောက်သင့်ပါဘူး။

(၅) ကိုယ်လက်လေ့ကျင့်ခန်း

လေ့ကျင့်ခန်းဆိုတိုင်း အကြမ်းကြီးတွေမလုပ်ပါနဲ့။ တချို့တွေမှာ အားစိုက်ရတဲ့လေ့ကျင့်ခန်းအကြမ်းတွေလုပ်တာကြောင့် ရာသီမမှန်ဖြစ်တတ်ကြလို့ပါ။ ဒါ့ကြောင့် ထိုက်သင့်သလောက် ကိုယ်လက်လှုပ်ရှားမှု၊ အားကစားလေးလုပ်ပေးတာကဟော်မုန်းတွေကိုပုံမှန်ဖြစ်အောင် ထိန်းညှိပေးနိုင်ပြီး ရာသီစက်ဝန်းကိုမှန်စေနိုင်ပါတယ်။

(၆) ရေနွေးနဲ့ရေချိုး

ရေနွေးနဲ့ရေချိုးတာကတောင့်တင်းနေတဲ့ကြွက်သားတွေကိုပြေလျော့စေပြီး စိတ်ထဲက ဖိစီးမှုတွေကို သက်သာလျော့ပါးစေပါတယ်။ အနွေးဓာတ်ပေးတာကပြေလျော့စေရုံတင်မကပါဘူး။သွေးလည်ပတ်မှုကိုကောင်းစေပြီး ရာသီစက်ဝန်းကိုမြန်လာအောင် ညင်သာစွာနဲ့ ကူညီပေးပါတယ်။ ဗိုက်အောက်ပိုင်းနားကိုရေနွေးပုလင်းလေးကပ်ပေးတာ၊ရေနွေးအိတ်ကပ်တာလည်း ရပါတယ်။

(၇) စိတ်ဖိစီးမှုကိုလျှော့

စိတ်ဖိစီးမှုပြင်းထန်နေရင် ရာသီမမှန်ဖြစ်တတ်တယ်လို့ သုတေသနတွေကတွေ့ရှိထားပါတယ်။ စိတ်ဖိစီး၊ လူပင်ပန်းနေရတဲ့ကာလတွေမှာ ရာသီလာနောက်ကျတာ၊ ထိမ်တာတွေဖြစ်တတ်တယ်ဆိုရင် စိတ်ကိုဖြေလျှော့တာ အကောင်းဆုံးနည်းပါပဲ။ယောဂကစားတာ၊ စာဖတ်တာ၊ တရားထိုင်တာ၊ သူငယ်ချင်းတွေနဲ့တွေ့ဆုံတာလိုမျိုး စိတ်ပေါ့ပါးစေမယ့်အလုပ်တွေ လုပ်ကြည့်ပါ။