အရေးပေါ်သန္ဓေတားဆေးဆိုတာ အကာအကွယ်မဲ့လိင်ဆက်ဆံပြီးတဲ့အခါ အရေးပေါ်သုံးစွဲကြတဲ့သားဆက်ခြားသောက်ဆေးဖြစ်ပါတယ်။

အရေးပေါ်သန္ဓေတားဆေးကို သောက်ပါများရင် ဘေးကင်းပါ့မလား

အရေးပေါ်သန္ဓေတားနည်းတွေကို လိင်ဆက်ဆံပြီးနောက် အခြေအနေအမျိုးမျိုးမှာ အသုံးပြုကြပါတယ် –

သန္ဓေတားဆေးမသုံးထားခြင်း၊

လိင်ပိုင်းဆိုင်ရာစော်ကားခံရခြင်း၊

ပုံမှန်သားဆက်ခြားနည်းလမ်းတွေမှာ အမှားအယွင်း သို့မဟုတ် ချွတ်ယွင်းမှုရှိတဲ့အခါမျိုး၊

ကွန်ဒုံးပေါက်ပြဲခြင်း၊ ချော်ထွက်ခြင်း၊အသုံးပြုပုံမမှန်ကန်ခြင်း၊

သန္ဓေတားသောက်ဆေးတွေကို သောက်သုံးဖို့ ၃ ရက်နဲ့အထက် ရက်ကျော်ခြင်း၊

သားအိမ်ဝအဖုံး(diaphragm )သို့မဟုတ် သားအိမ်ဝအပိတ် (cervical cap) အနေအထားမမှန်ခြင်း၊ ပျက်စီးခြင်း၊ ပေါက်ပြဲခြင်း၊ ထွက်ကျခြင်း(expulsion)

ရက်တွက်သန္ဓေတားနည်းမှာ ရက်အတွက်မှားခြင်း၊

သားအိမ်တွင်းထည့်ပစ္စည်း (IUD)သို့မဟုတ် အရေပြားအောက် ထည့်သွင်းရတဲ့သန္ဓေတားပစ္စည်း ကိုထုတ်လိုက်ပြီးတဲ့အချိန်တွေမှာ အရေးပေါ်သန္ဓေတားနည်းတွေကိုသုံးကြပါတယ်။

ဒါပေမယ့် သုံးစွဲရလွယ်ကူတယ်ဆိုတာနဲ့ပဲ ပုံမှန်သားဆက်ခြားဆေးတွေ၊ နည်းလမ်းတွေကို မသုံးတော့ဘဲ ဒီဆေးကိုပဲ လိင်ဆက်ဆံပြီးတိုင်းသောက်နေကြသူတွေရှိလာပါတယ်။

ဒီတော့ အရေးပေါ်သားဆက်ခြားဆေးကို ထပ်ကာတလဲလဲသောက်ရင် ဘာတွေဖြစ်လာနိုင်သလဲ

အရေးပေါ်သားဆက်ခြားသောက်ဆေးအများစုက ပရိုဂျက်စတင်ဟော်မုန်းပဲပါတဲ့levonorgestrelသောက်ဆေးတွေဖြစ်ပါတယ်။ ဒီဆေးကို အကာအကွယ်မဲ့လိင်ဆက်ဆံပြီး သို့မဟုတ် သန္ဓေတားဆေးသောက်ဖို့၊ ထိုးဖို့ ပျက်ကွက်ခဲ့တဲ့အခါ ၃ ရက်(၇၂ နာရီ) (နာရီ ၁၂၀) အတွင်းသောက်သုံးရင် ကိုယ်ဝန်ရရှိဖို့ကို ၈၉ (၈၇-၈၈) ရာခိုင်နှုန်းကာကွယ်ပေးနိုင်ပါတယ်။

ဒါပေမယ့် လိင်ဆက်ဆံပြီးနောက်ပိုင်း စောစောသောက်လေ ပိုထိရောက်လေဖြစ်ပါတယ်။ သူက မျိုးဥအိမ်ကနေ မျိုးဥထွက်ရှိမှုကို ယာယီတားဆီးပေးပြီး ကိုယ်ဝန်မရအောင်ကာကွယ်ပေးပါတယ်။ အရေးပေါ်သားဆက်ခြားဆေးဆိုတာ တစ်ကြိမ်သုံးဖို့သာ ရည်ရွယ်ထုတ်လုပ်တာဖြစ်ပေမယ့် တစ်လအတွင်း တစ်ကြိမ်ထက်ကျော်ပြီးသောက်ရင်လည်း ကျန်းမာရေးအန္တရာယ်တွေမဖြစ်စေနိုင်ပါဘူး။

အရေးပေါ်သားဆက်ခြားဆေးတွေက ပိုသောက်မိလို့ အန္တရာယ်မရှိစေနိုင်ဘူးဆိုပေမယ့် ရာသီစက်ဝန်းမမှန်တာ၊ မအီမသာဖြစ်တာ၊ ရင်သားတင်းတာတို့လို ခဏတာသာဖြစ်တတ်တဲ့ ဘေးထွက်ဆိုးကျိုးအနည်းငယ်ရှိနိုင်ပါတယ်။ခေါင်းကိုက်ခြင်း၊ ရာသီလာစဉ်နာကျင်ကိုက်ခဲခြင်း၊ခေါင်းမူးခြင်း၊ပင်ပန်းနွမ်းနယ်ခြင်းတို့လည်းဖြစ်နိုင်ပါတယ်။ ဒါတွေအကုန်လုံးက သန္ဓေတားဆေးတွေရဲ့ အဖြစ်များတဲ့သက်ရောက်မှုတွေဖြစ်လို့ စိုးရိမ်စရာမရှိပါဘူး။ ရာသီလာပြီးမကြာခင် မထင်မှတ်ဘဲနောက်တစ်ကြိမ်ရာသီသွေးဆင်းတာ၊နောက်တစ်လရာသီလာတဲ့အခါစောနေတာ၊နောက်ကျတာတွေလည်းရှိနိုင်ပါတယ်။

ဒီလိုတွေ ဘေးဥပါဒ်နည်းပါးတာကြောင့် ဆရာဝန်ညွှန်ကြားချက်မပါဘဲ အရေးပေါ်သားဆက်ခြားဆေးတွေကို အလွယ်တကူဝယ်ယူနိုင်နေတာဖြစ်ပါတယ်။ ဒါပေမယ့် အရေးပေါ်အနေနဲ့သာ ဒီဆေးကိုသုံးဖို့ရည်ရွယ်ထုတ်လုပ်ထားတာဖြစ်လို့ပုံမှန်သားဆက်ခြားနည်းအဖြစ်နဲ့သုံးဖို့မသင့်တော်ပါဘူး။ သားဆက်ခြားသောက်ဆေးနဲ့ ထိုးဆေးတွေကိုသာ သုံးသင့်ပါတယ်။

ဒါ့အပြင် အရေးပေါ်ကိုယ်ဝန်တားဖို့အတွက် ဒီဆေးတစ်မျိုးတည်း ရှိတာ မဟုတ်ဘဲ နှစ်ရှည်ခံကိုယ်ဝန်တားနည်းတစ်ခုဖြစ်တဲ့ သားအိမ်တွင်းထည့်ပစ္စည်းကိုလည်း အသုံးပြုနိုင်တယ် ဆိုတာကို သိစေချင်ပါတယ်။

အရေးပေါ်သန္ဓေတားဆေးကို သောက်ပါများရင် ဘေးကင်းပါ့မလား

ဒီတော့ အရေးပေါ်သားဆက်ခြားဆေးကို ထပ်ကာတလဲလဲသောက်ရင် ဘာတွေဖြစ်လာနိုင်သလဲ