ကိုယ်ဝန်ဆိပ်တက်တဲ့ ပြဿနာမဖြစ်အောင် ကြိုတင်ကာကွယ်လို့ရလား။

ကိုယ်ဝန်ဆိပ်တက်လို့ ကလေးပျက်ကျသွားတယ်၊ ကိုယ်ဝန်ဆိပ်တက်လွန်းလို့ ခြေထောက်တွေ ဖောရောင်နေပြီး လမ်းလျှောက်လို့တောင် မရတော့ဘူး ၊ကိုယ်ဝန်ဆိပ်တက်လို့ နေ့မစေ့ လမစေ့တဲ့ ကလေး၊ ပေါင်မပြည့်တဲ့ ကလေးလေးတွေ မွေးလာတယ်စသဖြင့် ကိုယ်ဝန်ဆိပ်တက်ခြင်းရဲ့ နောက်ဆက်တွဲပြဿနာတွေဟာ ကိုယ်ဝန်ဆောင်မိခင်တိုင်း တွေးကြောက်ရတဲ့ အိပ်မက်ဆိုးကြီးတွေပါပဲ။ ဒါပေမယ့် ကိုယ်ဝန်ဆိပ်တက်တဲ့ ပြဿနာဟာလည်း ကိုယ်ဝန်ဆောင် ၂၀၀ မှာ ၁ ယောက်လောက်ကဖြစ်နေပြီး အဖြစ်များတဲ့ ပြဿနာတစ်ခုဖြစ်တော့ ဘယ်လိုကာကွယ်ရမလဲဆိုတဲ့ အကြောင်းလေးတွေ သိထားဖို့လိုလာပြီပေါ့။ မဖြစ်ခင် ကြိုတင်ကာကွယ်ထားနိုင်တာက အကောင်းဆုံးလေ။ ဒီတော့ ကိုယ်ဝန်ဆိပ် မတက်အောင် ဘယ်လို ကာကွယ်ကြမလဲ။ ။

ကာကွယ်ရမယ့်အကြောင်း အရင်မပြောခင် ကိုယ်ဝန်ဆိပ်တက်ခြင်းအကြောင်း အကျဉ်းလေး ပြောပြပေးချင်ပါတယ်။

ကိုယ်ဝန်ဆိပ်တက်တယ်ဆိုတာ ဘာလဲ ။ ။

ဆေးပညာအရ ကိုယ်ဝန်ဆောင်ချိန် ကိုယ်ဝန်ဆိပ်တက်တဲ့ ပြဿနာကို Preeclampsia နဲ့ eclampsia ဆိုပြီး ၂ မျိုးသတ်မှတ်ထားပါတယ်။

Preeclampsia – ကိုယ်ဝန်ရှိနေတဲ့အချိန် သွေးပေါင်တွေတက်လာတာ နဲ့ ဆီးထဲ ပရိုတင်းပါ( proteinuria)ပြဿနာရှိနေတာ

Eclampsia – Preeclampsia ကနေ နောက်တစ်ဆင့်တက်ပြီး ပိုဆိုးလာလို့ ကိုယ်ဝန်ဆောင်အမျိုးသမီး မျက်ဖြူလန်တက်သွားတဲ့ ပြဿနာကို ပြောတာဖြစ်ပါတယ်။

ကိုယ်ဝန်ဆိပ်တက်ခြင်း အဖြစ်များတဲ့သူတွေကတော့

• အရင်တည်းက သွေးတိုး ဆီးချို ရောဂါဖြစ်နေတဲ့ အမျိုးသမီးတွေ
• ပထမ တစ်ခါ ကိုယ်ဝန်ဆောင်တုန်းက ကိုယ်ဝန်ကြောင့် သွေးပေါင်တက်ခဲ့တဲ့သူတွေ ၊
• ကိုယ်ဝန်ဆိပ်တက် တစ်ခါ တက်ဖူးထားတဲ့သူတွေနဲ့
• ခုခံအား ဆိုင်ရာ ရောဂါတွေဖြစ်တဲ့ lupus ရောဂါ၊ အဆစ်အမြစ်နာရောဂါနဲ့ scleroderma ရောဂါရှိသူတွေပဲ ဖြစ်ပါတယ်။

ကိုယ်ဝန်ဆိပ်တက်ခြင်းရဲ့ ထူးခြားချက်တွေကတော့

• အရင်တုန်းက တစ်ခါမှ သွေးတိုးမရှိခဲ့ဖူးဘဲ ခုကိုယ်ဝန်ကြီးနဲ့ကျမှ သွေးပေါင်ချိန် ၁၄၀/၉၀ လောက်ထိ မြင့်လာတာ
• ကိုယ်ဝန် ပတ် ၂၀လောက်ဆို စဖြစ်လာတာ
• သေချာ ကုသမှုမရှိရင် ကိုယ်ဝန်ဆောင် အမျိုးသမီးရဲ့ ကျောက်ကပ်၊ ဦးနှောက်နဲ့ အသည်းတွေ ထိခိုက်စေပြီး
• တက်လာတဲ့သွေးပေါင်ချိန်ကြောင့် သွေးလည်ပတ်မှုတွေလဲ မကောင်းတော့လို့ အချင်းဆီ သွေးရောက်တာနည်းသွားပြီး ဗိုက်ထဲက ရင်သွေးလေးဆီ အောက်ဆီဂျင်တွေ အာဟာရတွေ ရောက်တာနည်းသွားတတ်ပါတယ်။ ဒီလိုနဲ့ မွေးလာတဲ့ကလေးပေါင်မပြည့်တာ၊ နေ့မစေ့ လမစေ့တဲ့ကလေးတွေ မွေးတာ၊ ကလေး အသေမွေးတာ စတဲ့ ပြဿနာတွေ နောက်ဆက်တွဲပါလာနိုင်ပါတယ် ။

ဒီတော့ ဒီလို ကြောက်စရာကောင်းတဲ့ ကိုယ်ဝန်ဆိပ်တက်ခြင်းကို ကြိုတင်ကာကွယ်ဖို့ဆိုတာ အရေးကြီးလာပြီပေါ့။ လုံးဝကာကွယ်ပေးမှာလို့ ၁၀၀ ရာခိုင်နှုန်း အာမမခံပေမယ့် ကိုယ်ဝန်ဆိပ်တက်ခြင်း မဖြစ်အောင် လျှော့ချလို့ရတဲ့ နည်းတွေကတော့

• ကိုယ်ဝန်သေချာအပ်ထားပြီး ရက်ချိန်းတွေမှာ မှန်မှန်သွားပြပါ။ ဒါမှ ကိုယ့်သွေးပေါင်ချိန်တိုင်းတာတာ၊ ဆီးစစ်တာနဲ့ ကိုယ့်ကျန်းမာရေးနဲ ကိုယ်ဝန်ကျန်းမာရေးကို စစ်ဆေးတာမျိုး လုပ်လို့ရမှာပါ။
• အငန်လျှော့စားပါ။
• တစ်နေ့ကို ရေ ၈ ခွက်လောက်သာက်ပါ။
• သရေစာ ဆီကြော်မုန့်တွေရှောင်ပါ။
• အရက်နဲ့ ကဖင်းပါတဲ့ အချိုရည်တွေရှောင်ပါ။.
• ကောင်းကောင်း အနားယူအိပ်စက်ပါ။
• ကိုယ်လက်လှုပ်ရှားမှုလုပ်ပါ။
• နေ့ခင်းဘက်တွေဆို ခြေထောက်ကို တစ်ချိန်လုံး ချမထားဘဲ ပက်လက်လှန် အနေအထားနဲ့ ခြေထောက်အောက်မှာ ခေါင်းဦးလေးထားပြီး ခြေထောက်ကို နည်းနည်းမြှင့်ပြီးမှ လှဲပါ။

ကိုယ်ဝန်ဆိပ်တက်တာကို ကုသလို့ရလား။ ။

• ကိုယ်ဝန်ဆိပ်တက်ခြင်းဟ ကိုယ်ဝန်ကြောင့်ဖြစ်ရတာ ဖြစ်တဲ့အတွက် ဗိုက်ထဲက ရင်သွေးလေး မွေးပြီးမှ ကိုယ်ဝန်ဆိပ် တက်တဲ့လက္ခဏာတွေ သက်သာသွားမှာ ဖြစ်ပါတယ်။
• မိခင်နဲ့ ကလေး ကျန်းမာရေး အခြေအနေကို ချိန်ဆပြီး ရိုးရိုးမွေးရမလား ခွဲမွေးရမလားဆိုတာကို ဆရာဝန်တွေက ဆုံးဖြတ်သွားမှာ ဖြစ်ပါတယ်။
• အရေးပေါ် မွေးဖို့မလိုသေးဘူးဆိုရင်တော့ တက်နေတဲ့သွေးပေါင်ချိန်ကို လျှော့ချဖို့ သွေးပေါင်ကျဆေးတွေ သောက်ပြီး ကိုယ်ဝန်ဆိပ်တက်ခြင်းပိုဆိုးမလာအောင် ထိန်းရမှာဖြစ်ပါတယ်။