ကိုယ်ဝန်ဆောင်ဖူးတဲ့သူတိုင်း သိကြမှာပါကြမှာပါ။ ကိုယ်ဝန်စရှိပြီဆိုတာနဲ့ မနက်ပိုင်းဆို မူးဝေပျို့အန်ချင်နေပြီး ဘာမှကို စားချင်သောက်ချင်စိတ်မရှိတာကိုလေ။ ကိုယ်ဝန်ရှိခြင်းရဲ့ အမှတ်အသားတစ်ခုလို့ ဆိုရလောက်အောင် ကိုယ်ဝန်အစောပိုင်း ပထမ ၃ လမှာ မူးဝေပျို့အန်ခြင်းကို ကိုယ်ဝန်ဆောင် ၈၀ ရာခိုင်နှုန်းလောက် ခံစားကြရပါတယ်။
ကိုယ်ဝန်ဆောင်ချိန် မူးဝေအော့အန်ခြင်းဟာ ဘာကြောင့် ဖြစ်ရတာလဲ ။ ။
ရုပ်ပိုင်းဆိုင်ရာနဲ့ ဇီဝရုပ်ဖြစ်ပျက်မှုတို့ကြောင့် ကိုယ်ဝန်ဆောင်ချိန် မူးဝေအော့အန်ခြင်းတွေ ဖြစ်ရတယ်လို့ဆိုပါတယ်။ ပြောင်းလဲလာတဲ့ ဖြစ်စဉ်တွေကတော့
- Oestrogen ခေါ် မဟော်မုန်း များလာတာ
- သွေးပေါင်ချိန်တွေ ကျလာတာ
- ကာဗိုဟိုက်ဒရိုက် အသုံးပြုမှုပြောင်းလဲလာတာနဲ့
- ရုပ်ပိုင်းဆိုင်ရာနဲ့ စိတ်ပိုင်းဆိုင်ရာ ဖိစီးမှုတွေ များလာတာတွေပဲ ဖြစ်ပါတယ်။ ဒါတွေကြောင့် မူးဝေအော့အန်ခြင်း ဖြစ်ရတယ်လို့လည်း ဆိုပေမယ့် အကြောင်းအရင်း အတိအကျကို ခုထိသေချာမသိကြသေးကြပါဘူး။
ကိုယ်ဝန်ဆောင် ၈၀ ရာခိုင်နှုန်းလောက်က ကိုယ်ဝန်ဆောင်ချိန် မူးဝေအော့အန်ခြင်းကို ခံစားရတယ်ဆိုတော့ သူတို့က ဘယ်လိုလူများလဲ ။ ။
- အရင် ကိုယ်ဝန် တွေတုန်းကလည်း ပျို့အန်မူးဝေတာတွေ ရှိခဲ့မယ်
- မျိုးရိုးထဲမှာလည်း ကိုယ်ဝန်ဆောင်ချိန် မူးဝေအော့အန်တတ်တဲ့သူတွေရှိတယ်
- ကားမူးတတ်တဲ့အကျင့်လည်းရှိမယ်
- မ ဟော်မုန်း (oestrogen) ပါတဲ့ သန္ဓေတားဆေးကို သုံးဖူးထားမယ်
- ကိုယ်အလေးချိန်ကလည်း BMI ၃၀ နှင့်အထက်ဖြစ်တဲ့ အဝလွန်နေတဲ့သူဖြစ်နေမယ်
- စိတ်ဖိစီးမှု များနေတဲ့သူဖြစ်နေမယ်
- ၂ မွာပူး ၃ မွာပူး ကိုယ်ဝန်ဆောင်နဲ့
- သားဦးကိုယ်ဝန်ဆောင်မိခင်တွေက ကိုယ်ဝန်ဆောင်ချိန်မူးဝေ အော့အန်ခြင်းကို အခြားကိုယ်ဝန်ဆောင်တွေထပ် ပိုပြီး ခံစားရလေ့ရှိပါတယ်။ ။
ဒီလို ကိုယ်ဝန်ဆောင်ချိန်မူးဝေအော့အန်ခြင်းက ကိုယ်ဝန်ဆောင်တိုင်း အနည်းနဲ့ အများခံစားရမယ့် ဝေဒနာတစ်ခုဆိုတော့ သက်သာအောင် ဘယ်လိုလုပ်ကြမလဲ။ ။
- ကောင်းကောင်းအနားယူပါ။ မောပန်းခြင်းက မူးဝေအော့အန်ချင်စိတ်ကိုပိုဆိုးစေနိုင်တာကြောင့်ပါ။
- ရေသောက်ပါ။ တစ်ခါတည်း အများကြီး တစ်ဝသောက်တာထက်စာရင် နည်းနည်းလေးနဲ့ အကြိမ်ရေများများသောက်တာ ပိုကောင်းပါတယ်။ ဒါ့အပြင် အသီးဖျော်ရည် လတ်လတ်ဆတ်ဆတ် အေးအေးလေးတွေက ခေါင်းကြည်ပြီး လန်းဆန်းစေလို့ ကိုယ်ဝန်ဆောင် မေမေတို့ခံစားရတဲ့ မူးဝေတာကို သက်သာစေမှာပါ။
- အစားစားပါ။ အစားစားချင်စိတ်မရှိလို့ မူးပြီး အန်ချင်နေလို့ဆိုပြီး ဗိုက်အဆာခံနေရင် မူးဝေခြင်းကိုပိုဆိုးသွားစေနိုင်ပါတယ်။ ဒါ့ကြောင့် အစားစားပါ။ နည်းနည်းနဲ့ အကြိမ်ရေများများစားပါ။ အနံ့ပြင်းပြီး အဆီများတဲ့ အစားအသောက်တွေကိုတော့ ရှောင်ပါ။
- အိပ်ရာကထရင် ဆတ်ကနဲကောက်မထဘဲ ဖြည်းဖြည်းချင်းထပါ။
- သက်သာချောင်ချိတဲ့ အဝတ်အစားတွေကို ဝတ်ဆင်ပါ။
- မူးဝေတာကို သက်သာစေတဲ့ ဆေးတွေ သောက်ပါ။
ကိုယ်ဝန်ရှိပြီဆိုတာနဲ့ ဗိုက်ထဲက ရင်သွေးလေးကို ထိခိုက်နိုင်လို့ တွေ့ကရာဆေးတွေ လျှောက်သောက်လို့မရပါဘူး။ ဆရာဝန်နဲ့ တိုင်ပင်ဆွေးနွေးပြီးမှ သောက်တာ သာအကောင်းဆုံးပါ။
[embed-health-tool-due-date]
