ကျောင်းနေအရွယ် ကိုယ့်ကလေး လိင်အကြမ်းဖက်ခံခဲ့ရသလား ဘယ်လိုသိနိုင်မလဲ

လိင်ပိုင်းဆိုင်ရာစော်ကားမှုဆိုတာ အဓမ္မကြံစည်တဲ့အကြမ်းဖက်မှုမှမဟုတ်ပါဘူး။ ညစ်ညမ်းတဲ့ပုံတွေနဲ့ဗီဒီယိုတွေပြတာ၊ ကလေးရှေ့မှာ မဖွယ်မရာလုပ်ပြတာ၊ ကလေးကို မဖွယ်မရာကိုင်တွယ်စေတာ၊ ကလေးရဲ့ဖုံးကွယ်အပ်တဲ့အစိတ်အပိုင်းတွေကို ထိတွေ့တာ၊ လိင်အင်္ဂါကို လက်နဲ့ထိုးသွင်းတာတွေအားလုံး လိင်စော်ကားမှု၊နှောင့်ယှက်မှုနဲ့အကျုံးဝင်ပါတယ်။ ဒါ့ကြောင့် ကလေးက သားယောကျာ်းလေးပဲဖြစ်နေပါစေ သမီးလေးတွေလိုပဲ ဒီအန္တရာယ်အတွက် စိုးရိမ်ရပါလိမ့်မယ်။ ကလေးအများစုက မိဘတွေနဲ့ဆရာတွေကို ဒီလိုကိစ္စတွေပြန်ပြောပြဖို့ဖြစ်နိုင်ခြေတော်တော်နည်းပါတယ်။ကြောက်ရွံ့စိတ်၊ရှက်ရွံ့စိတ်၊ ဘာဖြစ်ခဲ့မှန်းမသိတဲ့စိတ်တို့နဲ့ ဖုံးကွယ်နေပါလိမ့်မယ်။ ဒီလိုကြုံတွေ့ရတဲ့ကလေးတွေမှာတွေ့ရတတ်တဲ့ လက္ခဏာတွေနဲ့အပြောင်းအလဲတွေအကြောင်းလေးမေမေတို့ကိုအကြံပြုချင်ပါတယ်။

အဓိကအားဖြင့် ကလေးမှာ အရင်ကနဲ့မတူတဲ့ပြောင်းလဲမှုတွေရှိလာတာကို သတိထားကြည့်နိုင်ပါတယ်။

အကျင့်စရိုက်လေးတွေပြောင်းလာတယ်

ကလေးက ရုတ်တရက်ကြီး အရင်နဲ့မတူတော့တဲ့ပြုမူနေထိုင်မှုတွေရှိလာတယ်။ ဥပမာ အရင်က တက်ကြွသွက်လက်နေတဲ့ကလေးက စိုးရိမ်သလို၊ မလုပ်ရဲမကိုင်ရဲလိုလို၊ စိတ်ညစ်နေသလို မှိုင်လာတာမျိုး။ ကိုယ့်ကိုယ်ကိုယုံကြည်မှုရှိတဲ့ ကလေးတွေတောင် ဒီလိုကြုံရဖူးတယ်ဆို အပြောင်းအလဲဖြစ်နိုင်ပါတယ်။ သတိထားကြည့်ပါ။

အပြုအမူတွေပြောင်းလဲလာတယ်

ကလေးက အရွယ်နဲ့မလိုက်တဲ့ အပြုအမူတွေရှိလာနိုင်တယ်။ ဥပမာ ရွယ်တူချင်းမှာ မသင့်တော်တဲ့အပြုအမူတွေနဲ့ဆော့ကစားတာမျိုး(သူကြုံခဲ့ဖူးသလို) လုပ်လာတတ်တယ်။ အိပ်စက်မှုပုံစံလည်းပြောင်းလဲလာနိုင်တယ်။ သွေးဆောင်ခံရတဲ့ စူးစမ်းမှုလို ကြုံခဲ့ရတဲ့ကလေးတွေထက် အကျပ်ကိုင်၊ခြိမ်းခြောက်ခံ၊အကြမ်းဖက်ခံရတဲ့ ထိတ်လန့်မှုမျိုးကြုံခဲ့ရတဲ့ ကလေးတွေမှာ အိပ်မက်ဆိုးတွေမက်ရတာ၊ ညလန့်လန့်နိုးတာလို အိပ်စက်မှုပြဿနာတွေရှိလာတတ်ပါတယ်။

လိင်စော်ကားခံရတဲ့ကလေးတွေဟာ လုံးဝသူစိမ်းတွေထက် ရင်းနှီးတဲ့သူတွေ၊ နီးစပ်တဲ့သူတွေ၊ ယုံကြည်ရသူတွေဆီကကြောက်စရာကြုံရတာများတာမို့ ဘယ်သူ့ကိုမှ မယုံတော့တာ၊သံသယများလာတတ်တာပါ။ ရုတ်တရက်လှုပ်ရှားမှုတွေ၊ အသံကျယ်ကျယ်တွေကို အရင်ကနဲ့မတူ လန့်တတ်နေသလို တစ်ယောက်ယောက်က လာထိလိုက်၊ကိုင်လိုက်ရင်တောင်ကြောက်ရွံ့နေတတ်တာ လိင်စော်ကားခံထားရတဲ့ လက္ခဏာဖြစ်နိုင်ပါတယ်။

ပေါင်းသင်းဆက်ဆံရေးမှာပြဿနာရှိလာတယ်

ကလေးက သူငယ်ချင်းတွေနဲ့ဆက်ဆံရေးမှာ ရင်းနှီးဖို့ ခက်လာတယ်၊ သူရင်းနှီးတဲ့သူတစ်ယောက်ယောက်ရဲ့ ကျူးလွန်မှုကြောင့် ဒီလိုကြုံခဲ့ရတဲ့အခါပေါင်းသင်းဆက်ဆံရေးကိုကြောက်လာတာလည်း ပါပါတယ်။ ကိုယ့်ကိုယ်ကိုကာကွယ်ဖို့အတွက် ကလေးဟာ တခြားသူတွေကိုရှောင်တော့မှာပါ။ ကလေးက လူတစ်ဦးတည်းကိုပဲရှောင်ဖို့ကြိုးစားနေပြီဆိုရင်တော့ ကိုယ့်ကလေးကိုချော့ပြီးမေးသင့်နေပါပြီ။

ကလေးက ဘာကိုမှ စိတ်မဝင်စားတော့ဘူး

သူတို့အရင်က တက်တက်ကြွကြွရှိခဲ့ဖူးတဲ့ အရာတွေကို လုံးလုံးစိတ်မဝင်စားတော့တာဆိုရင် ကလေးကို သတိထားဂရုစိုက်သင့်ပါတယ်။ အမှန်က ကလေးမှာ တခုခုကို အာရုံစူးစိုက်ဖို့အခက်အခဲဖြစ်နေတာပါ။

အပြစ်လုပ်ထားသလို ခံစားနေရတယ်

ကလေးက သူ့ကိုယ်သူအပြစ်တခုခုလုပ်ထားသူလို ခံစားနေရတဲ့အရိပ်အယောင်တွေ့ရရင် ဒီတိုင်းမထားပါနဲ့။ ရင်းရင်းနှီးနှီး စကားပြောပေးရင်း ကလေးရဲ့ခံစားချက် ဖွင့်ဟလာအောင်ဖြည်းဖြည်းချင်းလုပ်ယူပါ။ သူ့ရဲ့လျှို့ဝှက်ချက်ကို လူသိမှာစိုးပြီး တစ်ဦးတည်းသီးသန့်နေတာ၊ ကိုယ့်ကိုယ်ကို အပြစ်တင်နေတာရေရှည်မှာ ကလေးအတွက်မကောင်းပါဘူး။

လိင်ပိုင်းဆိုင်ရာ အနိုင်ကျင့်ခံထားရတဲ့ ကလေးတစ်ယောက်မှာ အသိသာဆုံးလက္ခဏာတွေက –

• လိင်အင်္ဂါတဝိုက် နာကျင်တာ၊ ယားယံတာ၊ စုတ်ပြဲအနာ၊သွေးထွက်တာတွေဖြစ်ပါတယ်။
• လိင်အင်္ဂါ သို့မဟုတ် စအို နာကျင်မှုကြောင့် လမ်းလျှောက်ရတာ၊ ထိုင်ရတာ အခက်အခဲဖြစ်နေတတ်တယ်။
• လူတွေနဲ့သိပ်မရောတော့ဘဲ တစ်ယောက်တည်းသီးခြားနေတာများလာတယ်။
• ဝမ်းနည်းစိတ်ဓါတ်ကျတဲ့ပုံစံ မှိုင်နေတတ်တယ်။
• အစားသိပ်မစားတော့ဘူး။

ဒါပေမယ့်လည်း လိင်ပိုင်းဆိုင်ရာစော်ကားခံရတဲ့ကလေးတွေမှာ ပြင်းထန်တဲ့အခြေအနေမဟုတ်ခဲ့ရင် အပြင်ပန်းထိခိုက်ဒဏ်ရာလည်းမရှိ၊ လူကြီးတွေကိုပြန်ပြောပြတာလည်းမရှိဘဲကြောက်စိတ်နဲ့ကြိတ်ခံစားတာ များတယ်ဆိုတာမေမေတို့မမေ့ပါနဲ့။ မသိမသာနဲ့ ကာလကြာရှည် ကိုယ့်ကလေးကို လိင်အမြတ်ထုတ်ခံနေရတာ ၊ခြိမ်းခြောက်ခံထားရတာ ကိုယ်မသိခဲ့ရင် ရင်နာစရာပါ။ အလုပ်တွေများလည်း ကိုယ့်ရင်သွေးရတနာလေးတွေကို အမြဲမပြတ်ဂရုစိုက်ပေးပါလို့။

Hello Health Group သည်ဆေးပညာအကြံပြုချက်များ၊ရောဂါရှာဖွေအတည်ပြုချက်များနှင့် ကုသမှုများမပြုလုပ်ပေးပါ။