ဆောင်းရာသီ မှာကလေးငယ်လေးတွေရဲ့ အသားအရေကို မှန်ကန်စွာ ထိန်းသိမ်းစောင့်ရှောက်ကြမယ်

ဆောင်းရာသီ မှာ ရာသီဥတုအေးအေးလေးနဲ့ ပါးနီနီလေးဆိုတော့ လှတယ်နော်။ အနီရောင်လေးဖြန်းနေတဲ့ ပါးအို့နီနီလေးနဲ့ဘေဘီလေးကကိုယ်တွေအမြင်မှာလှပြီး ချစ်ဖို့ကောင်းနေပေမယ့် သူ့ခမျာတော်တော်လေးနေရခက်နေမှာပါ။ ဒါကတော့ဆောင်းရာသီအအေးဒဏ်ကြောင့် အရေပြားခြောက်သွေ့မှုလက္ခဏာတစ်ရပ်ပါ။ဆောင်းရာသီမှာ အရေပြားခြောက်သွေ့မှုက ခန္ဓါကိုယ်အစိတ်အပိုင်းတိုင်းမှာဖြစ်နိုင်ပါတယ်။ လူကြီးတွေမှာလည်းဖြစ်နိုင်သလို ကလေးတွေမှာလည်းဖြစ်နိုင်ပါတယ်။ ကလေးငယ်လေးတွေရဲ့ အရေပြားကပတ်ဝန်းကျင်အခြေအနေကို ခံနိုင်ရည်နည်းလွန်းတာကြောင့်ဆောင်းရာသီအအေးဒဏ်ကြောင့် အရေပြားခြောက်သွေ့မှုရဲ့နောက်ဆက်တွဲပြဿနာတွေ မဖြစ်အောင် မိဘတွေကသေချာဂရုစိုက်ပေးဖို့လိုပါမယ်။

ဆောင်းရာသီမှာ အရေပြားကခြောက်သွေ့တာကြောင့် နီမြန်းတာ၊ ယားယံတာ၊ အရေပြားအဖတ်လန်တာမျိုးတွေဖြစ်နိုင်သလို အရေပြားခြောက်သွေ့မှုကြောင့် နှင်းခူဖြစ်တာလိုမျိုး အရေပြားပြဿနာတွေလည်းဖြစ်နိုင်ပါသေးတယ်။ ဒီလိုမျိုး ဘေဘီတွေရော မေမေတွေကိုပါ စိတ်အနှောင့်အယှက်ဖြစ်စေတဲ့ အရေပြားပြဿနာကနေ ဘယ်လိုကာကွယ်မလဲဆိုတဲ့မေးစရာရှိလာပါတယ်။

ဆောင်းရာသီမှာဘေဘီလေးတွေရဲ့ အသားအရေကို ဒီနည်းအတိုင်းကာကွယ်ပါ

ကလေးကို လုံခြုံနွေးထွေးအောင်ဝတ်ဆင်ပေးပါ – ရာသီဥတုကအေးတာကြောင့်ရော အသားအရေကိုထိခိုက်တာမျိုးမဖြစ်အောင်ကာကွယ်ဖို့အတွက်ပါဆောင်းရာသီ မှာ ကလေးကို လုံခြုံနွေးထွေးအောင်ဝတ်ဆင်ပေးဖို့လိုပါတယ်။ ဒီလိုဝတ်ဆင်ပေးရာမှာလည်း အရမ်းထူထဲတဲ့ အဝတ်အစားတွေမဝတ်ပေးမိဖို့ သတိပြုပါ။ အရမ်းထူလွန်းတဲ့ အဝတ်အစားတွေက ကလေးကိုချွေးထွက်စေပြီး နူးညံ့တဲ့ အသားအရေကို ထိခိုက်စေနိုင်တာကြောင့်ပါ။ ဒါကြောင့် ကလေးငယ်ကို ချည်သား၊ဖလန်ထည် အင်္ကျီလက်ရှည်ဘောင်းဘီရှည်လေးတွေ ဝတ်ဆင်ပေးပါ။

အစိုဓါတ်ထိန်းခရင်မ်တစ်ခုခုလိမ်းပေးပါ -ဆောင်းရာသီရဲ့ခြောက်သွေ့မှုကို အံတုဖို့အတွက် ကလေးကို အနံ့မပါတဲ့ အစိုဓါတ်ထိန်းခရမ်တစ်ခုခုလိမ်းပေးဖို့သတိရပါ။ တစ်နေ့မှာ အနည်းဆုံး ၃ ကြိမ်လောက်တော့ ကလေးကို အစိုဓါတ်ထိန်းခရင်မ်လူးပေးပါ။ သံလွင်ဆီ၊အုန်းဆီလိုမျိုး သဘာဝအဆီတစ်ခုခုကိုလူးပေးလို့လည်းရပါတယ်။

ရေအကြာကြီးမချိုးပေးပါနဲ့ – ကလေးလေးတွေကရေချိုးရတာကိုကြိုက်တယ်ဆိုပေမယ့်ဆောင်းရာသီလိုအေးတဲ့ရာသီမှာရေအကြာကြီးမချိုးမိဖို့ သတိထားပါ။ ကလေးကိုဘေဘီလေးတွေအတွက် သီးသန့်ထုတ်ထားတဲ့ ဆပ်ပြာအပျော့စားလေးကိုသုံးပြီး ၅ မိနစ်လောက်ပဲချိုးပေးလိုက်ပါ။ ကလေးကိုရေချိုးတဲ့အခါ ဆပ်ပြာတုံးထက် ဆပ်ပြာရည်နဲ့ချိုးပေးတာက ပိုထိရောက်ပါတယ်။

နေလောင်ကာခရင်မ်လူးပေးပါ –ဆောင်းရာသီကအေးမြပြီးနေရောင်သိပ်မမြင်ရဘူးဆိုပေမယ့် ကလေးအရေပြားကိုနေရောင်ခြည်နဲ့ထိတွေ့နိုင်ပါတယ်။ ဒါကြောင့်ဆောင်းရာသီ မှာဘေဘီလေးတွေရဲ့အသားအရေထိန်းသိမ်းမှုကိုလုပ်တဲ့အခါနေလောင်ကာခရင်မ်လူးပေးဖို့ မမေ့ပါနဲ့။

ဘေဘီ Lotion၊ဘေဘီ Cream လူးပေးပါ – အခုနောက်ပိုင်းဈေးကွက်ထဲမှာဘေဘီလေးတွေအတွက်မွေးကင်းစကစပြီး လူးနိုင်တဲ့ Baby Lotion နဲ့ Baby Creamတွေတော်တော်များများရှိနေပါပြီ။ ဒါကြောင့်ဘေဘီလေးတွေရဲ့ အသားအရေနဲ့ကိုက်ညီမယ့် Lotion နဲ့ Creamတွေနဲ့သေချာဂရုစိုက်ရွေးချယ်ပြီး ကလေးငယ်ရဲ့ အသားအရေကိုလူးပေးလိုက်ပါ။ Baby Lotion နဲ့ Baby Cream တို့ကို ကလေးငယ်ကိုရေချိုးပေးပြီးတိုင်းလူးပေးမယ်ဆိုရင်ဆောင်းအအေးဒဏ်ကြောင့် အသားအရေခြောက်သွေ့တာကို ကာကွယ်နိုင်မှာဖြစ်သလို အရေပြားခြောက်သွေ့မှုကြောင့်ဖြစ်တဲ့နောက်ဆက်တွဲပြဿနာတွေကိုပါ ကင်းဝေးစေနိုင်မှာပါ။

အသားအရေကို အာဟာရဖြည့်ပေးနိုင်မယ့် Baby Oil –ကလေးငယ်လေးတွေကိုမွေးကင်းစအရွယ်ကနေစပြီး အသားအရေမှာ လိုအပ်တဲ့ အာဟာရဓါတ်တွေပြည့်ဝပြီး ကျန်းမာနေစေဖို့အတွက် Baby Oilလေးကို အသုံးပြုပေးသင့်ပါတယ်။ Baby Oil အသုံးပြုတဲ့အခါ အဆီကို အရေပြားထဲစိမ့်ဝင်သွားအောင်လူးပေးပြီး လက်ချောင်းထိပ်လေးနဲ့ အသာအယာနှိပ်နယ်ပေးလိုက်ပါ။ ဒါမှ အရေပြားက အဆီတွေကို စုပ်ယူနိုင်ပြီး အရေပြားကျန်းမာနေအောင်လုပ်ဆောင်ပေးနိုင်မှာဖြစ်ပါတယ်။

ရေနွေးနဲ့ရေမချိုးပေးပါနဲ့ –ကလေးလေးတွေရဲ့ အရေပြားက ထိခိုက်တုံ့ပြန်လွယ်တာကြောင့်ဆောင်းရာသီမှာ ပိုမိုခြောက်သွေ့လွယ်ပါတယ်။ မိဘတွေအနေနဲ့ ကဆောင်းရာသီအအေးဒဏ်ကြောင့် ကလေးငယ်ဖျားမှာကို စိုးရိမ်ပြီးရေနွေးနဲ့ရေချိုးပေးတာမျိုးဖြစ်နိုင်ပါတယ်။ဆောင်းရာသီကအေးပေမယ့်ရေနွေးနဲ့ရေမချိုးပေးပါနဲ့။ရေနွေးကပူလေလေ ကလေးအသားအရေကခြောက်သွေ့နိုင်ခြေများလေလေပါ။ ဒါကြောင့် ကလေးကို အရေပြားခြောက်သွေ့အဖတ်လန်တာမျိုးမဖြစ်စေဖို့အတွက်ဆောင်းရာသီလိုမျိုးအေးမြခြောက်သွေ့တဲ့ရာသီမျိုးမှာဘေဘီလေးတွေကိုရေနွေးနဲ့ရေမချိုးပေးပါနဲ့။