လက်ရှိမြန်မာနိုင်ငံမှာ Covid-19 ကူးစက်ခံလူနာအရေအတွက် နေ့စဉ်များပြားလာတာနှင့်အမျှ ပိုမိုကြောက်ရွံလာသူများရှိသလို ယခင်ကလောက် အာရုံမထားတော့ပဲ ပေါ့ပေါ့ဆဆနေလာသူများလည်း ရှိနေပါတယ်။ မည်သို့ပင်ဖြစ်စေ မိမိတွင် ကူးစက်တဲ့အခါ မိသားစုဝင်များနှင့် မိတ်ဆွေတွေကိုပါ ကူးစက်နိုင်ပြီး နောက်ဆက်တွဲကိစ္စရပ်များစွာကြောင့်လည်း စိတ်ရှုပ်ထွေးရမှာမို့ မပေါ့ဆဘဲ နေ့စဉ်လိုက်နာသင့်တာတွေကို လိုက်နာဖို့ လိုအပ်ပါတယ်။ ဒီဆောင်းပါးလေးမှာတော့ WHO Guidelines တွေအရ ကျွန်မတို့နေ့စဉ်လိုက်နာရမယ့် အခြေခံအချက်အလက်လေးတွေကို ဖော်ပြပေးလိုက်ပါတယ်။

Covid-19 ကာကွယ်ဖို့အတွက် WHOမှ ချမှတ်ထားသော နေ့စဉ်လိုက်နာရမည့်အချက်များ

လက်ကို ဆပ်ပြာနှင့် ရေ အသုံးပြုပြီး အနည်းဆုံး စက္ကန့်၂၀ကြာအောင် ဆေးကြောပါ။ ရေနှင့်ဆပ်ပြာ မရရှိပါက အယ်ကိုဟော ၆၀ရာနှုန်းအနည်းဆုံးပါတဲ့ လက်သန့်ဆေးရည်ဖြင့် ဆေးကြောပေးပါ။ လက်ကိုမကြာခဏ သန့်စင်ပေးဖို့ အရေးကြီးပါတယ်။

အိမ်ပြင်သို့ မဖြစ်မနေ အခြေအနေမှထွက်သင့်ပြီး အပြင်ဘက်ရှိ လူများနှင့် အနည်းဆုံး၆ပေအကွာတွင် နေပါ။ ဒီလိုနေခိုင်းရခြင်းကတော့ ရောဂါရှိသူတစ်ဦး ချောင်းဆိုးခြင်း၊ နှာချေခြင်းနှင့် စကားပြောခြင်းပြုလုပ်တဲ့အခါ သူ့ရဲ့ ပါးစပ်နှင့်နှာခေါင်းများဆီက အမှုန်အမွှားတွေ အပြင်ဘက်သို့ ပျံ့နှံ့လာပါတယ်။ ထိုအမှုန်အမွားတွေမှာ ဗိုင်းရပ်စ်တွေ ပါဝင်နေပြီး သင့်အနေနှင့် အနီးကပ်အနေအထားတွင်ရှိနေမယ်ဆိုရင်တော့ သင့်ဆီဗိုင်းရပ်စ်တွေရောက်ရှိလာမှာ ဖြစ်ပါတယ်။

လူအများ စုဝေးသော နေရာများသို့ သွားရောက်ခြင်း လုံးဝမပြုပါနှင့်။

အိမ်ပြင်ထွက်ရသည့်အခါတိုင်း surgical maskကို မဖြစ်မနေဝတ်ဆင်ပါ။ လိုအပ်ပါက face shieldကိုပါ အသုံးပြုပါ။

လက်ဖြင့် မျက်နှာ၊ နှာခေါင်းနှင့် ပါးစပ်များကို ထိတွေ့ခြင်း လုံးဝမပြုလုပ်သင့်ပါ။ လက်ဖြင့် ဗိုင်းရပ်စ်နှင့် ထိတွေ့ထားသောနေရာတွေကို ကိုင်မိပါက ဗိုင်းရပ်စ်တွေ လက်ကနေတဆင့် ကိုယ်ထဲသို့ဝင်ရောက်နိုင်လို့ပဲဖြစ်ပါတယ်။

နှာချေ၊ ချောင်းဆိုးပါက ပါးစပ်နှင့် နှာခေါင်းကို တံခေါက်ကွေး သို့မဟုတ် တစ်ရှူးစဖြင့် လုံအောင်အုပ်ပါ။ထို့နောက် တစ်ရှူးကို ချက်ချင်း အမှိုက်ပုံးထဲ ထည့်ပါ။

သင့်အနေနှင့် ချောင်းဆိုးခြင်း၊ ခေါင်းကိုက်ခြင်း၊ ကိုယ်ပူခြင်းစတဲ့ အသေးစားလက္ခဏာများကို ခံစားရပါက မိမိအခန်းထဲတွင် သီးသန့်နေထိုင်ပါ။ အိမ်ရှိ မိသားစုဝင်များနှင့် လုံးဝမထိတွေ့ပါနှင့်။

Hand Sanitizerကို နည်းမှန်လမ်းမှန်အသုံးပြုနည်း

Hand sanitizerဘူးများကို ကလေးများ လက်လှမ်းမမှီသောနေရာတွင် ထားပေးပါ။ ကလေးများကိုလည်း မှန်ကန်စွာ အသုံးပြုတတ်အောင် သင်ပြပေးပါ။လူကြီးရှေ့တွင်သာ အသုံးပြုပါစေ။
အသုံးပြုတဲ့အခါမှာ ကျပ်စေ့ပမာဏကိုသာ လက်ထဲသို့ထည့်ပါ။ ပမာဏအများကြီး မလိုအပ်ပါဘူး။
Hand sanitizerအသုံးပြုပြီးပြီးချင်း မျက်စိ၊ ပါးစပ်နှင့် နှာခေါင်းများကို ချက်ချင်းထိတွေ့တာမျိူး မလုပ်ပါနှင့်။
မီးများမကိုင်မီနှင့် ဟင်းမချက်မီ hand sanitizerကို တတ်နိုင်သမျှ အသုံးမပြုပါနှင့်။
လက်ကို ရေနှင့်ဆပ်ပြာဖြင့် စင်ကြယ်အောင် ဆေးကြောခြင်းကသာ Covid-19ကို ကာကွယ်ဖို့ အကောင်းဆုံးနည်းလမ်းဖြစ်ပြီး ဆပ်ပြာမရရှိမှသာလျှင် hand sanitizer ကို အသုံးပြုကြဖို့လည်း တိုက်တွန်းလိုက်ပါတယ်။

ရေးသားသူ – Dr Rose

[covid_19]

Covid-19 ကာကွယ်ဖို့အတွက် WHOမှ ချမှတ်ထားသော နေ့စဉ်လိုက်နာရမည့်အချက်များ