စိုစွတ်နေတဲ့ မိုးရာသီမှာ အနာကိုဘယ်လိုဂရုစိုက်မလဲ

အနာဆိုတာ ထိခိုက်ဒဏ်ရာတစ်မျိုးပါ။မြင်သာအောင်ပြောပြရရင် အပေါ်ယံအရေပြားပေါက်ပြဲသွားတာပေါ့။ အပေါ်ယံအရေပြားက ခန္ဓါကိုယ်ရဲ့ ခံတပ်လေ။ ခံတပ်ပျက်သွားပြီဆိုရင် အန္တရာယ်ကျရောက်ဖို့ကလွယ်သွားပြီပေါ့။ အခုလိုမိုးရာသီမှာဆိုရင် စိုစိုစွတ်စွတ်ရှိတော့ ပိုးမွှားတွေပေါက်ဖွားဖို့အတွက်အခွင့်ကောင်းပါ။ ဒီတော့ အပေါ်ယံအရေပြားပေါက်ပြဲမှုကနေတဆင့်ရောဂါပိုးတွေအလွယ်တကူဝင်ရောက်ပြီး အနာရင်းတာ၊ ပိုးဝင်တာနဲ့နောက်ဆက်တွဲပြဿနာတွေဖြစ်ဖို့တော်တော်လေးလွယ်ကူသွားနိုင်တဲ့အနေအထားပေါ့။ မိုးရာသီမှာ အနာကိုသေသေချာချာဂရုစိုက်ဖို့လိုပါမယ်။ မိုးရေနဲ့အတူ ဘက်တီးရီးယားတွေက မဖိတ်ခေါ်ဘဲ ပါလာတတ်တာကြောင့်ပါ။

မိုးရာသီမှာခြေထောက်လိုမျိုးနေရာမှာ အနာဖြစ်လို့ကတော့ ဘက်တီးရီးယားတွေက တံခါးမရှိ ဓါးမရှိဝင်ရောက်ပြီး ခန္ဓါကိုယ်ကို ထိခိုက်မှုတွေဖြစ်စေမှာပါ။ ဒါကြောင့် စိုစွတ်တဲ့မိုးရာသီမှာ အနာကိုသေချာဂရုစိုက်ဖို့လိုပါမယ်။

မိုးရာသီမှာ အနာကို ဒီလိုဂရုစိုက်ပါ

အနာကိုမိုးရေနဲ့ မထိတွေ့ပါစေနဲ့– မိုးရေမှာရောဂါပိုးတွေပါဝင်နေတတ်တာကြောင့် အပြင်ထွက်ခါနီးတိုင်း အနာကို ပလာစတာကပ်တာမျိုးဖြစ်ဖြစ် ပတ်တီးစည်းတာမျိုးဖြစ်ဖြစ်လုပ်သွားပေးပါ။ အနာကို မိုးရေနဲ့တိုက်ရိုက်မထိတွေ့အောင်ကာကွယ်ပါ။ အနာကို မိုးရေနဲ့ထိတွေ့စေမှုကပြင်းထန်တဲ့ရောဂါပိုးကူးစက်မှုကိုဖြစ်စေနိုင်တာကြောင့်ပါ။

အနာမှာ ညစ်ပေနေတဲ့အရာတွေပေကျံနေလားဆိုတာကို စစ်ဆေးပါ – အပြင်ကနေ မိုးစိုစိုနဲ့ပြန်လာတဲ့အခါ အနာမှာ ညစ်ပေတဲ့အရာတွေပေကျံကပ်ပါလာလားဆိုတာကိုသေချာစစ်ဆေးပါ။ ပေကျံနေတယ်ဆိုရင် ဖယ်ရှားသန့်စင်ပါ။ ဒီလိုလုပ်ပေးတာက အနာကို ပိုးဝင်ကူးစက်တာမျိုးမဖြစ်အောင်ကာကွယ်နိုင်မှာပါ။

အနာကို သန့်ရှင်းပေးပါ – အနာကို သန့်စင်ဖို့ကမဖြစ်မနေလုပ်သင့်တဲ့အချက်တစ်ခုပါ။ အပြင်ကပြန်လာတဲ့အခါတိုင်းမှာခြေလက်တွေကို သန့်စင်အောင်ဆေးကြောပေးပါ။ပြီးရင်တော့ အနာကို သန့်ရှင်းရေးလုပ်ပါ။ အနာတဝိုက်ကို ဆပ်ပြာနဲ့ရေသန့်သန့်လေးသုံးပြီး သေချာဆေးကြောသန့်စင်ပေးပါ။ရေနွေးခပ်နွေးနွေးလေးကို တဘက်စသန့်သန့်လေးနဲ့ယူပြီး အနာပေါ်နဲ့ အနာတဝိုက်ကိုဆေးကြောသန့်စင်ပေးတာက ထိရောက်တဲ့နည်းလမ်းတစ်ခုပါ။

အနာကိုခြောက်သွေ့အောင်ထားပေးပါ – အနာကို သန့်စင်ဆေးကြောပြီးတဲ့အခါ အနာကိုခြောက်သွေ့အောင်ထားပေးဖို့ မမေ့ပါနဲ့။ စိုစွတ်တဲ့အခြေအနေက ဘက်တီးရီးယားတွေကို အလွယ်တကူပေါက်ဖွားစေနိုင်တာကြောင့်ပါ။ ဒီလိုလုပ်ပေးတာက အရေပြားအတွင်းပိုင်းကိုရောဂါပိုးတွေမဝင်ရောက်နိုင်အောင် ထိထိရောက်ရောက်ကာကွယ်ပေးနိုင်ပါတယ်။

Antibiotic Cream လူးပေးပါ -Antibiotic Creamတွေက အနာကို အစိုဓါတ်ရှိနေအောင် ထိန်းထားပေးနိုင်ရုံတင်မဟုတ်ဘဲ ပိုးဝင်ကူးစက်တာမျိုးမဖြစ်အောင်ကာကွယ်ပေးနိုင်ပါတယ်။ ဒါကြောင့် အနာကို သန့်စင်ပြီးခြောက်သွေ့အောင်လုပ်ပြီးတဲ့အခါAntibiotic Cream ခပ်ပါးပါးလေးလူးပေးပါ။ အချို့Antibiotic Creamတွေမှာ အရေပြားဓါတ်မတည့်စေနိုင်တဲ့ ပစ္စည်းတွေပါဝင်တတ်တာကြောင့် အရေပြားမှာဆေးလူးပြီးလို့ ယားယံတာ၊ အဖုအပိမ့်ထွက်တာမျိုးဖြစ်လာမယ်ဆိုရင် ဆက်မလူးဖို့ ပြောပါရစေ။

အနာကို ပလာစတာကပ်ပါ၊ ပတ်တီးစည်းပါ – အနာကို ပလာစတာကပ်ပေးတာ၊ ပတ်တီးစည်းထားတာတွေက အနာကို ပိုးမဝင်အောင်ထိထိရောက်ရောက်ကာကွယ်ပေးနိုင်ပါတယ်။ ဒါကြောင့် အနာကို အပြင်သွားခါနီးတိုင်းရော အိမ်မှာနေရင်းရော ပလာစတာကပ်တာ၊ ပတ်တီးစည်းတာမျိုးတွေ လုပ်ပေးဖို့မမေ့ပါနဲ့။ အခုလိုမိုးရာသီမှာတော့ရေစိုခံ Hansaplast ကအဆင်ပြေဆုံးဖြစ်မှာပါ။

အနာကို ကုတ်ဖဲ့တာမျိုးမလုပ်ပါနဲ့ – အနာကို ကုတ်ဖဲ့တာ၊ အနာဖေးကိုခွာထုတ်တာမျိုးမလုပ်ပါနဲ့။ အနာမကျက်ခင်မှာ ကုတ်ဖဲ့မိတဲ့အခါ အနာပေါက်ပြန်ဖြစ်သွားပြီးရောဂါပိုးတွေဝင်ရောက်ကူးစက်တာမျိုးဖြစ်နိုင်တာကြောင့်ပါ။ အနာဖေးကိုခွာတာက လက်သည်းကြားထဲကပိုးတွေအနာထဲကိုဝင်ရောက်နိုင်သလို ပတ်ဝန်းကျင်က ဘက်တီးရီးယားတွေလည်း အနာထဲကို အလွယ်တကူဝင်ရောက်နိုင်ပါတယ်။ အနာကျက်ဖြစ်စဉ်ကိုနှောင့်နှေးစေနိုင်ပါတယ်။

ပလာစတာလဲပေးပါ – အနာမှာကပ်ထားတဲ့ ပလာစတာတွေ၊ ပတ်တီးတွေညစ်ပတ်နေရင်၊ရေစိုနေရင် ချက်ချင်းလဲပေးပါ။ ဒီလိုလုပ်တာကလည်း အနာပိုးမဝင်အောင်ကာကွယ်ရာရောက်ပါတယ်။

အပြင်သွားမယ့်အခါတိုင်း အနာကို ပလာစတာကပ်တာ၊ ပတ်တီးစည်းတာတွေလုပ်သွားပေးပါ။ ဒီလိုလုပ်ပေးတာက အနာထဲကိုပြင်ပကအရာတွေနဲ့ ဘက်တီးရီးယားတွေမဝင်ရောက်အောင်ကာကွယ်ပေးနိုင်ပါတယ်။ မိုးရာသီမှာ အနာကို အရက်ပြန်လိုမျိုး ပိုးမွှားတွေကိုသေစေနိုင်တဲ့အရာမျိုးနဲ့ သန့်စင်ဆေးကြောပေးပါ။ အနာကို မိုးရေနဲ့ဆေးကြောတာမျိုးမလုပ်ဘဲရေသန့်သန့်လေးနဲ့ပဲဆေးကြောပေးပါ။ အနာကို ကာကွယ်ထားခြင်းမရှိဘဲ အပြင်မထွက်ပါနဲ့။

အနာရင်းနေလား စစ်ဆေးဖို့ သတိရပါ – တစ်နေ့တစ်ကြိမ်တော့ အနာကို မဖြစ်မနေစစ်ဆေးပေးပါ။ အနာကိုစစ်ဆေးတဲ့အခါ

• အနာတဝိုက်နီမြန်းရောင်ရမ်းနေလား၊
• အနာတဝိုက်မှာ နာကျင်နေလား၊
• အနာကနေပြည်လိုမျိုးအရည်တွေထွက်နေလား၊
• အဖျားရှိနေတာလား ဆိုတာတွေကိုသေချာစစ်ဆေးပေးပါ။

Hello Health Group သည်ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။