ကိုယ်အလေးချိန် မြင့်တက်စေနိုင်သောအသီးအနှံ ၅ မျိုး

အသီးအနှံများကိုလေ့လာကြည့်လျှင် ကျန်းမာရေးအတွက် အကျိုးပြုသည်ကိုတွေ့ရမည်။ အရသာရှိရုံမျှမကဗီတာမင်နှင့်အခြားသောအာဟာရဓါတ်များကိုလည်းပေးစွမ်းနိုင်ပါသည်။ အသီးအနှံများကိုစုံလင်စွာစားသုံးပေးခြင်းဖြင့်ခန္ဓါကိုယ်ကိုကျန်းမာကြံ့ခိုင်စေပြီးခန္ဓါကိုယ်၏လုပ်ငန်းများကိုလည်းပိုမိုကောင်းမွန်အောင် ပြုလုပ်စေနိုင်ပါသည်။ သို့သော်လည်းအသီးအနှံအားလုံးတိုင်းမှာမူသင်၏ ခန္ဓါကိုယ်ကိုလှပစေနိုင်မည် မဟုတ်ပါ။ လွန်ကဲစွာစားသုံးပါကကိုယ်အလေးချိန် တိုးစေနိုင်သောအာနိသင်လည်းရှိပါသည်။

ငှက်ပျောသီး

မနက်စာအဖြစ် နှစ်သက်စွာပင် ငှက်ပျောသီးကိုစားလေ့ရှိသည်။ အရသာရှိပြီး ဗိုက်ဝစသည့် အသီးကိုမည်သူကမနှစ်သက်ဘဲနေလိမ့်မည်နည်း။ သို့သော် ငှက်ပျောသီးတွင် ပါဝင်သော အမျှင်ဓါတ် ၊ ပိုတက်စီယမ် နှင့် ဗီတာမင်စီတို့က ကယ်လိုရီ (၁၈၀) အထိရှိသည်ကိုတော့ သတိပြုရပေမည်။ ငှက်ပျောသီးကိုများပြားစွာစားသုံးလျှင် ကိုယ်အလေးချိန် ကျိန်းသေပေါက် တိုးလာမည် ဖြစ်သည်။

ချယ်ရီသီး

အရည်ရွှမ်း၍ အရသာရှိသော ချယ်ရီသီးကိုမည်သူမျှ ငြင်းမည် မဟုတ်ပေ။ လူအများစုက နှစ်သက်စွာပင် အခြားအသီးများထက် ပို၍ စားသုံးတက်ကြသည်။ ချယ်ရီသီးတွင် ပါဝင်သော ပိုတက်စီယမ်ဓါတ်သည် ခန္ဓါကိုယ်တွင်းမှပိုလျှံသောဆိုဒီယမ်ဓါတ်ကိုစွန့်ထုတ်စေခြင်းဖြင့် သွေးပေါင်ချိန်ကိုလျော့ကျစေနိုင်ပါသည်။ ထို့ကြောင့်ခန္ဓါကိုယ်အတွက် အကျိုးမရှိဟု ငြင်းရန်ခက်ပါသည်။ သို့သော်လည်းချယ်ရီသီးတွင် သကြားဓါတ်များပြားစွာ ပါဝင်ခြင်းကကိုယ်တွင်းသကြားဓါတ်ကိုတိုးမြင့်စေနိုင်ပါသည်။

ထောပတ်သီး

ထောပတ်သီးသည် နို့ကဲ့သို့ အဆီဓါတ်ပါသော အခြားအစားအစာဖြစ်သည်။ ကိုယ်အလေးချိန် မတက်လိုပါကသင့်တော်ရုံသာစားပေးသင့်ပါသည်။ခန္ဓါကိုယ်အတွက် အကျိုးပြုသောမိုနိုအဆီများ ပါဝင်သော်လည်း ကယ်လိုရီဓါတ်လည်းများပြားစွာ ပါဝင်သည့် အသီးဖြစ်ပါသည်။

သဖန်းသီး

သဖန်းသီးတွင် အမျှင်ဓါတ်နှင့် ပိုတက်စီယမ်ဓါတ် ကြွယ်ဝစွာ ပါဝင်သည်။ ကျန်းမာရေးအတွက်ကောင်းသည်ဟုယူဆပြီးအလွန်အမင်းစားသုံးပါကကျန်းမာရေးအတွက်မသင့်တော်သလိုခန္ဓါကိုယ်လည်း ဝဖြိုးလာစေနိုင်သည်။ သဖန်းသီးတွင် သကြားဓါတ်များပြားစွာပါဝင်သည့်အတွက် ကိုယ်အလေးချိန် လျှော့ချလိုပါကသင်၏အစားအစာထဲတွင် ထည့်သွင်းစားသုံးခြင်းမပြုသင့်ပါ။

သရက်သီး

သရက်သီးသည် အမျှင်ဓါတ်နှင့် ဗီတာမင်စီတို့ များစွာပါဝင်သော အသီးဖြစ်သည်။ သို့သော် သကြားဓါတ်လည်း များစွာပါဝင်သည်ကို သတိပြုသင့်သည်။ ထိုမှတစ်ဆင့် သွေးတွင်းသကြားဓါတ်ကို မြင့်တက်စေနိုင်သည်။ ထို့ကြောင့် အသီးအလုံးလိုက်စားခြင်းထက် အချိုတည်ရုံ အနည်းငယ်သာစားသုံးခြင်းကပို၍သင့်တော်ပါသည်။