ကိုယ်ခံအားစနစ်ကို ကောင်းမွန်စေမယ့် အစားအသောက်တွေ

လူတစ်ယောက်ကျန်းမာဖို့အတွက် ကိုယ်ခံအားစနစ်ကတော်တော်လေးအရေးပါပါတယ်။ ကိုယ်ခံအားစနစ်ကောင်းဖို့ဆိုတာက အနေအထိုင် အစားအသောက်ပုံစံကို ဆင်ဆင်ခြင်ခြင်နေထိုင်ပေးပြီးမွေးမြူလို့ရပါတယ်။ ဒီတစ်ခေါက်တော့ ခန္ဓာကိုယ်ကျန်းမာဖို့ အရေးပါတဲ့ ကိုယ်ခံအားကောင်းစေဖို့အတွက် ဘာတွေစားသောက်ရမလဲဆိုတာကိုပြောပြပေးပါရစေ။

ကိုယ်ခံအားကောင်းဖို့ ဘာတွေစားမလဲ

(၁) ဗီတာမင် C ပါတဲ့ အသီးတွေ

အချဉ်အရသာရှိတဲ့ သံပုရာသီး၊ လိမ္မော်သီး၊ရှောက်ချိုသီးလိုမျိုး အသီးတွေက ဗီတာမင် C ကြွယ်ဝစွာပါဝင်ကြပါတယ်။ ဗီတာမင် C ကခန္ဓာကိုယ်ရဲ့သွေးဖြူဥဆဲလ်တွေထုတ်လုပ်မှုကို တိုးတက်စေသလို ကူးစက်ရောဂါပိုးတွေကိုလည်း တိုက်ထုတ်ပေးနိုင်ပါတယ်။ ဒါကြောင့် ခန္ဓာကိုယ်ရဲ့ ကိုယ်ခံအားစနစ်ကောင်းမွန်စေဖို့အတွက် ဗီတာမင် C ပါဝင်တဲ့ အသီးအနှံတွေစားပေးပါ။

(၂) ချင်း

ချင်းကလည်း ဗီတာမင် C လိုမျိုး အအေးမိဖျားနာတာတွေမဖြစ်အောင် ကာကွယ်ပေးနိုင်ပါတယ်။ ဖျားနာနေတဲ့အခါ ချင်းကို စွပ်ပြုတ်ထဲ ထည့်စားတာ၊ရေနွေးထဲထည့်ပြီးသောက်တာမျိုးလုပ်ပေးလို့ရပါတယ်။ ချင်းရဲ့ ကိုယ်ခံအားကိုကောင်းစေသလိုရောဂါတွေကိုလည်း သက်သာစေနိုင်ပါတယ်။

(၃) နနွင်း

နနွင်းကို ဟင်းချက်တဲ့အခါတော်တော်များများထည့်သုံးကြပါတယ်။ အဝါရောင်ရှိပြီး အရသာက နည်းနည်းတော့ သက်ပါတယ်။ ကျန်းမာရေးအတွက်တော့တော်တော်လေးအထောက်အကူပြုပေးတဲ့ စားစရာတစ်မျိုးပါ။ နနွင်းမှာပါတဲ့curcumin ကအဖျားကျစေနိုင်ပါတယ်၊ လို့လေ့လာမှုအရသိရပါတယ်။

(၄) ဟင်းနုနွယ်

ဗီတာမင် C၊beta-carotene နဲ့ ဓာတ်တိုးဆန့်ကျင်ပစ္စည်းတွေကြွယ်ဝစွာပါဝင်တဲ့ ကိုယ်ခံအားစနစ်ကို အထောက်အပံ့ပေးတဲ့ ဟင်းရွက်တစ်မျိုးပါ။ ဟင်းနုနွယ်ကနေရရှိတဲ့ အာဟာရဓာတ်တွေကိုပြည့်ပြည့်ဝဝရရှိချင်တယ်ဆိုရင်တော့ အရမ်းကျက်အောင် မကြော်ဘဲစားသုံးပေးလို့ရပါတယ်။ အခြားအစိမ်းရောင် အရွက်တွေကလည်း ကိုယ်ခံအားကိုကောင်းမွန်စေပါတယ်။

(၅) ပန်းဂေါ်ဖီစိမ်း

ပန်းဂေါ်ဖီစိမ်းမှာ ဗီတာမင် A၊ C နဲ့ E တို့ကြွယ်ဝစွာပါဝင်တာကြောင့် ကျန်းမာရေးနဲ့သင့်တော်တဲ့ စားစရာတစ်ခုပါ။ ဒါတွေတင်မကသေးပါဘူး။ ပန်းဂေါ်ဖီစိမ်းမှာ ဓာတ်တိုးဆန့်ကျင် အာနိသင်တွေလည်း ကြွယ်ဝစွာပါဝင်နေပါတယ်။

(၆) ဒိန်ချဉ်

ဒိန်ချဉ်ထဲမှာ ခန္ဓာကိုယ်ကို ကျန်းမာစေတဲ့ အာနိသင်တွေများစွာပါဝင်နေပါတယ်။ မကြာသေးခင်ကလေ့လာမှုအရ ဒိန်ချဉ်မှာပါတဲ့ ဓာတ်တွေက ကိုယ်ခံအားစနစ်ကိုကောင်းမွန်စေနိုင်တယ်လို့ တွေ့ရှိခဲ့ပါတယ်။ ဒိန်ချဉ်ကနေ ကိုယ်ခံအားစနစ်ကို တိုးတက်ကောင်းမွန်စေနိုင်တဲ့ ဗီတာမင် D ကိုရရှိနိုင်ပါတယ်။

(၇) အယ်လ်မွန်စေ့

ဗီတာမင် E ကလည်း ဗီတာမင် C လိုပဲ ခန္ဓာကိုယ်ရဲ့ ကိုယ်ခံအားစနစ်ကျန်းမာဖို့အတွက် အရေးပါပါတယ်။နေ့စဉ်စားသုံးတဲ့ အစားအစာထဲမှာ ဗီတာမင် E ပါဝင်အောင် စားသုံးပေးမယ်ဆိုရင် အရေပြားအပါအဝင် ခန္ဓာကိုယ်တစ်ခုလုံးကို ကျန်းမာနေစေမှာ အသေအချာပါ။

(၈) ကြက်သွန်ဖြူ

ကြက်သွန်ဖြူမှာ ဘက်တီးရီးယားတွေနဲ့ ကူးစက်ရောဂါတွေကို တိုက်ဖျက်ပေးနိုင်တဲ့allicin ပါဝင်နေပါတယ်။ ကြက်သွန်ဖြူ ပုံမှန်စားသုံးသူတွေက မစားသုံးသူတွေထက် အအေးမိဖျားနာနိုင်ခြေ ၂ ဆ ကနေ ၃ ဆလောက်အထိလျော့နည်းနေနိုင်တယ်၊ လို့လေ့လာမှု အရသိရပါတယ်။ တစ်ပတ်ကို ကြက်သွန်ဖြူ ၆ မွှာလောက်စားသုံးပေးမယ်ဆိုရင် အူမကြီးကင်ဆာဖြစ်နိုင်ခြေကို ၃၀ ရာခိုင်နှုန်းလျော့ကျစေနိုင်ပြီး အစာအိမ်ကင်ဆာဖြစ်နိုင်ခြေကို ၅၀ ရာခိုင်နှုန်းအထိလျှော့ချပေးနိုင်ပါတယ်။

(၉) သင်္ဘောသီး

သင်္ဘောသီးကလည်း ဗီတာမင် C ကြွယ်ဝစွာပါဝင်တဲ့ အသီးတစ်မျိုးပါ။ တစ်နေ့တာအတွက် လိုအပ်တဲ့ ဗီတာမင် Cပြည့်ဝစေဖို့အတွက်နေ့စဉ် သင်္ဘောသီးမှည့် တစ်စိတ်စားပေးပါ။ သင်္ဘောသီးမှာpapain လို့ခေါ်တဲ့ အစာခြေအင်ဇိုင်းတစ်ခုပါဝင်နေပါတယ်။ ဒီ အင်ဇိုင်းကရောင်ရမ်းမှုကိုလျော့ပါးသက်သာစေပါတယ်။ သင်္ဘောသီးမှာ ပိုတက်ဆီယမ်၊ ဗီတာမင် B၊ folate တို့လိုမျိုး ခန္ဓာကိုယ်အတွက် အကျိုးပြုတဲ့ အာဟာရဓာတ်တွေပါဝင်နေပါတယ်။

(၁၀) ကီဝီသီး

ကီဝီသီးကလည်း သင်္ဘောသီးလိုပဲfolate၊ ပိုတက်ဆီယမ်၊ ဗီတာမင် K နဲ့ ဗီတာမင် C တို့လိုမျိုး ခန္ဓာကိုယ်အတွက်အရေးပါတဲ့ အာဟာရဓါတ်တွေပါဝင်နေပါတယ်။ ဗီတာမင် C ကခန္ဓာကိုယ်ရဲ့သွေးဖြူဥဆဲလ်တွေကို တိုးပွားစေပြီး ကူးစက်ရောဂါတွေကို တိုက်ဖျက်ပေးပါတယ်။ ဒါတင်မကပါဘူ။ ကီဝီသီးမှာပါတဲ့ အခြားအာဟာရဓာတ်တွေက ခန္ဓာကိုယ်အစိတ်အပိုင်းတွေကိုကောင်းစွာအလုပ်လုပ်စေနိုင်ပါတယ်။