နွေပူပူမှာ သောက်ပေးသင့်တဲ့ ဖျော်ရည်လေးတွေ

ဟူး…… ပူလိုက်တာနော်။ အေးအေးလေးတစ်ခုလောက် သောက်ချင်တယ်။ အချိုရည်တွေလည်း မသောက်ချင်ဘူး။ သောက်လိုက်ရင် ရင်ထဲအေးသွားပြီး ခံတွင်းရှင်းစေတဲ့ ချိုချိုအေးအေးလေး သောက်ချင်တယ်ဆိုတဲ့ Hello ဆရာဝန်ပရိသတ်ကြီးများရှိလား။ ဒါဆိုရင်တော့ နွေပူပူမှာ ကျန်းမာရေးအတွက်လည်းအထောက်အကူပြု အရသာလည်းရှိတဲ့ ဖျော်ရည်လေးတွေ အကြောင်း ပြောပြမယ်နော်။

နွေရာသီမှာ ရင်အေးစေမယ့် သဘာဝ ဖျော်ရည်လေးတွေ

• သံပရာရည်

သွေးတိုးကျစေနိုင်သလို အမောလည်းပြေစေပါတယ်။ နွေအပူကြောင့် ခေါင်းမူးခေါင်းကိုက်ဖြစ်တာကိုပါ သက်သာစေမှာပါ။ သံပရာသီးစစ်စစ်လေးကို သကြား၊ဆား၊ သောက်ရေအေးအေးလေးနဲ့ ဖျော်လိုက်ရုံပါ။ ဗီတာမင် စီ ပါဝင်တာကြောင့် ကိုယ်ခံအားကောင်းစေမှာပါနော်။

• ဖရဲသီးဖျော်ရည်

နွေရာသီနဲ့ အသင့်တော်ဆုံး ဖျော်ရည်လေးတစ်ခုပေါ့။ ကိုယ်တွင်းအဆိပ်အတောက်တွေကိုတောင် ဖယ်ရှားပေးနိုင်ပါသေးတယ်နော်။ ဒါကြောင့် ဖရဲသီးကို ကြိတ်ခြေပြီး အေးအေးလေးသောက်ပေးနော်။ ဆီးချိုရှိသူတွေအတွက်လည်း သင့်တော်တဲ့ ဖျော်ရည်လေး တစ်ခုပါ။ ဆီးချိုရှိတယ်ဆိုရင်တော့ အချိုလျှော့ပေါ့နော်။

• သရက်သီးဖျော်ရည်

သရက်သီးမှည့်လေးကို ကြိတ်ခြေပြီး သစ်သီးဖျော်ရည်စစ်စစ်လေး သောက်ပေးတာကလည်း နွေရာသီနဲ့ သင့်တော်တဲ့ ဓာတ်စာတစ်ခုပါ။ အသားအရေကိုကျန်းမာစေသလို သွေးတွင်းကိုလက်စထရောကို ကျစေပြီး ကင်ဆာတိုက်ဖျက်ပေးနိုင်စွမ်းလည်းရှိပါတယ်။

• သင်္ဘောသီးဖျော်ရည်

ပင်မှည့်သင်္ဘောသီးစစ်စစ်လေးကို သကြားနည်းနည်း ဆားနည်းနည်းနဲ့ ခေါက်ဖျော်ပြီးသောက်ပေးတာက ရင်အေးစေသလို ဝမ်းမှန်စေဖို့လည်း အထောက်အကူပြုပါတယ်။ ကလေးကစလို့ လူကြီးတွေအထိ သောက်သုံးလို့ရပါတယ်နော်။

• လိမ္မော်သီးဖျော်ရည်

လိမ္မော်သီး လတ်လတ်ဆတ်ဆတ်လေးကို အရည်ညှစ်လို့သောက်သုံးပေးမယ်ဆိုရင် သွေးတိုးကျစေနိုင်သလို သွေးတွင်းကိုလက်စထရောကိုလည်း ကျစေမှာပါ။ ကိုယ်ခံအားလည်းကောင်းစေလို့ နွေပူပူမှာ အမောပြေစေမှာ အသေအချာပါနော်။

• ကြံရည်

နွေရာသီရဲ့ trademark တစ်ခုပါ။ ခန္ဓာကိုယ်ကို အင်အားတိုးစေနိုင်တာကြောင့် နွေရာသီမှာ ကြံရည်ထက်ကောင်းတဲ့ဖျော်ရည်က မရှိသလောက်ပါ။ ဓာတ်တိုးဆန့်ကျင်ပစ္စည်းတွေ၊ ကယ်လ်ဆီယမ်၊ မဂ္ဂနီဆီယမ်၊ ပိုတက်ဆီယမ်နဲ့ ဂလူးကို့စ်တို့ ကြွယ်ဝစွာပါဝင်တာကြောင့် ခန္ဓာကိုယ်ကို ရေဓာတ်ဖြည့်ပေးပြီး ကျန်းမာအောင်လုပ်ဆောင်ပေးနိုင်မှာပါနော်။

• အုန်းစိမ်းရည်

သဘာဝရဲ့ဖျော်ရည်စစ်စစ်တစ်ခုပါ။ နွေအပူဒဏ်ကြောင့် ဖြစ်တဲ့ရောဂါတော်တော်များများကို ကာကွယ်ပေးနိုင်ပါတယ်။ ကိုယ်ခံအားကို ကောင်းစေသလို အသားအရေကို ကြည်လင်စေမှာပါ။

• စတော်ဘယ်ရီဖျော်ရည်

အရသာလည်းရှိ၊ စိတ်ကျေနပ်မှုလည်းရစေတဲ့ နွေလယ်သောက်စရာလေးတစ်ခုပါနော်။ ဗီတာမင် စီ ကြွယ်ဝစွာပါဝင်သလို အမျှင်ဓာတ်နဲ့ ဓာတ်တိုးဆန့်ကျင်ပစ္စည်းတွေ ကြွယ်ဝစွာပါဝင်နေတာကြောင့် ကျန်းမာရေးအတွက် အထောက်အကူပြုပေးနိုင်မှာပါနော်။

• ခရမ်းချဉ်သီးဖျော်ရည်

နွေပူပူမှာ ခရမ်းချဉ်သီးဖျော်ရည်လေးသောက်ရတာကလည်း ခံတွင်းရှင်းပြီး ခေါင်းကြည်စေပါတယ်နော်။ အပူဒဏ်ကြောင့် မည်းသွားတဲ့ အသားအရေတွေအတွက်လည်း အားဖြည့်ပြီးသားဖြစ်တာပေါ့။ ရေဓာတ်ဖြည့်ပေးတဲ့အပြင် ကိုယ်တွင်းက အဆိပ်အတောက်တွေပါ ဖယ်ရှားပေးသေးတယ်ဆိုတော့ ဘယ်လောက်တောင် အဆင်ပြေလိုက်လဲနော်။