အဆီကျအားကစားမလုပ်ခင် စားမိတတ်တဲ့ အဆိုးဆုံးအရာများ

ခုနေခါ ဝိတ်ချတော့မယ်လို့ အာရုံပြုလိုက်တာနဲ့ခေါင်းထဲတန်းပေါ်တာက ဂျင်မ်သွားကစားမယ်၊ ဂျင်မ်ဝတ်စုံတွေပြေးဝယ်မယ်ဆိုတာပါပဲ။ အဆီကျလှပအောင် ကစားမယ်၊ ဓါတ်ဖမ်းမယ်၊ စိတ်အားတက်ကြွမှုတွေနဲ့ပေါ့။ အစားလည်းလျှော့ကြပါရဲ့။ ဒါပေမယ့် သတိမထားမိကြတာက ဂျင်မ်သွားနေလျက်နဲ့ အဆီချခြင်းကို အနှောင့်အယှက်ဖြစ်စေတဲ့ လုပ်ရပ်မှားတွေလုပ်မိနေတာပါပဲ။ တချို့က ဂျင်မ်သွားနေတာပဲ ပြန်လောင်ကျွမ်းမှာပါဆိုပြီး အစားတွေစားတယ်။ တချို့ကျတော့ အစားရှောင်ပါတယ်၊ ဒါပေမယ့် ရွေးစားလိုက်တာတွေလည်း မှားယွင်းနေတာ မသိကြပါဘူး။

ဒါဆို ဂျင်မ်မသွားခင် ၊ အားကစားမလုပ်ခင်မှာ ဘာတွေမစားသင့်ဘူးလဲ ကြည့်ရအောင်။

အားကစားမလုပ်ခင် စားမိတတ်တဲ့ အဆိုးဆုံးအရာများ

အမျှင်ဓါတ်များတဲ့ အသီးအရွက်တွေ

ခန္ဓါကိုယ်မှာ အမျှင်ဓါတ်ကိုလိုအပ်တာမှန်ပေမယ့် အားကစားမလုပ်ခင်တော့ မစားသင့်ပါဘူး။ ပန်းဂေါ်ဖီစိမ်း၊ဂေါ်ဖီပန်းတို့လို အမျှင်ဓါတ်များတဲ့ ဟင်းသီးဟင်းရွက်တွေက အစာကြေဖို့မလွယ်သလိုလေ့ကျင့်ခန်းလုပ်တဲ့အခါ အဆင်မပြေဖြစ်စေနိုင်ပါတယ်။ ဒါ့ကြောင့် အစာကြေလွယ်တာကို စားပါ။

အဆီများတဲ့ စားစရာတွေ

အဆီတွေအားလုံးက မကောင်းတာမဟုတ်ပါဘူး။ ကျန်းမာရေးကိုအကျိုးပြုတဲ့အဆီတွေရှိပါတယ်။ ဒါပေမယ့် အားကစားလုပ်ခါနီးဆိုရင်တော့ ဘယ်အဆီဖြစ်ဖြစ် မသင့်တော်ပါဘူး။ အဆီကိုခွန်အားလောင်စာအဖြစ် ပြောင်းလဲလောင်ကျွမ်းဖို့ ခန္ဓါကိုယ်က ချက်ချင်းအဆင်မပြေနိုင်တဲ့အတွက် စလှုပ်ရှားတာနဲ့ လူကပိုမောပန်းလွယ်နိုင်ပါတယ်။

ဒိန်ချဉ်

ဝိတ်ချတဲ့အချိန်မှာသောက်လေ့ရှိတဲ့ အာဟာရအစားအစာတစ်ခုပါ။ ဒါပေမယ့် ဒိန်ချဉ်ဖြစ်ရင်ပြီးရော ဆိုလို့တော့ အဆင်မပြေပါဘူး။ တချို့ဒိန်ချဉ်တွေမှာ အဆီပြည့်၊ အချိုများနေတာတွေရှိပါတယ်။ နို့ထွက်ပစ္စည်းတွေကိုကောင်းကောင်းအစာမကြေသေးဘဲ အားကစားလုပ်မယ်ဆို အဆင်မပြေဖြစ်စေပါလိမ့်မယ်။

အသီးဖျော်ရည်

ရေဓါတ်ဖြည့်ဖို့နဲ့ အာဟာရပြည့်ဖို့ နှစ်ချက်လုံးပြည့်စုံစေဖို့ သကြားမပါတဲ့ အသီးဖော်ျရည်စစ်စစ်တွေကို အားကိုးကြပါတယ်။ ဒါပေမယ့် လက်တွေ့မှာတော့ အဆင်မပြေဘူးနော်။ လှုပ်ရှားမှုအတွက်လိုအပ်တဲ့ ကာဗိုဟိုက်ဒရိတ်နဲ့ အရည်ဓါတ်ကိုရနိုင်ပေမယ့် အားကစားမလုပ်ခင်မှာသောက်ချလိုက်တာကတော့ သိပ်မကောင်းပါဘူး။ အသီးဖျော်ရည်တွေမှာ အမြန်ချေဖျက်လို့မလွယ်တဲ့fructose သကြားဓါတ်ပါဝင်ပြီး နဂိုက အူလမ်းကြောင်းလှုပ်ရှားမှုမူမမှန်တဲ့ IBSရောဂါလိုမျိုး အစာအိမ်အူလမ်းကြောင်းမကောင်းသူတွေမှာ ဗိုက်အောင့်တာ၊လေပွတာတွေဖြစ်စေနိုင်ပါတယ်။ လိမ္မော်သီးလိုဖျော်ရည်မျိုးက လန်းဆန်းအမောပြေစေတယ်ဆိုပေမယ့်လေ့ကျင့်ခန်းမလုပ်ခင် သို့မဟုတ်လေ့ကျင့်ခန်းလုပ်ပြီးတစ်နာရီနဲ့အထက် အချိန်ခွာပြီးသောက်သုံးတာအကောင်းဆုံးဖြစ်ပါတယ်။

အသင့်အမြန်စားတွေ

အချိန်လုပြီး ဂျင်မ်ကိုပြေးလာရတယ်၊ ဆိုင်မှာဝင်စားဖို့ကလည်း အချိန်ကြာနိုင်တယ်၊ ဝိတ်တက်မှာစိုးတယ် ဆိုတော့ အသင့်အမြန်စားလေးတွေ ဝယ်စားဖြစ်ကြပါတယ်။ ဘာတွေဖြစ်လာမလဲဆိုတော့ ဗိုက်ထဲမှာနေရခက်အောင်ပြည့်အင့်စေပြီး အဆီနဲ့အချိုဓါတ်တွေကြောင့် ကစားသမျှ သဲထဲရေသွန်ဖြစ်စေနိုင်ပါတယ်။

အားဖြည့်အချိုရည်

ဖျော်ရည်တွေထက်ဆိုးတာပေါ့။ လူကိုလန်းဆန်းစေနိုင်တယ်၊ အားပြည့်သလိုဖြစ်စေနိုင်တယ်ဆိုပေမယ့် ခန္ဓါကိုယ်ကို အထောက်အကူမပေးတဲ့အပြင် နှလုံးခုန်မြန်စေပြီးသွေးတိုးတက်စေနိုင်ပါတယ်။ အားကစားလုပ်တဲ့အခါ အားဖြည့်အချိုရည်ေတွကို လုံးဝဖြတ်ထားတာပိုကောင်းပါတယ်။

ဘာစားသင့်လဲ

စားနိုင်တာက ခွန်အားဖြည့်ပေးမယ့် ကာဗိုဟိုက်ဒရိတ်နဲ့ အသားအရေလျော့ရဲမသွားဖို့ ကြွက်သားတည်ဆောက်ပေးမယ့် ပရိုတင်းတို့ကိုပေါင်းစပ်ထားတဲ့ စားစရာတွေပဲကောင်းပါတယ်။ ငှက်ပျောသီး သို့မဟုတ် ခရက်ကာ၊ အစေ့အဆန်တွေ၊ ကြက်ဥကာကျက် တို့ကို စားလို့ရပါတယ်။

ဘယ်အချိန်မှာ စားရမလဲ

လေ့ကျင့်ခန်းမလုပ်ခင်စားမယ့် အစားအစာရွေးချယ်မှုက မှန်တယ်ပဲထား၊ စားတဲ့အချိန် လွဲမှားနေရင် အဆင်မပြေပါဘူး။ ကြွက်သားတည်ဆောက်ဖို့ အရေးကြီးတဲ့သွေးလည်ပတ်မှုနဲ့အောက်ဆီဂျင်ကို တခြားအစိတ်အပိုင်းတွေနဲ့အပြိုင် အစာခြေစနစ်အတွက်သုံးနေရပါလိမ့်မယ်။ တစ်ယောက်နဲ့တစ်ယောက် မတူကြဘူးဆိုပေမယ့် အများစုအတွက်တော့ ၁ နာရီကနေ ၃ နာရီလောက်ခွာထားတာကောင်းပါတယ်။

Hello Health Groupသည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပေးပါ။

မှ ဆေးပညာပိုင်းဆိုင်ရာ စစ်ဆေးထားပါသည်။Hello Sayarwon Panel

Written by Yun Sandi Nan Mon · 15/08/2022 တွင် အသစ်ဖြည့်စွက်ခဲ့သည်။