လူကြီးတွေ အာဟာရမချို့တဲ့အောင် ကာကွယ်နိုင်ဖို့

လူကြီးတွေ အာဟာရမချို့တဲ့အောင် ကာကွယ်နိုင်ဖို့

အာဟာရချို့တဲ့ခြင်းဟာ သက်ကြီးပိုင်းအရွယ်တွေအတွက် ဆိုးရွားတဲ့ကျန်းမာရေးပြဿနာတစ်ခု ဖြစ်တာကြောင့် ကိုယ်ချစ်ခင်ရတဲ့မိဘတွေကို အာဟာချို့တဲ့သူမဖြစ်ရအောင် ကာကွယ်ပေးဖို့အတွက် အာဟာရချို့တဲ့မှုလက္ခဏာတွေကိုသိထားသင့်ပါတယ်။

အာဟာရချို့တဲ့လာစေတဲ့အကြောင်းရင်း

အာဟာရချို့တဲ့မှုရဲ့အကြောင်းရင်းတွေကအမျိုးမျိုးရှိနိုင်ပါ တယ်။ တကယ်တော့ ရုပ်ပိုင်းဆိုင်ရာ၊ လူမှုရေးနဲ့ စိတ်ပိုင်းဆိုင်ရာပြဿနာတွေကြောင့်ပေါင်းစုပြီးတော့လည်း ဖြစ်စေတတ်ပါတယ်။ ဥပမာ-

ရောဂါအတွက်စိတ်ပူနေရတဲ့အခါမျိုး – လူကြီးတွေဟာ မှတ်ဉာဏ်ပြဿနာ၊ သွားကျန်းမာရေးပြဿနာတို့လို အကြောင်းအရာတွေကြောင့် အစာစားချင်စိတ်နည်းတာတွေဖြစ်လာတတ်ပါတယ်။ နာတာရှည်ရောဂါများ၊ သောက်သုံးနေရတဲ့ဆေးဝါးများ၊ မျိုချရခက်ခဲတာ၊ အာဟာရဓါတ်မစုပ်ယူနိုင်တာ၊ မကြာသေးခင်ကမှ ဆေးရုံတက်ထားတာ၊ အနံ့ခံနိုင်စွမ်း အာရုံခံနိုင်စွမ်းအားနည်းတာစတဲ့တခြားအချက်တွေလည်းပါဝင်ပါတယ်။

စားသောက်တဲ့အာဟာရကိုကန့်သတ်ဆင်ခြင်တာ – ဆား၊အဆီ၊ ပရိုတင်း ဒါမှမဟုတ် သကြားတို့ိလို ဆင်ခြင်စားသောက်ရမယ့်ကန့်သတ်ချက်တွေထားရှိတာက တချို့ဆေးဝါးကုထုံးတွေမှာ အကူအညီဖြစ်စေ ပေမယ့် အာဟာရမလုံလောက်မှုလည်းဖြစ်စေနိုင်ပါတယ်။

ဝင်ငွေအကန့်အသတ်ရှိတာ – တချို့သက်ကြီးပိုင်းတွေမှာငွေကြေးမပြည့်စုံတာကြောင့်၊ အထူးသဖြင့် အကုန်အကျများတဲ့ဆေးဝါးတွေ သောက်သုံးနေရသူတွေမှာ အာဟာရပြည့်အောင် အစုံအစိ ဝယ်မစားနိုင်ကြ ပါဘူး။

လူမှုဆက်ဆံရေးနည်းပါးလာ – တစ်ယောက်တည်းထမင်းစားရတဲ့ သက်ကြီးပိုင်းအရွယ်တွေဟာ အရင်ကလောက်ထမင်းစားမဝင်တော့ဘဲ ချက်ပြုတ်ဖို့၊စားဖို့အတွက် စိတ်ဝင်စားမှုနည်းသွားတတ်ပါတယ်။

စိတ်ကျခြင်း – ဝမ်းနည်းစိတ်၊ အထီးကျန်မှု၊ ကျန်းမာရေးမကောင်းခြင်း၊ သွားလာလှုပ်ရှားမစွမ်းတော့ခြင်းနဲ့ တခြားအချက်တွေက စိတ်ကျဝေဒနာဖြစ်လာစေပြီး အစာစားချင်စိတ်လျော့နည်းစေပါတယ်။

အရက်သောက်ခြင်း – အရက်သောက်တာများရင် အစာချေဖျက်မှုနဲ့အာဟာရဓါတ်စုပ်ယူမှုတို့မှာ ပြဿနာဖြစ်စေနိုင်ပါတယ်။ အစာမစားဘဲ အရက်ကိုအစားထိုးသောက်နေသူတွေမှာတော့ အာဟာရလုံးဝဆုံးရှုံးရပါတယ်။

အာဟာရချို့တဲ့မှုကြောင့်ဖြစ်လာစေနိုင်တဲ့ပြဿနာများ

သက်ကြီးပိုင်းအရွယ်တွေမှာအာဟာရချို့တဲ့လာရင် ရောဂါအခြေအနေအမျိုးမျိုးဖြစ်လာနိုင်ပါတယ် -ကိုယ်ခံအားစနစ် အားနည်းခြင်း(ရောဂါမျိုးစုံဝင်နိုင်) ၊ အနာကျက်နှေးခြင်း ၊ကြွက်သားအားနည်းခြင်း( ချော်လဲခြင်း၊အရိုးကျိုးအက်ခြင်းတွေဖြစ်လာနိုင်)၊တွေအပြင် နောက်ပိုင်းမှာ အစာစားချင်စိတ်မရှိတာတွေ ဖြစ်လာနိုင်ပြီး အခြေအနေပိုဆိုးစေနိုင်ပါတယ်။

အကြောင်းရင်းမရှိဘဲ ကိုယ်အလေးချိန်ကျဆင်းခြင်း၊ မောပန်းအားကုန်ခြင်း( အားအင်ကုန်ခန်းခြင်း)၊ ကြွက်သားအားနည်းခြင်း၊ စိတ်ဓါတ်ကျခြင်း၊မှတ်ဉာဏ်မကောင်းတော့ခြင်း၊သွေးအားနည်းခြင်းတို့လည်း ခံစားရနိုင်ပါတယ်။

လူကြီးတွေမှာအာဟာရချို့တဲ့လာတဲ့လက္ခဏာတွေကိုသိနိုင်ဖို့ –

• လူကြီးတွေရဲ့စားသောက်ပုံအမူအကျင့်ကိုစောင့်ကြည့်ပါ။ အိမ်မှာထမင်းအတူစားပေးပါ။ မိဘက အိမ်သီးသန့်နေထိုင်သူဖြစ်ရင် စားစရာလေးတွေဝယ်သွားပေးပါ။ ဆေးရုံရောက်နေသူဆိုရင် ထမင်းစားချိန်အတွင်းသွားတွေ့ဆုံပါ။
• ကိုယ်အလေးချိန်ကျဆင်းမှုရှိမရှိစောင့်ကြည့်ပါ။ ပေါင်ချိန်စက်နဲ့တိုင်းတာတာအပြင် အဝတ်အစားတွေ တော်မတော် သတိထားကြည့်နိုင်ပါတယ်။
• တခြားအရေးကြီးတဲ့အချက်တွေကို သတိထားပါ။ ကိုယ်အလေးချိန်ကျဆင်းမှုအပြင် အာဟာရချို့တဲ့မှုကြောင့် အနာကျက်နှေးခြင်း၊ ထိခိုက်ဒဏ်ရာရလွယ်ခြင်း၊ သွားကျန်းမာရေးထိခိုက်ခြင်း တို့ဖြစ်လာစေနိုင်ပါတယ်။
• လူကြီးတွေရဲ့ဆေးဝါးသောက်သုံးမှုကို သိအောင်လေ့လာပါ။ ဆေးဝါးအတော်များများက အစာစားချင်စိတ်၊ အစာချေဖျက်မှုနဲ့ အာဟာရစုပ်ယူနိုင်စွမ်းတို့ကို ထိခိုက်စေတတ်ပါတယ်။

လူကြီးသူမတွေကို အာဟာရပြည့်ဝစေဖို့အတွက်

• ကျန်းမာရေးနဲ့ညီညွတ်တဲ့အစားအစာရွေးချယ်ဖို့ကို အားပေးပါ –အကောင်းဆုံးကတော့ သစ်သီး၊ ဟင်းသီးဟင်းရွက်တွေ၊ဂျုံပြောင်းနှံတွေ၊ အဆီမပါတဲ့အသားတို့လို အာဟာရပြည့်ဝတဲ့အစားအစာတွေ ဖြစ်ပါတယ်။ လူကြီးတွေရဲ့ အဆီ၊သကြား၊အငန်စားသုံးမှုနဲ့ယမကာသောက်သုံးမှုကို ကန့်သတ်ပေးပါ။
• ကျန်းမာရေးနဲ့ညီတဲ့အစားအစာတွေကိုပဲ သရေစာအဖြစ်ရွေးချယ်ဖို့က ကြားချိန်အတွင်း အာဟာရဓါတ်နဲ့ ကယ်လိုရီပိုရရှိစေနိုင်ပါတယ်။
• ခံတွင်းလိုက်စေဖို့ – ဥပမာ လူကြီးတွေက ရောဂါကြောင့်ဆင်ခြင်စားသောက်နေရတဲ့သူတွေဆိုရင် အရသာပေါ့ရွှတ်ရွှတ်အစားအစာတွေမှာ ဟင်းခတ်အမွှေးကြိုင်တွေနဲ့စီမံပေးလိုက်ရင် ခံတွင်းပြန်ကောင်း စေနိုင်ပါတယ်။ ဒါပေမယ့် အငန်များတဲ့အမွှေးအကြိုင်တွေကိုတော့ မသုံးမိဖို့သတိထားပါ။
• ဖြည့်စွက်စာတွေ ထည့်သွင်းပေးဖို့– တကယ်လို့ စားသောက်နေထိုင်မှုပုံစံပြောင်းလဲတာတစ်ခုတည်းက လူကြီးသူမတွေအတွက် လုံလောက်တဲ့အာဟာရဓါတ်ကို မပေးစွမ်းနိုင်ဘူးဆိုရင် အာဟာရဖြည့်စွက်စာ ထည့်သွင်းကျွေးခြင်းက သူတို့အတွက် အကျိုးများနိုင်ပါလိမ့်မယ်။ ဒီကိစ္စနဲ့ပတ်သက်ပြီး ရွေးချယ်နိုင်တဲ့နည်းလမ်းတွေကို ဆရာဝန်နဲ့ တိုင်ပင်နိုင်ပါတယ်။
• ကိုယ်လက်လှုပ်ရှားမှုလုပ်ဖို့အားပေးပါ – နည်းနည်းလောက်ဖြစ်ဖြစ်လှုပ်ရှားမှုပြုလုပ်ပေးခြင်းက လူကြီးတွေကို အစာစားချင်စိတ်ဖြစ်စေနိုင်ပြီး အရိုးနဲ့ကြွက်သားသန်မာကြံ့ခိုင်မှုကိုထိန်းသိမ်းနိုင်စေပါတယ်။
• မိတ်ဆွေတွေနဲ့တွေ့ဆုံသွားလာဖို့စီစဉ်ပေးပါ – အိမ်နီးချင်း သို့မဟုတ် မိတ်ဆွေတစ်ဦးဦးနဲ့ တွေ့ဆုံပြီး အပြင်မှာနေ့လယ်စာစားဖို့ အားပေးပါ။
• ဆရာဝန်ပြပေးပါ – ဆရာဝန်နဲ့တွေ့ဆုံတဲ့အခါ လူကြီးတွေရဲ့ အာဟာရချို့တဲ့မှုနဲ့ သောက်သုံးနေရတဲ့ ဆေးဝါးတွေရဲ့အန္တရာယ်အကြောင်းကို မေးမြန်းသိရှိနိုင်ပါတယ်။