မှိုကြိုက်တတ်တဲ့ လူကြီးတွေ မှတ်ဉာဏ်ကျဆင်းနိုင်ခြေပိုနည်း

မှိုကို တစ်ပတ် နှစ်ကြိမ်ထက်ပိုပြီး စားသုံးတဲ့လူကြီးတွေမှာ ဦးနှောက်မှတ်ဉာဏ်ကျဆင်းမှုဖြစ်လာနိုင်ခြေပိုနည်းစေနိုင်တယ်လို့ သုတေသနကတွေ့ရှိခဲ့ပါတယ်။

သုတေသနမှာ အသက် ၆၀ကျော် တရုတ်လူမျိုးသက်ကြီးပိုင်းအရွယ် အယောက် ၆၀၀ ကိုလေ့လာခဲ့တာဖြစ်ပါတယ်။ တစ်ကြိမ်စားသုံးမှုကို ချက်ပြုတ်ပြီးသား မှိုပမာဏ ပျမ်းမျှ ၁၅၀ ဂရမ် နဲ့သတ်မှတ်ထားပြီး နှစ်ကြိမ်စာဟာ မှိုဟင်းတစ်ပန်းကန်ရဲ့တဝက်နဲ့ညီမျှပါတယ်။

“ သုတေသနလမ်းညွှန်ချက်အရသာ ပမာဏတိုင်းတာမှုနဲ့ပြောထားပေမယ့် တစ်ပတ်ကို မှိုဟင်းတစ်ကြိမ်လောက်စားရုံနဲ့လည်း ဦးနှောက်ဉာဏ်စွမ်းရည်ကျဆင်းမှုဖြစ်နိုင်ခြေ ပိုနည်းစေနိုင်ပါတယ်” လို့National University of Singapore (NUS) ရဲ့သတင်းထုတ်ပြန်ချက်မှာဖော်ပြထားပါတယ်။

ဒီရလဒ်ဟာ မှိုမှာပါတဲ့ergothioneine ဓါတ်တိုးဆန့်ကျင်ပစ္စည်းရဲ့ အစွမ်းအာနိသင်ကြောင့် ဖြစ်တယ်လို့NUS မှ သုတေသီDr Irwin Cheah ကပြောပါတယ်။

၂၀၁၁ ခုနှစ်ကနေ ၂၀၁၇ ခုနှစ်အတွင်းပြုလုပ်ခဲ့တဲ့လေ့လာမှုမှာ စင်ကာပူနိုင်ငံအတွင်း လူကြိုက်များဆုံးမှိုအမျိုးအစား ၆ မျိုးကို စားသုံးမှုအပေါ်လေ့လာခဲ့တာဖြစ်ပါတယ်။

ဒါ့အပြင် ပါဝင်သူတွေကိုတွေ့ဆုံမေးမြန်းတာတွေ၊ စမ်းသပ်စစ်ဆေးမှုတွေလုပ်ဆောင်ခဲ့ကြပြီး သူတို့ရဲ့ ကိုယ်ရေးအချက်အလက်နဲ့နေထိုင်မှုအနေအထား၊ဆေးမှတ်တမ်း၊ စိတ်ကျန်းမာရေးအခြေအနေ၊ စားသောက်ပုံအမူအကျင့်၊ ခန္ဓါကိုယ်လှုပ်ရှားလုပ်ကိုင်နိုင်စွမ်းတို့ကို ထည့်သွင်းလေ့လာခဲ့တာပါ။

ဦးနှောက်ဉာဏ်စွမ်းရည်ကျဆင်းမှု(MCI)ဖြစ်လာသူတွေဟာ ပုံမှန်လုပ်နေကျ နိစ္စဓူဝအလုပ်တွေကို လုပ်နိုင်နေဆဲဖြစ်ပါတယ်။ ဒါ့ကြောင့် သုတေသနမှာ ပါဝင်သူတွေကို ဦးနှောက်နဲ့စိတ်ပညာဆိုင်ရာစမ်းသပ်စစ်ဆေးမှုတွေနဲ့သေချာစစ်ဆေးခဲ့ရတာဖြစ်တယ်လို့ ဦးဆောင်သုတေသီ ပါမောက္ခFeng ကပြောပါတယ်။

ဦးနှောက်စွမ်းရည်၊ စိတ်ဖိစီးမှုနဲ့ စိုးရိမ်ပူပန်မှုတွေနဲ့ပတ်သက်တဲ့ စစ်ဆေးမှုကိုလည်း လုပ်ဆောင်ခဲ့ပြီး ရလဒ်တွေကို စိတ်ပညာကျွမ်းကျင်သူတွေနဲ့ ဂရုတစိုက်ဆွေးနွေးအတည်ပြုခဲ့ကြတာပါ။

MCI လက္ခဏာတွေထဲမှာမေ့လျော့တတ်ခြင်းအပြင် ဘာသာစကား၊အာရုံစိုက်နိုင်စွမ်း၊ အကြောင်းအရာတွေကိုသိမြင်နားလည်နိုင်စွမ်းတို့အပါအဝင် ဉာဏ်ရည်ကျဆင်းမှုတွေပါဝင်ပါတယ်။

Hello Health Groupသည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပေးပါ။