သတိထားသင့်တဲ့ ဗီတာမင် ဒီ အဆိပ်သင့်ခြင်း

ဗီတာမင် ချို့တဲ့ရင် ဘယ်လိုဖြစ်နိုင်တယ်၊ ဘယ်လိုအန္တရာယ်ရှိနိုင်တယ်ဆိုတာမျိုးက အမြဲကြားဖူးနေကျ အသိပညာပေးစကားတွေပါ။ ဒါပေမယ့် တန်ဆေး လွန်ဘေးဆိုသလို ဘယ်အရာမှ ရှိသင့်တာထက်လွန်ကဲရင်မကောင်းပါဘူး။ ခုတလောမှာတွေ့ရလိုက်ရတဲ့ သတင်းတွေထဲ ဗီတာမင် D လွန်ကဲနေလို့ အဆိပ်သင့်ရတဲ့သူတွေအကြောင်း ပါဝင်နေပါတယ်။

ဗီတာမင် D ဆိုတာ ကယ်လ်စီယမ်စုပ်ယူနိုင်စွမ်း၊ ကိုယ်ခံအားစနစ်လုပ်ဆောင်ချက်နဲ့ အရိုး၊ကြွက်သား၊နှလုံးကျန်းမာရေးတို့မှာ အရေးပါတဲ့နေရာက ပါဝင်သက်ဆိုင်တဲ့ဓါတ်ဖြစ်ပါတယ်။ ဒါပေမယ့်ဗီတာမင် D ကို အဆီများတဲ့ငါးကလွဲပြီး တခြားအစားအသောက်ကနေရရှိနိုင်ဖို့ အခွင့်အလမ်းနည်းပါတယ်။နေရောင်ခြည်ကနေပဲရရှိနိုင်တာဖြစ်လို့နေရောင်ထိတွေ့မှုသိပ်မရှိသူတွေမှာ အလုံအလောက်မရနိုင်တဲ့အတွက်ဗီတာမင် D အားဆေးတွေ လိုအပ်လာတာပါ။

ဗီတာမင် D မှာD2 နဲ့D3 ဆိုပြီးနှစ်မျိုးရှိပါတယ်။D2 ကို အသီးအရွက်တွေကနေရရှိနိုင်ပြီးD3 ကိုတော့ အဆီများတဲ့ငါးနဲ့အသားကနေရရှိနိုင်တယ်၊နေရောင်ခြည်ကရနိုင်တယ်ဆိုပေမယ့် ပမာဏနည်းပါတယ်။။ တစ်နေ့ကိုဗီတာမင် D ပမာဏ 400–1000 IUအထိသောက်သုံးနိုင်ပါတယ်။ ဒါပေမယ့်အရေးကြီးတာကဗီတာမင် D နဲ့ပတ်သက်တဲ့အားဆေးတွေကို ဆရာဝန်ညွှန်ကြားချက်အတိုင်းမဟုတ်ဘဲ ထင်ရာမသောက်ဖို့ပါပဲ။ဗီတာမင် D3 ကို မလိုအပ်ဘဲ အချိန်အကြာကြာ များများသောက်မိရင် ခန္ဓါကိုယ်ထဲမှာစုပုံလာပြီး အဆိပ်သင့်နိုင်ပါတယ်။

လိုအပ်တဲ့သွေးဖောက်စစ်ဆေးမှုတွေမပါဘဲ ရမ်းသမ်းသောက်သုံးမှုတွေကြောင့်ဗီတာမင် D အဆိပ်သင့်ခြင်းအန္တရာယ်ရှိလာနိုင်တာ သတိထားသင့်တဲ့အချက်ပါ။ အရိုးအတွက်ကောင်းတယ်၊ ဘာအတွက်ကောင်းတယ်ဆိုတိုင်း အားဆေးတွေကို အရမ်းအားမကိုးသင့်ပါဘူး။ သောက်သုံးလိုက်တဲ့ ဗီတာမင် D ကို ခန္ဓါကိုယ်အဆီတွေထဲ သိုလှောင်ထားလိုက်ပြီးသွေးထဲကို တဖြည်းဖြည်းထုတ်ပေးတာဖြစ်လို့ဆေးကိုရပ်လိုက်တာတောင် လအတော်ကြာတဲ့အထိ အဆိပ်သင့်ခြင်းအာနိသင်က ရှိနေနိုင်ပါသေးတယ်။

အဆိပ်သင့်တာက အဖြစ်မများပေမယ့် ဒီဆေးတွေကို မလိုအပ်ဘဲ ၊သွေးမစစ်ဘဲ၊ ဆရာဝန်ညွှန်ကြားမှုမရှိဘဲ ကြာရှည်သောက်သုံးတဲ့သူတွေမှာဖြစ်လေ့ရှိပါတယ်။

အဆိပ်သင့်ရင်ဘာတွေဖြစ်လာမှာလဲ

ကယ်လ်စီယမ်တွေများလာမယ်

ဗီတာမင် D က ကိုယ်စားလိုက်တဲ့အစားအသောက်တွေထဲက ကယ်လ်စီယမ်တွေစုပ်ယူမှုကို အားပေးကူညီပါတယ်။ ဒါပေမယ့် လွန်ကဲလာတဲ့အခါသွေးတွင်းကယ်လ်စီယမ်တွေ များလာပြီး ဆိုးကျိုးတွေရှိလာနိုင်ပါတယ်။သွေးထဲ ကယ်လ်စီယမ်တွေများလာပြီဆိုရင် –

ပျို့အန်ခြင်း၊ မအီမသာဖြစ်ခြင်း၊ ဗိုက်အောင့်ခြင်းတို့လို အစာခြေစနစ်ပြဿနာ
နုံးချိခြင်း၊ခေါင်းမူးခြင်းနဲ့ အာရုံရှုပ်ထွေးခြင်း
ရေငတ်ခြင်း
ဆီးမကြာခဏသွားခြင်းစတဲ့ လက္ခဏာတွေဖြစ်လာနိုင်တယ်။

ခံတွင်းပျက်လာမယ်

မအီမသာဖြစ်တာ၊ ပျို့အန်တာနဲ့ အစာစားချင်စိတ်မရှိတာတွေဖြစ်လာပါမယ်။

ဗိုက်အောင့်မယ်၊ ဝမ်းချုပ်မယ်၊ ဝမ်းပျက်မယ်

ဗိုက်အောင့်ခြင်း၊ ဝမ်းချုပ်ခြင်းနဲ့ ဝမ်းပျက်ခြင်းတို့က အူလမ်းကြောင်းလှုပ်ရှားမှုမမှန်တဲ့ IBSရောဂါတို့နဲ့ပတ်သက်နေကျ အစာခြေစနစ်ပြဿနာတွေဖြစ်ပါတယ်။ ဒါပေမယ့်ဗီတာမင် D အဆိပ်သင့်ခြင်းရဲ့ လက္ခဏာလည်းဖြစ်နိုင်ပါတယ်။

အရိုးပျက်စီးစေတယ်

အရိုးကျန်းမာရေးအတွက်ဗီတာမင် D3ကို သောက်သုံးကြသလို သူကိုယ်တိုင်လည်း ကယ်လ်စီယမ်စုပ်ယူမှုကိုအားပေးပြီး အကျိုးပြုပါတယ်။ ဒါပေမယ့် လွန်ကဲသွားရင်တော့ အရိုးကျန်းမာရေးကို ထိခိုက်ပျက်ယွင်းစေနိုင်တယ်ဆိုတာ သိပ်မသိကြပါဘူး။ဗီတာမင် D လွန်ကဲရင် ကယ်လ်စီယမ်ကိုလည်းလွန်ကဲစေနိုင်ပေမယ့် ဗီတာမင် K2 ကိုတော့လျော့နည်းစေနိင်ပါတယ်။

ဗီတာမင် K2 ရဲ့လုပ်ဆောင်ချက်က သွေးထဲမှာတင်မကဘဲ အရိုးတွင်းမှာပါ ကယ်လ်စီယမ်ကိုသိုလှောင်ပေးထားတာဖြစ်ပါတယ်။ဗီတာမင် D များနေတဲ့အခါK2 ရဲ့လုပ်ဆောင်ချက်ကိုလျော့နည်းစေတာမို့ အရိုးကျန်းမာရေးအတွက် ဘယ်ကောင်းနိုင်ပါတော့မလဲ။

ကျောက်ကပ်ပျက်စီးစေတယ်

ဗီတာမင် D လွန်ကဲသွားရင်ကျောက်ကပ်ထိခိုက်မှုတွေဖြစ်နိုင်ပါတယ်။လေ့လာမှုတွေအရ နဂို ကျောက်ကပ်ကျန်းမာသူတွေဖြစ်ဖြစ်၊ ကျောက်ကပ်ရောဂါရှိသူဖြစ်ဖြစ် ဗီတာမင် D လွန်ကဲတဲ့အခါကျောက်ကပ်ပျက်စီးလာတာလေ့လာမှုတွေအရတွေ့ရပါတယ်။

ဒါ့ကြောင့်ဗီတာမင်နဲ့သတ္တုဓါတ်အတွက် ဘယ်အားဆေးကိုပဲဖြစ်ဖြစ် ဆရာဝန်ညွှန်ကြားချက်မပါဘဲ စိတ်ထင်ရာမသောက်သုံးသင့်တာကို သတိထားသင့်ပါတယ်။

Hello Health Groupသည် ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့်ကုသမှုများမပြုလုပ်ပေးပါ။

Hello Sayarwon Panel မှ အချက်အလက်များ စစ်ဆေးထားပါသည်။ Yun Sandi Nan Mon မှ ရေးသားသည်။ နောက်ဆုံးအသစ်ပြင်ဆင်သည့်ရက်စွဲမှာ 13/01/2022 ဖြစ်ပါသည်။