C-peptide ဆိုတာဘာလဲ။

C-peptide စစ်ဆေးခြင်းဆိုတာ သွေးထဲရှိ ထို peptide ပမာဏကိုတိုင်းတာခြင်းဖြစ်တယ်။ အင်ဆူလင် နှင့် C-peptide ဟာ မုန့်ချိုအိတ်မှ အတူတွဲပြီးထုတ်လုပ်တာ ဖြစ်တဲ့အတွက် သွေးထဲမှာ C-peptide နဲ့ အင်ဆူလင်ပမာဏ အတူတူရှိတတ်ပါတယ်။ အင်ဆူလင်က သွေးထဲရှိသကြားဓါတ်နှင့် ခန္ဓါကိုယ်မှအသုံးပြုသော သကြားဓါတ်ပမာဏကို ထိန်းညှိပေးတယ်။ သွေးထဲရှိ C-peptide ပမာဏဟာ မုန့်ချိုအိတ်ကထုတ်သော အင်ဆူလင်ပမာဏကိုပါ ပြနိုင်သော်လည်း C-peptide မှာတော့ အင်ဆူလင်ကဲ့သို့ ခန္ဓါကိုယ်သကြားဓါတ်ကို ထိန်းပေးနိုင်သော အစွမ်းသတ္တိမရှိပါဘူး။

C-peptide စစ်ဆေးမှုကိုဆီးချိုသွေးချိုအမျိုးအစား(၁)လား (၂)လား သိရန်အတွက် ပြုလုပ်ပါတယ်။ အမျိုးအစား(၁) မှာဆိုရင် မုန့်ချိုအိတ်က အင်ဆူလင်မထုတ်နိုင်တာ ဖြစ်တဲ့အတွက် အင်ဆူလင်ရော C-peptide ပါကျနေပြီး အမျိုးအစား(၂) မှာဆိုရင်တော့ မုန့်ချိုအိတ်လုပ်ငန်းပုံမှန်ဖြစ်တာကြောင့် C-peptide ပမာဏပုံမှန် ဒါမှမဟုတ် တက်နေပါမယ်။

C-peptide စစ်ဆေးခြင်းဟာ သွေးတွင်းသကြားဓါတ်နည်းခြင်း၊ ဆီးချိုကျဆေးအသောက်လွန်ခြင်း၊ မုန့်ချိုအိတ်တွင် ကင်ဆာမဟုတ်သောအလုံးဖြစ်ပေါ်ခြင်း(အင်ဆူလင်ကျိတ်) တို့အတွက်လည်း အသုံးဝင်နိုင်ပါတယ်။ လူထုတ်လုပ်ထားသော အင်ဆူလင်ဆေးမှာ C-peptide မပါတာကြောင့် ဆီးချိုသွေးချိုအတွက် အင်ဆူလင်အသုံးများ၍ သွေးတွင်းသကြားဓါတ်ကျသွားသူ၏ သွေးထဲတွင် အင်ဆူလင်သာများနေပြီး C-peptide ပမာဏနည်းနေပါလိမ့်မယ်။ သို့သော် မုန့်ချိုအိတ်အလုပ်အရမ်းလုပ်စေသော ရောဂါတစ်မျိုး (အင်ဆူလင်ကျိတ်) တွင်မူ သွေးတွင်းအင်ဆူလင်ပမာဏသာမက သွေးတွင်း C-peptide ပမာဏပါတက်နေပါလိမ့်မယ်။

ဘာအတွက်စစ်ဆေးမှုပြုကြသလဲ။

စစ်ဆေးမှုကို-

• ဆီးချိုသွေးချိုအမျိုးအစားခွဲခြားရန်

• တစ်သျှူးများက အင်ဆူလင်ကိုလက်မခံသည့်အခြေအနေ ရှိမရှိ စစ်ဆေးသိရှိရန်

• သွေးတွင်းသကြားဓါတ်နည်းရခြင်း အကြောင်းအရင်းရှာရန်

• မုန့်ချိုအိတ်မှ အကျိတ်ကို ဖယ်ထုတ်ပြီး အင်ဆူလင်ထုတ်လုပ်မှု အခြေအနေကိုစောင့်ကြည့်ရန်

တို့အတွက်စစ်ဆေးမှုလုပ်လေ့ရှိပါတယ်။

စစ်ဆေးမှုမပြုလုပ်ခင်သိရှိသင့်သည်များ

ဘာတွေသိထားသင့်လဲ။

ဆီးချိုသွေးချို အမျိုးအစား (၂)ရှိသူမှာ C-peptide ပမာဏ ပုံမှန် သို့မဟုတ် တက်နေပေမယ့် အချိန်ကြာလာတဲ့အခါ ပမာဏကျသွားနိုင်ပါတယ်။

C-peptide စစ်ဆေးမှုဟာ အသုံးများတဲ့စစ်ဆေးမှုတစ်ခုမဟုတ်တာကြောင့် ဓါတ်ခွဲခန်းတိုင်းမှာ မရနိုင်ပါဘူး။ တကယ်လို့ စစ်ဆေးမှုကို အချိန်အလိုက် ဆက်တိုက်လုပ်ဆောင်သွားချင်တယ်ဆိုရင် အခေါက်တိုင်းကို တူညီတဲ့ဓါတ်ခွဲခန်းမှာ တူညီတဲ့နည်းနဲ့ပဲလုပ်ဆောင်သင့်ပါတယ်။

C-peptide နဲ့ အင်ဆူလင်ကို တူညီသောနေရာမှ တူညီသောအချိန်တွင် ထုတ်လုပ်သော်လည်း မတူညီသောလမ်းကြောင်းဖြင့် ခန္ဓါကိုယ်မှစွန့်ထုတ်ပါတယ်။ အင်ဆူလင်ကိုများသောအားဖြင့် အသည်းမှစွန့်ပစ်တယ်။ C-peptide ကို ကျောက်ကပ်မှစွန့်ထုတ်ပါတယ်။ အင်ဆူလင်စွန့်ပစ်နှုန်းဟာ ၅ မိနစ်သာရှိပြီး C-peptide ဟာ မိနစ် ၃၀ ဖြစ်တာကြောင့် သွေးထဲမှာ C-peptide ပမာဏဟာ အင်ဆူလင်ထက် ငါးဆခန့်ပိုပြီး ကျန်နေတတ်ပါတယ်။

စမ်းသပ်မှုအတွက်ဘယ်လိုပြင်ဆင်ရမလဲ။

စစ်ဆေးမှုမလုပ်ခင် ၈ နာရီမှ ၁၂ နာရီလောက်အထိ အစာမစား၊ အရည်မသောက်ဘဲနေရပါမယ်။

တကယ်လို့ သွေးတွင်းသကြားဓါတ်နည်းစေသော ဆေးများသောက်နေပါက စစ်ဆေးမှုမလုပ်ခင် ခေတ္တရပ်ထားဖို့လိုပါလိမ့်မယ်။

စစ်ဆေးနေစဉ်ဘာတွေလုပ်လဲ။

• သွေးလျှောက်မှုခေတ္တရပ်စေရန် လက်မောင်းကိုစည်းထားပါမယ်၊ ထိုစည်းထားခြင်းဟာ သွေးပြန်ကြောကို ဖောင်းစေပြီး သွေးယူရလွယ်စေပါလိမ့်မယ်

• အပ်ထိုးမည့်နေရာကို အရက်ပြန်နှင့်သန့်စင်ပါမယ်

• သွေးပြန်ကြောထဲအပ်ထိုးပါမယ် (သွေးကြောအခြေအနေအရ တစ်ကြိမ်ထက်ပိုထိုးရသည်လည်းရှိနိုင်ပါတယ်)

• သွေးထုတ်ပြီးပါက လက်မောင်းကစည်းထားသော ကြိုးကိုဖြည်ပေးပါလိမ့်မယ်

• အပ်ထိုးရာနေရာကို ပလာစတာကပ်ပေးပါလိမ့်မယ်။

• သွေးကိုပြွန်ငယ်တစ်ခုအတွင်းထည့်ပါမယ်

စစ်ဆေးပြီးရင်ဘာလုပ်ရမလဲ။

သွေးထုတ်ထားသည့်နေရာကို သွေးတိတ်ရန်ပလာစတာကပ်ထားရပါမယ်။ မေးခွန်းများရှိပါက ဆရာဝန်ကိုတိုင်ပင်မေးမြန်းနိုင်ပါတယ်။

ရလဒ်

ဆေးရုံ၊ ဓါတ်ခွဲခန်းပေါ်မူတည်ပြီး ပုံမှန်ပမာဏအနည်းငယ်ကွာခြားမှု ရှိနိုင်ပါတယ်။ အဖြေထုတ်ပေးသောဓါတ်ခွဲခန်းမှ သုံးသည့်ပုံမှန်ပမာဏကို အဖြေစာရွက်မှာရေးထားမှာဖြစ်ပြီး ရလဒ်ဖတ်သည့်ဆရာဝန်က သင့်ရောဂါအခြေအနေနဲ့ အခြားသောအချက်အလက်များပေါ်မူတည်ပြီး အဖြေပြောပါလိမ့်မယ်။ ယခုဖော်ပြထားသော ပုံမှန်ထက်နည်းနေသည့်ပမာဏက သင့်ဓါတ်ခွဲခန်းအတွက်တော့ ပုံမှန်ပမာဏထဲဝင်ချင်ဝင်နေပါလိမ့်မယ်။

C-peptide ပမာဏကို သွေးတွင်းသကြားဓါတ်ပမာဏနဲ့ အတူတူစစ်ဆေးမှာဖြစ်ပြီး သွေးတွင်းအင်ဆူလင်ပမာဏပါ စစ်ဆေးနိုင်ချေရှိပါတယ်။

ပုံမှန်ပမာဏ :

အစာမစားထားပါက-

ဝ.၅၁-၂.၇၂ နာနိုဂရမ်/မီလီလီတာ (ဒါမှမဟုတ်) ဝ.၁၇-ဝ.၉၀ နာနိုမိုး/လီတာ

တက်နေလျှင်-

C-peptide နှင့် သွေးတွင်းသကြားဓါတ် နှစ်ခုလုံး တက်နေခြင်းဟာ ဆီးချိုသွေးချိုအမျိုးအစား(၂) ဒါမှမဟုတ် အင်ဆူလင်ကို မတုံ့ပြန်သောရောဂါမျိုးမှာ တွေ့ရနိုင်ပါတယ်။

C-peptide များပြီး သွေးတွင်းသကြားဓါတ်နည်းနေလျှင် မုန့်ချိုအိတ်မှ အင်ဆူလင်အထုတ်များသောရောဂါ (အင်ဆူလင်ကျိတ်)ဒါမှမဟုတ် sulfonylureas (glyburide)ကဲ့သို့ဆေးများသုံးထားခြင်ကြောင်း့ ဖြစ်နိုင်ပါတယ်။

တကယ်လို့ အင်ဆူလင်ကျိတ် (ကင်ဆာမဟုတ်သော မုန့်ချိုအိတ်အကျိတ်)ဖယ်ထုတ်ပြီးသည်ထိ C-peptide ပမာဏများနေသေးပါက အကျိတ်ကျန်သေးတာ၊ ဒါမှမဟုတ် အကျိတ်ကတခြားအစိတ်အပိုင်းတွေဆီ ပျံ့သွားတာဖြစ်နိုင်ပါတယ်။

ကျနေလျှင်-

အသည်းရောဂါ၊ ဆိုးရွားစွာရောဂါပိုးဝင်ခြင်း၊ အက်ဒီဆင်ရောဂါ၊ သို့မဟုတ် အင်ဆူလင်ဆေးထိုးပြီးချိန်တို့တွင် C-peptide နှင့် သွေးတွင်းသကြားဓါတ် နှစ်ခုစလုံး ကျနိုင်ပါတယ်။

C-peptide ပမာဏနည်းပြီး သွေးတွင်းသကြားဓါတ်များနေပါက ဆီးချိုသွေးချို အမျိုးအစား (၁) ဖြစ်နိုင်ပါတယ်။

မုန့်ချိုအိတ်ခွဲစိတ်ဖယ်ရှားလိုက်ပါက C-peptide ပမာဏဟာ တိုင်းမရနိုင်တော့လောက်သည်ထိ ကျသွားတော့မည်ဖြစ်ပြီး အင်ဆူလင်ပမာဏလည်း နည်းသွားခြင်းကြောင့် သွေးတွင်းသကြားဓါတ်အလွန်အမင်းတက်လာက ဆက်လက်အသက်ရှင်ရန် အင်ဆူလင်ထိုးဖို့လိုအပ်ပါမယ်။

ဓါတ်ခွဲခန်းနှင့်ဆေးရုံပေါ်မူတည်ပြီး ပုံမှန်ပမာဏ အနည်းငယ်ကွာခြားနိုင်ပါတယ်။ သွေးအဖြေအခြေအနေကိုသိရန် ဆရာဝန်နဲ့သေချာတိုင်ပင်ဆွေးနွေးနိုင်ပါတယ်။

Hello Health Group သည် ဆေးပညာအကြံပြုချက်များ၊ ရောဂါရှာဖွေမှုများနှင့် ကုသမှုများကို မပြုလုပ်ပေးပါ

အကြောင်းရင်းများ

C-Peptide () ကိုဘာတွေကဖြစ်စေသလဲ

ဖြစ်နိုင်ခြေများ