လေ့ကျင့်ခန်း (Workout) လုပ်အပြီး ခဏမှေးသင့်သလား

ကိုယ်လက်လှုပ်ရှားမှုပြုခြင်းဟာ စွမ်းအင်တိုးလာစေပါတယ်။ နှလုံးခုန်နှုန်းကို မြန်စေပြီး သွေးလည်ပတ်မှုကို ပိုမိုကောင်းမွန်စေပြီး လူကိုလည်း နိုးကြားစေပါတယ်။

ဒါပေမယ့် လေ့ကျင့်ခန်းလုပ်ပြီးချိန်မှာ ပင်ပန်းလာနိုင်ပါတယ်။ အင်အားသုံးလေ ပိုပင်ပန်းလေပါပဲ။ လေ့ကျင့်ခန်းလုပ်အပြီး ပင်ပန်းလာတဲ့အခါ ခဏလောက် မှေးချင်စိတ်ပေါ်လာတတ်ပါတယ်။ ယခုဆောင်းပါးမှာတော့ ယခုလို မှေးစက်ခြင်းဟာ ကောင်းသလား ဆိုးသလား ဖော်ပြသွားမှာ ဖြစ်ပါတယ်။

ပုံမှန်ပဲလား

ယေဘုယျအားဖြင့် လေ့ကျင့်ခန်းလုပ်အပြီး အိပ်ချင်စိတ်ပေါ်တာဟာ စိုးရိမ်စရာကိစ္စတော့ မဟုတ်ပါဘူး။ ရုပ်ပိုင်းဆိုင်ရာ စွမ်းအင်တွေ အသုံးချလိုက်လို့ ပင်ပန်းနွမ်းနယ်လာခြင်းပဲ ဖြစ်ပါတယ်။ ပြင်းထန်ပြီး အင်အားသုံးရတဲ့ လေ့ကျင့်ခန်းတွေဆိုရင် ပိုသိသာပါတယ်။

လေ့ကျင့်ခန်းလုပ်အပြီး မောပန်းနွမ်းနယ်ခြင်းဟာ အောက်ပါအချက်များပေါ်လည်း မူတည်ပါသေးတယ်။

– ကျန်းမာရေးအခြေအနေ

– အစားအသောက်

– ရေဓာတ်ပြည့်ဝမှုအခြေအနေ

– လေ့ကျင့်ခန်း အမျိုးအစား၊ ကြာချိန်၊ ပြင်းထန်မှု

– အိပ်ရေး ဝ/မဝ

– ရောဂါအခံ ရှိ/မရှိ

လေ့ကျင့်ခန်းတစ်ခုခုကို လုပ်ဆောင်နေချိန်မှာ သင့်ကိုယ်ခန္ဓာရဲ့ သက်ဆိုင်ရာကြွက်သားအုပ်စုများဟာ ဆက်တိုက် ကျုံ့ဝင်လှုပ်ရှားနေပါတယ်။ ဒီလိုလုပ်ဆောင်ဖို့အတွက် ATP လို့ခေါ်တဲ့ မော်လီကျူးကို အသုံးပြုပါတယ်။ ATP မော်လီကျူးဟာ ဆဲလ်တွေအတွက် စွမ်းအင်ကို ထောက်ပံ့ပေးပါတယ်။

လေ့ကျင့်ခန်းလုပ်ဆောင်နေချိန်မှာ ATP ဟာ တဖြည်းဖြည်းလျော့နည်းလာပါတယ်။ ဒါကြောင့် ကြွက်သားတွေရဲ့ လုပ်ဆောင်နိုင်စွမ်းဟာလည်း လျော့ကျလာပြီး ပင်ပန်းလာတတ်ပါတယ်။ ဒါ့အပြင် လေ့ကျင့်ခန်းလုပ်ချိန်မှာ ဗဟိုအာရုံကြောစနစ်ကနေ အချက်ပြမှုတွေ ဆက်တိုက်ထုတ်လွှတ်ပေးပြီး ကြွက်သားတွေရဲ့ လှုပ်ရှားမှုကို လှုံ့ဆော်ပေးပါတယ်။

ကောင်းကျိုးများ

လေ့ကျင့်ခန်းလုပ်ပြီးချိန် တမှေးမှေးမယ်ဆိုရင် အောက်ပါအကျိုးတွေ ရနိုင်ပါတယ်။

ကြွက်သားများ ပြန်လည်အားပြည့်ခြင်း။ တမှေးခန့်အိပ်စက်လိုက်မယ်ဆိုရင် ပီကျူထရီဂလင်းကနေ ကြီးထွားမှုဟော်မုန်းတွေ ထုတ်ပေးပါတယ်။ အဆိုပါဟော်မုန်းဟာ တစ်ရှူးတွေကို ပြန်လည်ပြုပြင်ပေးပါတယ်။

အိပ်ရေးဝခြင်း။ လူတစ်ယောက်ရဲ့ တစ်နေ့တာအိပ်စက်သင့်တဲ့နှုန်းကို အားဖြည့်ပေးရာ ရောက်ပါတယ်။ ဦးနှောက်ရဲ့ သိမှတ်မှုပိုင်းဆိုင်ရာ စွမ်းရည်နဲ့ ကိုယ်ခံအားကို မြှင့်တင်ပေးရာ ရောက်ပါတယ်။

ရုပ်ပိုင်းဆိုင်ရာပင်ပန်းမှုကို လျော့ပါးစေခြင်း။ လေ့ကျင့်ခန်းလုပ်စဉ်မှာ ပင်ပန်းခဲ့သမျှကို တမှေးခန့် အိပ်စက်ပြီး ပြန်လည်အားဖြည့်နိုင်ပါတယ်။

စိတ်ပိုင်းဆိုင်ရာ စွမ်းအင်ပြည့်စေခြင်း။ ရုပ်ပိုင်းဆိုင်ရာလိုပဲ စိတ်ပိုင်းဆိုင်ရာလည်း လန်းဆန်းတက်ကြွစေပါတယ်။ ပြန်လည်အားပြည့်စေပါတယ်။

ဆိုးကျိုးများ

ဘယ်နေရာမှာမဆို ကောင်းကျိုးဆိုးကျိုးဒွန်တွဲနေသလိုပဲ လေ့ကျင့်ခန်းလုပ်ပြီးချိန် အိပ်စက်ခြင်းကြောင့် အောက်ပါဆိုးကျိုးတွေ ရှိနိုင်ပါတယ်။

ကောင်းစွာ မအိပ်စက်နိုင်ခြင်း။ လေ့ကျင့်ခန်းပြုလုပ်ချိန်မှာ အင်ဒေါ်ဖင်ဟော်မုန်းနဲ့ ကိုယ်အပူချိန် တက်လာနိုင်ပါတယ်။ အဆိုပါအချိန်မှာ ဦးနှောက်နဲ့ ကိုယ်ခန္ဓာကို နိုးကြားလာစေပါတယ်။ လေ့ကျင့်ခန်းလုပ်ပြီးချိန် ပင်ပန်းတာကြောင့် ခဏတာ မှေးလိုက်ပေမယ့် အဆိုပါနိုးကြားမှုကလည်း ကျန်နေသေးရင် အိပ်ရေးကောင်းကောင်းမဝတာ ဖြစ်နိုင်ပါတယ်။

မလန်းဆန်းခြင်း။ မှေးပြီး ပြန်ထချိန်မှာ မူးနောက်နောက်နဲ့ မလန်းဆန်းဘဲ ဖြစ်တတ်ပါတယ်။ ဒီအခြေအနေကို ဆက်လက်ပြီး အိပ်ချင်စိတ်ပေါ်ခြင်း (sleep inertia) လို့ ခေါ်ပါတယ်။

ညအချိန် အိပ်မပျော်ခြင်း။ ခဏတာမှေးစက်ခြင်းအားဖြင့် တစ်နေ့တာလိုအပ်တဲ့ အိပ်ချိန်ကို ဖြည့်တင်းပေးရာ ရောက်ပေမယ့် ညအချိန်အိပ်စက်ခြင်းအတွက် အနှောင့်အယှက်ဖြစ်စေပါတယ်။ ညကျမှ အိပ်မပျော်တာမျိုး ကြုံနိုင်ပါတယ်။

ဘယ်လောက်ကြာကြာအိပ်သင့်သလဲ

မိနစ်နှစ်ဆယ်ခန့်သာ အိပ်သင့်ပါတယ်။ နာရီဝက်ကျော်ရင် sleep inertia အခြေအနေ ကြုံနိုင်ပါတယ်။ မအိပ်ခင် ရေအဝသောက်သင့်ပါတယ်။ နံနက်စောစော လေ့ကျင့်ခန်းလုပ်ပြီးချိန်ဆိုရင် အိပ်သင့်ပါတယ်။ ဒါပေမယ့် ညနေပိုင်း လေ့ကျင့်ခန်းလုပ်ရင်တော့ ပြန်မှေးတာမျိုးမလုပ်ဘဲ ညကျမှ ခပ်စောစော အိပ်သင့်ပါတယ်။ မအိပ်ခင်မှာ အကြောလျှော့သင့်ပါတယ်။