Methazolamide (မတ်သဇိုလမိုဒ်)

အသုံးပြုပုံများ

Methazolamide (မတ်သဇိုလမိုဒ်) ကို ဘာအတွက်အသုံးပြုကြသလဲ

Methazolamideကိုရေတိမ်ရောဂါတစ်ချို့ကြောင့် ဖြစ်တတ်သောမျက်လုံးတွင်းဖိအားများခြင်းအားကုသရာတွင် အသုံးပြုကြသည်။ မျက်လုံးတွင်းမှ ဖိအားကိုထိန်းချုပ်ခြင်းဖြင့် အမြင်ကွယ်ခြင်းနှင့် အာရုံကြောထိခိုက်မှုတို့ကိုကာကွယ်နိုင်ပါသည်။ Methazolamideသည် carbonic anhydrase inhibitorsဟုခေါ်သော ဆေးအုပ်စုဝင်ဖြစ်၏။ ၎င်းတို့သည် မျက်လုံးအတွင်း၌ အရည်ထုတ်လုပ်မှုကိုနည်းစေးခြင်းဖြင့် အာနိသင်ပြပါသည်။

Methazolamide (မတ်သဇိုလမိုဒ်) ဘယ်လိုသောက်သုံးသင့်သလဲ

ဆရာဝန်ညွှန်ကြားသည့်အတိုင်းဆေးကိုသောက်ပါ။ ပုံမှန်အားဖြင့် တစ်ရက်လျှင် ၂-၃ ကြိမ်ခန့် သောက်ရပါသည်။ ဤဆေးကိုအစာအိမ်ရှိသူများ၌ အစာနှင့်တွဲသောက်နိုင်ပါသည်။ တစ်ချို့သောဘေးထွက်ဆိုးကျိုးများ(ဆီးကျောက်တည်ခြင်း) ဖြစ်နိုင်ချေကိုလျော့ချနိုင်ရန်အတွက် ဆရာဝန်မှ တခြားမညွှန်ကြားလျှင် ရေများများသောက်ပေးရမည်။ ဆေးပမာဏမှာသင့်ကျန်းမာရေးအခြေအနေနှင့် ကုသမှုအပေါ်တုန့်ပြန်မှုတို့တွင် မူတည်ပါသည်။

ဆေးအာနိသင်ကောင်းကောင်းရစေရန်အတွက် မှန်မှန်သောက်ပါ။ ဆေးသောက်ချိန်ကိုမှတ်မိနေစေရန် နေ့စဉ်တူညီသောအချိန်၌သာသောက်ပါ။ နေကောင်းပြီဟုစတင်ခံစားလာရသည့်တိုင် ဆေးကိုဆက်သောက်ရမည်။ ရေတိမ် သို့မဟုတ် မျက်လုံးအတွင်းမှဖိအားများခြင်းကိုခံစားရသူအများစုသည် နေမကောင်းသလိုခံစားရမည်မဟုတ်ပါ။

Methazolamide (မတ်သဇိုလမိုဒ်) ဘယ်လိုသိမ်းဆည်းရမလဲ

Methazolamideကိုတိုက်ရိုက်နေရောင်ခြည်မထိုးအောင်နှင့် စိုစွတ်မှုမရှိအောင်ထားခြင်းကအကောင်းဆုံးသိုလှောင်သိမ်းဆည်းနည်းပင် ဖြစ်သည်။ ဆေးအာနိသင်ပျက်ပြယ်ခြင်းနှင့် ဆေးအနေအထားပျက်ယွင်းမှုများမဖြစ်စေရန် Methazolamideကိုရေချိုးခန်းတွင်သိမ်းဆည်းခြင်းနှင့် ရေခဲအောင် သိမ်းဆည်းခြင်းမျိုးမပြုလုပ်ပါနှင့်။ Methazolamideဆေးအမျိုးအစားနှင့် ဆေးထုတ်လုပ်သည့်ကုမ္ပဏီကွဲပြားမှုပေါ်မူတည်ပြီးသိမ်းဆည်းသောပုံစံကွဲပြားခြားနားမှုများရှိနိုင်ပါသည်။ ထို့အတွက် ဆေးဘူးအခွံ၌ပါသောသိုလှောင်သိမ်းဆည်းမှု ညွှန်ကြားချက်ကို ကြည့်ရှုစစ်ဆေးခြင်းသို့မဟုတ် ဆေးဝါးကျွမ်းကျင်သူအားမေးမြန်းခြင်းကိုအမြဲလုပ်ပါ။ လုံခြုံစိတ်ချရစေရန်အတွက် ဆေးဝါးအကုန်လုံးကို ကလေးများ၊ အိမ်မွေးတိရိစ္ဆာန်များနှင့်ဝေးရာတွင်ထားပါ။

Methazolamideအားအိမ်သာထဲပစ်ချခြင်း၊ ရေထွက်ပေါက်များမှ ဆေးချခြင်းမျိုးအားမလုပ်သင့်ပါ။ ဆေးဝါးများကို မလိုအပ်တော့သည့်အခါ ဒါမှမဟုတ် သက်တမ်းကုန်ဆုံးသွားသည့် အခါများတွင် စနစ်တကျစွန့်ပစ်ရန် အရေးကြီး၏။ ဆေးဝါးများကို စနစ်တကျ မည်ကဲ့သို့စွန့်ပစ်ရမည်ဆိုခြင်းနှင့် ပတ်သက်၍ သင့်၏ဆေးဝါးကျွမ်းကျင်ပညာရှင်နှင့် တိုင်ပင်နိုင်ပါသည်။

ကြိုတင်သတိပြုရန်များနှင့် အသိပေးချက်များ

Methazolamide (မတ်သဇိုလမိုဒ်) အသုံးမပြုခင် ဘာတွေသိသင့်သလဲ

Methazolamideကိုမသုံးခင် ဤဆေးနှင့်ဓါတ်မတည့်မှုရှိပါက ဆရာဝန်ကိုကြိုပြောပါ။ ဤဆေးတွင် သင့်နှင့်ဓါတ်မတည့်နိုင်သည့် inactive ဓါတ်ပစ္စည်းများပါနေနိုင်ပါသည်။ အသေးစိတ်သိလိုပါက ဆေးဝါးကျွမ်းကျင်နှင့် ဆွေးနွေးပါ။

ဤဆေးကိုမသုံးခင် သင့်ကျန်းမာရေးရာဇဝင်များကို ဆရာဝန်သို့မဟုတ် ဆေးဝါးကျွမ်းကျင်အားပြောပြပေးပါ။ အထူးသဖြင့် အက်ဒရီနယ်ဂလင်း ပြဿနာများ (ဥပမာအက်ဒီဆွန်ရောဂါ)၊ အသည်းရောဂါ (အသည်းခြောက်ခြင်း)၊ အသက်ရှူခြင်းဆိုင်ရာ ပြဿနာများ (အဆုတ်ပွခြင်း၊ အန်ဖိုက်စီးမား၊ အဆုတ်ပိုးဝင်ခြင်း)၊ ဆီးချို၊ ဂေါက်ရောဂါ၊ ကျောက်ကပ်ပြဿနာ (ဆီးကျောက်တည်ဖူးခြင်း)၊ သတ္တုဓါတ် မညီမျှခြင်း (ဆိုဒီယမ် ပိုတက်စီယမ်နည်းခြင်း၊ hyperchloremic acidosis)၊ သိုင်းရွိုက်ဂလင်းတက်ကြွလွန်ခြင်း။

ဤဆေးကြောင့် ခေါင်းမူးခြင်း၊ အိပ်ငိုက်ခြင်းတို့ ဖြစ်စေတတ်ပါသည်။ ဆေးမှ မိမိအပေါ်အကျိုးသက်ရောက်မှုကိုကောင်းကောင်းမသိရသေးမချင်း နိုးကြားမှု၊ အမြင်အာရုံ ကြည်လင်မှုတို့ကိုလိုအပ်သောကား၊ စက်မောင်းခြင်းများမပြုလုပ်ပါနှင့်။ အရက်ပါသောအချိုရည်များကိုကန့်သတ်ပေးပါ။

ဤဆေးသည် နေရောင်အထိမခံဖြစ်စေနိုင်ပါသည်။ နေနှင့်ထိတွေ့ချိန်များကိုကန့်သတ်ပေးပါ။ နေပူဆာလှုံခြင်းနှင့် နေမီးအိမ်လှုံခြင်းများကိုရှောင်ပါ။ အပြင်ထွက်ပါကနေရောင်ခံဆေးများ၊ အကာအကွယ်ဖြစ်စေမည့် အဝတ်အစားများကို ဝတ်ဆင်သွားပါ။ အရည်ကြည်ဖုထခြင်း၊ နီခြင်း၊ နေလောင်ခြင်းများဖြစ်လာပါက ဆရာဝန်နှင့် ချက်ချင်းပြသပါ။

ခွဲစိတ်မှုမလုပ်ခင် သင်သုံးနေသည့်ပစ္စည်းများ (ဆရာဝန်ညွှန်သည့်ဆေး၊ အညွှန်းမလိုပဲသောက်နိုင်သည့်ဆေးနှင့် ဘယပင်ထွက်ဆေးများ) ကို ဆရာဝန်အားပြောပါ။

ကိုယ်ဝန်ဆောင်စဉ်၌ ဆေးကိုအမှန်တကယ်လိုအပ်မှသာအသုံးပြုပါ။ ကောင်းကျိုးဆိုးကျိုးများအတွက် ဆရာဝန်နှင့် တိုင်ပင်ပါ။

နို့ရည်ထဲသို့ ဆေးဖြတ်နိုင်မဖြတ်နိုင် မသိရသေးပါ။ နို့တိုက်ကျွေးမှုမစတင်ခင် ဆရာဝန်နှင့် တိုင်ပင်ဆွေးနွေးပါ။

ကိုယ်ဝန်ဆောင်နေချိန် ဒါမှမဟုတ် ကလေးနို့တိုက်နေချိန်မှာ Methazolamide (မတ်သဇိုလမိုဒ်) ကိုသုံးစွဲဖို့ စိတ်ချရပါသလား

ယခုဆေးဝါးကို ကိုယ်ဝန်ဆောင်နေချိန်နှင့် ကလေးနို့တိုက်နေချိန်တွင် အသုံးပြုလျှင် ဆိုးကျိုးများရှိမရှိဆုံးဖြတ်နိုင်ရန်အတွက် လုံလောက်သောလေ့လာစမ်းသပ်ချက်များမရှိပါ။ ဆေးမသုံးစွဲမီတွင် ဖြစ်နိုင်ချေရှိသောကောင်းကျိုးများနှင့် ဆိုးကျိုးများအားလုံးကိုချိန်ဆနိုင်ရန်အတွက် သင့်ဆရာဝန်နှင့် တိုင်ပင်ဆွေးနွေးမှုပြုလုပ်ပါ။ ယခုဆေးဝါးသည် အမေရိကန်ပြည်ထောင်စုအစားအသောက်နှင့် ဆေးဝါးကွပ်ကဲရေးအဖွဲ့၏ သတ်မှတ်ချက်အရ ကိုယ်ဝန်ဆောင်များတွင် ထိခိုက်နိုင်ချေအဆင့် Cရှိသည်ဟုသတ်မှတ်ထားသည်။

အမေရိကန်ပြည်ထောင်စုအစားအသောက်နှင့် ဆေးဝါးကွပ်ကဲရေးအဖွဲ့၏ ကိုယ်ဝန်ဆောင်များတွင် ထိခိုက်နိုင်ချေအဆင့် သတ်မှတ်ချက်များမှာအောက်ပါအတိုင်းဖြစ်သည်။

• A=ဆိုးကျိုးမရှိပါ။
• B=လေ့လာမှုအချို့အရဆိုးကျိုးမရှိပါ။
• C=ဆိုးကျိုးအချို့ရှိနိုင်ပါသည်။
• D=ဆိုးကျိုးများရှိသည့် အထောက်အထားများရှိပါသည်။
• X=သောက်သုံး၍မရပါ (လုံးဝမတည့်ပါ)။
• N=အခြေအနေကိုမသိရသေးပါ။

ဘေးထွက်ဆိုးကျိုးများ

Methazolamide (မတ်သဇိုလမိုဒ်) ကိုအသုံးပြုခြင်းဖြင့် ဘယ်လိုဘေးထွက်ဆိုးကျိုးတွေဖြစ်နိုင်သလဲ

ခန္ဓါကိုယ်မှ ဆေးကိုလက်ခံရန် ချိန်ညှိနေစဉ် ပျို့ခြင်း၊ အစားအသောက်ပျက်ခြင်း၊ အရသာပြောင်းခြင်း၊ အန်ခြင်း၊ ဝမ်းလျှောခြင်း၊ မကြာခဏဆီးသွားခြင်း၊ ခေါင်းမူးခြင်း၊ အိပ်ငိုက်ခြင်းသို့မဟုတ် မောပန်းနေခြင်းများ ဖြစ်လာနိုင်ပါသည်။ အဆိုပါဘေးထွက်ဆိုးကျိုးများပျောက်မသွားလျှင် သို့မဟုတ် ပိုဆိုးလာလျှင် ဆရာဝန်၊ ဆေးဝါးကျွမ်းကျင်ကိုချက်ချင်းပြောပါ။

ဤဆေးကို ဆရာဝန်မှပေးခြင်းသည် ဘေးထွက်ဆိုးကျိုးထက် အကျိုးကျေးဇူးကပိုများသောကြောင့် ပေးခြင်းဖြစ်ကြောင်းသိထားပါ။ လူအတော်များများ၌ ဤဆေးကြောင့် ပြင်းထန်သည့်ဘေးထွက်ဆိုးကျိုးများ ဖြစ်လေ့မရှိပါ။

ပြင်းထန်သည့်ဘေးထွက်ဆိုးကျိုးများဖြစ်သောကျောက်ကပ်လက္ခဏာများ (ဆီးသွားလျှင်နာခြင်း၊ ဖျားခြင်း၊ ချမ်းတုန်ခြင်း၊ ပန်းရောင်ဆီး၊ သွေးရောင်ဆီးသွားခြင်း)၊ ပိုးဝင်သည့်လက္ခဏာများ (လည်းချောင်းနာခြင်း၊ ဖျားခြင်း၊ ချမ်းတုန်ခြင်း)၊ သွေးထွက်လွယ် အညိုအမည်းစွဲလွယ်ခြင်း၊ ခြေလက်တို့၌ ထုံခြင်းကျင်ခြင်း၊ နားထဲ၌ တစီစီမြည်ခြင်းတို့ဖြစ်လာပါက ဆရာဝန်နှင့် ချက်ချင်းပြသပါ။

အောက်ပါပြင်းထန်သောဘေးထွက်ဆိုးကျိုးများ ဖြစ်လာပါကဆေးကုသမှု ချက်ချင်းခံယူရမည်။ ပျို့ခြင်းအန်ခြင်းမှာရပ်မသွားလျှင်၊ အစားအသောက်ပျက်ခြင်း၊ ဗိုက်နာခြင်း၊ မျက်လုံး အရေပြားများဝါခြင်း၊ ဆီးရောင်ရင့်ခြင်း၊ စိတ်ရှုပ်ထွေးခြင်း၊ နှလုံးခုန်နှုန်း မြန်ခြင်း၊ တက်ခြင်း။

ဤဆေးကြောင့် ပြင်းထန်သည့်ဓါတ်မတည့်ဖြစ်ခြင်းမှာရှား၏။ သို့သော် အောက်ပါပြင်းထန်ဓါတ်မတည့် လက္ခဏာများဖြစ်လာပါကအရေးပေါ်ကုသမှုများခံယူရပါမည် – အကွက်ထခြင်း၊ ယားခြင်း၊ ရောင်ခြင်း (အထူးသဖြင့် မျက်နှာ၊လျှာ၊ လည်ချောင်း)၊ ခေါင်းတအားမူးခြင်းနှင့် အသက်ရှူရခက်ခြင်း။

ယခုဖော်ပြပါ ဘေးထွက်ဆိုးကျိုးများကိုခံစားရမှုမှာတစ်ဦးနှင့်တစ်ဦးကွဲပြားခြားနားမှု ရှိနိုင်ပါသည်။ အထက်ဖော်ပြပါ ဘေးထွက်ဆိုးကျိုးများတွင် မပါဝင်သည့် ဘေးထွက်ဆိုးကျိုးများလည်းရှိနိုင်သည်။ ဘေးထွက်ဆိုးကျိုးနှင့်ပတ်သက်၍ စိုးရိမ်ပူပန်မှုများရှိပါကသင်၏ဆရာဝန် သို့မဟုတ် ဆေးဝါးကျွမ်းကျင်ပညာရှင်နှင့် တိုင်ပင်ဆွေးနွေးမှုများပြုလုပ်ပါ။

ဆေးဓါတ်ပြုမှုများ

ဘယ်ဆေးတွေက Methazolamide (မတ်သဇိုလမိုဒ်) နဲ့ ဓါတ်ပြုနိုင်သလဲ

ဤဆေးနှင့်ဓါတ်ပြုနိုင်သောဆေးကုန်များမှာmemantine, methenamineတို့ဖြစ်သည်။

သင်သုံးသမျှဆေးများတွင် အက်စ်ပရင်နှင့် အက်စ်ပရင်လိုဆေးမျိုးများပါနေနိုင်ပြီးဤဆေးနှင့် တွဲသောက်ပါက ပြင်းထန်သောဘေးထွက်ဆိုးကျိုးများဖြစ်လာနိုင်သဖြင့် ဆေးအားလုံး၏အညွှန်းစာကိုသေချာဖတ်ပါ။ သို့သော် နှလုံးဖောက်ခြင်း၊ လေဖြတ်ကာကွယ်ခြင်းတို့အတွက် ဆရာဝန်မှ အက်စ်ပရင်ပမာဏနည်းနည်းပေးထားပါက ဆရာဝန်ညွှန်ကြားသည့်အတိုင်းလိုက်နာပါ။ အသေးစိတ်အချက်အလက်များအတွက် ဆရာဝန် သို့မဟုတ် ဆေးဝါးကျွမ်းကျင်တို့အားမေးမြန်းပါ။

ဤဆေးသည် တစ်ချို့သောဓါတ်ခွဲစစ်ဆေးခြင်းများကိုနှောက်ယှက်နိုင်သောကြောင့် ရလဒ်အမှားများ ဖြစ်လာနိုင်သည်။ ထို့ကြောင့် ဓါတ်ခွဲဝန်ထမ်းများ၊ ဆရာဝန်များသိအောင် ဤဆေးသုံးနေရကြောင်းသေချာပြောပြပါ။

Methazolamideသည် သင်အခုသောက်သုံးနေသည့် တခြားသောဆေးဝါးများနှင့် ဓါတ်ပြုမှုများဖြစ်နိုင်ပြီး ဆေးဝါးအာနိသင်ပြောင်းခြင်းနှင့် ဘေးထွက်ဆိုးကျိုးဖြစ်လာနိုင်သောပြောင်းလဲမှုများဖြစ်နိုင်ပါသည်။ မလိုလားအပ်သောဆေးဝါးဓါတ်ပြုမှုများမဖြစ်လာစေရန် သင်လက်ရှိသောက်သုံးနေသော ဆေးဝါးများအားလုံးကိုစာရင်းပြုစုထားပြီး (စာရင်းလုပ်သည့်အခါ ဆရာဝန်ညွှန်ကြားထားသည်များ၊ မညွှန်ကြားဘဲသောက်သုံးနေသည်များ၊ သဘာဝဆေးဘက်ဝင်ပစ္စည်းများ အားလုံးပါရပါမည်။) ဆရာဝန် သို့မဟုတ်ဆေးဝါးကျွမ်းကျင်သူအားအမြဲပြောပြပါ။ ဆေးဝါးများကို ဆရာဝန်ခွင့်ပြုချက်မပါပဲသောက်သုံးခြင်း၊ ရပ်ဆိုင်းခြင်း၊ ပမာဏပြောင်းလဲခြင်းများမပြုလုပ်ပါနှင့်။

အစားအသောက်တွေနဲ့ အရက်က Methazolamide (မတ်သဇိုလမိုဒ်) နဲ့ ဓါတ်ပြုနိုင်သလား

Methazolamide က အစားအသောက် သို့မဟုတ် အရက်သေစာနှင့် ဓါတ်ပြုမှုများဖြစ်နိုင်ပြီး ဆေးဝါးများ၏အကျိုးသက်ရောက်မှုပုံစံနှင့် ဘေးထွက်ဆိုးကျိုးဖြစ်လာနိုင်သောပြောင်းလဲမှုများ ဖြစ်နိုင်ပါသည်။ မလိုလားအပ်သည့် ဓါတ်ပြုမှုများမဖြစ်လာစေရန် အစားအသောက်၊ အရက်သေစာများနှင့် ဓါတ်ပြုနိုင်ချေရှိမရှိကိုမေးမြန်းတိုင်ပင်ပါ။

ဘယ်ရောဂါအခြေအနေတွေက Methazolamide (မတ်သဇိုလမိုဒ်) နဲ့ ဓါတ်ပြုနိုင်သလဲ

Methazolamideသည် သင်၏ နဂိုကျန်းမာရေးအခြေအနေများနှင့် သက်ရောက်ဓါတ်ပြုမှုများရှိနိုင်ပါသည်။ သင်၏ ကျန်းမာရေးအခြေအနေအားပိုဆိုးသွားစေခြင်းသို့မဟုတ် ဆေးသက်ရောက်မှုပုံစံပြောင်းလဲသွားခြင်းများ ဖြစ်နိုင်ပါသည်။ ထို့ကြောင့် သင်၏ကျန်းမာရေးအခြေအနေအကုန်လုံးကိုသင့်ဆရာဝန် သို့မဟုတ် ဆေးဝါးကျွမ်းကျင်ပညာရှင်ကိုအသိပေးရန်အရေးကြီးပါသည်။

သောက်သုံးရန်အညွှန်း

ယခုအချက်အလက်များသည် ဆေးပညာအကြံပေးမှုကို အစားထိုးရန်အတွက်မဟုတ်ပါ။ သင်သည်သင့်ဆရာဝန်နှင့် အမြဲတမ်းတိုင်ပင်ဆွေးနွေးသင့်ပါသည်

အရွယ်ရောက်ပြီးသူတွေအတွက် Methazolamide (မတ်သဇိုလမိုဒ်) ရဲ့ အသုံးပြုရမယ့်ပမာဏကဘယ်လောက်လဲ

တစ်ရက်လျှင် 50 to 100 mgကို ၂-၃ ကြိမ် သောက်ရန်။

မှတ်ချက်။ ။ miotic နှင့် osmotic agentsတို့နှင့်အတူတွဲသုံးနိုင်ပါသည်။

အသုံး။ ။ မျက်လုံးတွင်းမှဖိအားကိုလျော့ချပြီးကုသရေးအဖြစ်သုံးရသောမျက်လုံးရောဂါများဥပမာနာတာရှည်ထောင့်ပွင့်ရေတိမ်၊ တစ်ဆင့်ခံဖြစ်လာသောရေတိမ်နှင့် ထောင်ကျဉ်းပိတ်ရေတိမ်တို့အားကုသရန်။

ကျောက်ကပ်အတွက်ပမာဏချိန်ညှိခြင်း

ကျောက်ကပ်သိသိသာသာမကောင်းပါက လုံးဝမသုံးရ။

အသည်းအတွက်ပမာဏချိန်ညှိခြင်း

အသည်းသိသိသာသာမကောင်းပါက လုံးဝမသုံးရ။

တခြားမှတ်ချက်များ

စောင့်ကြည့်ခြင်း

– sulfonamidesများတွင်ဖြစ်လေ့ရှိသောသွေးဓါတ်ပြုမှုများကိုစောင့်ကြည့်ရမည်။ ဆေးကိုမစခင်နှင့် သောက်နေစဉ် CB နှင့် Platelet count ကိုမှန်မှန်စစ်ပေးရမည်။

– သွေးတွင်းမှလျှပ်ကူးသတ္တုဓါတ်များကိုကာလအပိုင်းအခြားနှင့် စောင့်ကြည့်ရမည်။

– sulfonamidesဓါတ်ပြုမှုများဖြစ်သောဆေးဓါတ်မတည့်ခြင်း၊ ဖျားခြင်း၊ အကွက်ထခြင်း (erythema multiforme, Stevens-Johnson syndrome, toxic epidermal necrolysis), crystalluria, renal calculus, bone marrow depression, thrombocytopenic purpura, hemolytic anemia, leukopenia, pancytopenia နှင့်agranulocytosisတို့အားသတိထားရန်နှင့် ဖြစ်လာပါက ဆရာဝန်ဆီချက်ချင်းပြရန် လူနာကိုအကြံပြုထားရမည်။

– ဤဆေးနှင့် အက်စ်ပရင်ပမာဏများများပေးခြင်းတွဲမိပါက ဖြစ်လာတတ်သောလက္ခဏာများ – အစားအသောက်လုံးလုံးပျက်သွားခြင်း၊ အသက်ရှူမြန်ခြင်း၊ နှုံးခွေခြင်း၊ ကိုမာဝင်ခြင်းနှင့် သေခြင်းအထိ ဖြစ်လာနိုင်သောကြောင်းလူနာကိုအသိပေးပါ။

ကလေးတွေအတွက် Methazolamide (မတ်သဇိုလမိုဒ်) ရဲ့ အသုံးပြုရမယ့်ပမာဏကဘယ်လောက်လဲ

ကလေးလူနာများ၌ အချိုးအစားဘယ်လောက်ပေးရမည်ဆိုခြင်းကိုအတည်မပြုရသေးပါ။ သင့်ကလေးငယ်အတွက် သောက်သုံးရန် စိတ်ချရမှုရှိချင်မှရှိနိုင်ပါလိမ့်မည်။ ဘယ်ဆေးဝါးမဆို အသုံးမပြုရသေးခင်၌ စိတ်ချရမှုအနေအထားကိုအပြည့်အဝနားလည်ဖို့ရန် လိုအပ်ပါသည်။ အချက်အလက်များထပ်မံရရှိရန်အတွက် သင်၏ဆရာဝန် သို့မဟုတ် ဆေးဝါးကျွမ်းကျင်သူနှင့် တိုင်ပင်ဆွေးနွေးပါ။

Methazolamide (မတ်သဇိုလမိုဒ်) ကိုဘယ်လိုရရှိနိုင်သလဲ

Methazolamideကိုအောက်ဖော်ပြပါ ဆေးဝါးပုံစံများနှင့် အချိုးအစားများဖြင့် ရရှိနိုင်ပါသည်။

• သောက်ဆေးပြား

အရေးပေါ်အခြေအနေ ဒါမှမဟုတ် ဆေးပမာဏလွန်သွားချိန်မှာ ဘာလုပ်သင့်သလဲ။

အရေးပေါ်အခြေအနေသို့မဟုတ် ဆေးပမာဏလွန်သွားသည့်အခြေအနေများတွင် အရေးပေါ်ဆေးရုံဆေးခန်းများသို့ သွားရောက်ကုသမှုခံယူပါ။

ဆေးသောက်ရမယ့်အချိန်လွတ်သွားခဲ့ရင် ဘာလုပ်ရမလဲ။

Methazolamideကိုသုံးစွဲဖို့ လွတ်သွားခဲ့ပါက (မေ့ခဲ့ပါက) သတိရသည့်အချိန်တွင် အမြန်ဆုံးသုံးပါ။ သို့သော်လည်းနောက်တစ်ကြိမ်သုံးရမည့်အချိန်နှင့် နီးကပ်နေပြီဆိုပါကလွတ်သွားသောအကြိမ်ကိုကျော်ပြီးပုံမှန်အချိန်၌ပင်သုံးလိုက်ပါ။ ဆေးပမာဏအား နှစ်ဆတိုးတာမျိုးမလုပ်ပါနှင့်။

Hello Health Group သည် ဆေးပညာအကြံပြုချက်များ၊ ရောဂါရှာဖွေမှုများနှင့် ကုသမှုများကို မပြုလုပ်ပေးပါ