အစာအိမ်အက်ဆစ်တွေ လျှံတက်ခြင်းကြောင့် ရင်ပူခြင်းကို သက်သာစေမယ့် နည်းလမ်းခြောက်သွယ်

သင့်မှာ ရင်ပူတဲ့ဝေဒနာ ခံစားနေရပါသလား။ ဘာအစာပဲ စားလိုက်စားလိုက် အက်ဆစ်တွေ ပြန်ဆန်တက်လာပြီး ရင်ပူမှာကို ကြောက်နေပါသလား။

တချို့အစားအစာတွေဟာ အစာအိမ်ကနေ အက်ဆစ်ထုတ်လုပ်မှုကို ပိုများစေတဲ့အတွက် ရင်ပူတဲ့ဝေဒနာကို ပိုမိုခံစားရစေနိုင်တယ်ဆိုတာ မှန်ပါတယ်။ အစားအသောက်ကို နည်းနည်းချင်းစီစားတာ၊အစာစားပြီးပြီးချင်းမှာ အကုန်းအကွပြုလုပ်တာ ဒါမှမဟုတ် လဲလျောင်းတာတို့ကို ရှောင်ကျဉ်တာတွေအပြင် အခြားသော အကျိုးရှိတဲ့ နည်းလမ်းလေးတွေကို ဖော်ပြပေးထားပါတယ်။

အချိုနဲ့ ကာဘိုဟိုက်ဒရိတ်များတဲ့ အရည်တွေကို အများကြီးမသောက်ပါနဲ့။

အချိုနဲ့ ကာဘိုဟိုက်ဒရိတ်ပမာဏ များပြားစွာ ပါဝင်တဲ့ အစားအစာတွေဟာ ရင်ပူရခြင်းရဲ့ အဓိက အကြောင်းရင်းတွေ ဖြစ်တဲ့အတွက် သင်စားနေကျအစာတွေမှာ ပါဝင်တဲ့ ကာဘိုဟိုက်ဒရိတ်ပမာဏကို ထိန်းချုပ်လိုက်ခြင်းအားဖြင့် ရင်ပူတဲ့ ဝေဒနာကို အလွယ်တကူ သက်သာစေမှာ ဖြစ်ပါတယ်။

အစာအိမ်တွင်း အက်ဆစ်ဓါတ်နည်းပါးခြင်းနဲ့ ကာဘိုဟိုက်ဒရိတ်ဓါတ် အလွန်အမင်းများပြားခြင်းဟာ ရင်ပူရခြင်းရဲ့ နောက်ခံအကြောင်းရင်းတခု ဖြစ်လို့ပါပဲ။ ကာဘိုဟိုက်ဒရိတ်တွေဟာ အစာအိမ်ထဲမှာ အချဉ်ပေါက်ပြီး ဓါတ်ငွေ့တွေ ဖြစ်လာကာ အစာအိမ်တွင်းဖိအားကို များစေတဲ့အပြင် လေပွ၊လေထတာ၊ခံတွင်းနံ့နံတာနဲ့ အစာမကြေတာတွေကို ဖြစ်စေနိုင်ပါတယ်။

ဒါ့အပြင် အူလမ်းကြောင်းမှာ ဖြစ်ပေါ်တတ်တဲ့ အစာခြေခြင်းဆိုင်ရာ အခြားသော ပြဿနာတွေကိုလည်း ပိုဆိုးစေပါတယ်။ ဟုတ်ပြီ၊ ဒါဆိုရင် သူတို့တွေအစား ဘာသောက်ရမလဲ။ လက်ဖက်ရည်၊သစ်သီးဖျော်ရည် (အထူးသဖြင့် မချဉ်တဲ့အသီးတွေကနေ လုပ်ထားတဲ့ ဖျော်ရည်) တွေကို သောက်နိုင်ပါတယ်။

အကျိုးရှိတဲ့ အဆီဓါတ်တွေနဲ့ ပရိုတင်းဓါတ်တွေကို ပိုစားပေးပါ။

အဆိုပါ အစားအစာတွေဟာ အာဟာရဓါတ်တွေ ပြည့်ဝစွာ ပါဝင်တဲ့အပြင် အချိုဓါတ်နဲ့ ကာဘိုဟိုက်ဒရိတ်ဓါတ်တွေ စားလိုစိတ်ကိုလည်း နည်းပါးစေပါတယ်။ အဆီတွေဟာ အစာအိမ်နဲ့ အူလမ်းကြောင်းနံရံတွေ ရောင်ရမ်းမှုကို အံ့ဩလောက်အောင် သက်သာပျောက်ကင်းစေပြီး ပရိုတင်းကတော့ အစာချေဖျက်မှုကို အားပေးပါတယ်။

ပရိုတင်းကို ချေဖျက်တဲ့ အင်ဇိုင်းမ်တွေအလုပ်လုပ်နိုင်အောင် ဟိုက်ဒရိုကလိုရစ်အက်ဆစ်က ပြုလုပ်ပေးပါတယ်။ ဒါကြောင့် ပရိုတင်းများများစားပေးမယ်ဆိုရင် သင့်အစာအိမ်ထဲမှာရှိတဲ့ ပိုလျှံအက်ဆစ်တွေဟာ အစာရေမြိုထဲကို ပြန်ဆန်တက်မယ့်အစား ပရိုတင်းဓါတ်တွေကို ချေဖျက်ရာမှာ အသုံးပြုလိုက်ရပါတော့တယ်။

ဘာတွေကို စားရမလဲ။

· အသား၊ငါးတွေ။

· မွေးမြူရေးကြက်ဥတွေ။

· နို့နဲ့ နို့ထွက်ပစ္စည်းတွေ။

· (သေချာစွာ စီမံပြင်ဆင်ထားတဲ့)အခွံမာသီးတွေ၊အစေ့တွေ။

· အရည်အသွေးကောင်းမွန်တဲ့ ဆီတွေ : ဝက်ဆီ၊အမဲဆီ၊ဆီအုန်းဆီ၊သံလွင်ဆီ အစရှိသဖြင့်။

သင့်အစားအစာထဲမှာ ပါတဲ့ gluten ဓါတ်ပမာဏကို ကန့်သတ်ပါ။

အထက်မှာ ဖော်ပြခဲ့တဲ့ အချက်လေးတွေနဲ့ မသက်သာသေးဖူးဆိုရင် gluten ဓါတ်မပါတဲ့ အစားအသောက်တွေကို ရွေးချယ်စားသောက်ရပါမယ်။gluten ဆိုတာ ဂျုံအမျိုးမျိုးမှာ တွေ့ရတတ်တဲ့ အခြေခံပရိုတင်းတမျိုး ဖြစ်ပါတယ်။

gluten မှာပါဝင်တဲ့ ပရိုတင်းအချို့ဟာ ရှုပ်ထွေးလွန်းတာမို့ သင့်ခန္ဓါကိုယ်အနေနဲ့ အစာခြေဖို့ အခက်တွေ့ရပါတယ်။gluten ပါဝင်တဲ့ အစားအစာပုံစံတွေ အမျိုးမျိုးရှိပြီး သူတို့ဟာ ကျွန်တော်တို့ရဲ့ ခန္ဓါကိုယ်ကို ဆိုးကျိုးတွေ ဖြစ်စေတယ်လို့ ဆိုပါတယ်။

gluten မပါဝင်တဲ့ အစားအသောက်တွေကို စားရင် စွမ်းအင်ရရှိမှုတော့ လျော့နည်းသွားနိုင်ပါတယ်။ သင့်အနေနဲ့ gluten လုံးဝမပါဝင်တဲ့ အစားအသောက်တွေကို ရက်သတ္တပတ် နှစ်ပတ်လောက် စမ်းပြီး စားသုံးကြည့်နိုင်ပါတယ်။

ဆိုလိုတာက အီကြာကွေး၊ပေါင်မုန့်၊ကိတ်မုန့်၊ပတ်စတာ ခေါက်ဆွဲ၊ပီဇာ၊ယိုသွပ်မုန့်လေးတွေ၊ဒိုးနတ်၊ဘီစကစ် နဲ့ ကွတ်ကီး စတဲ့ အစားအစာတွေကို မစားရဖူးလို့ ပြောချင်တာ ဖြစ်ပါတယ်။ သူတို့အစား ဘာစားရမလဲ။Oatmeal (ကွေကာအုတ်) ဟာ သင့်အစာအိမ်အတွက် ပိုမို သင့်တော်ပါတယ်။Oatmeal ဟာ gluten ပါဝင်တဲ့ အစားအစာတွေနဲ့ ခပ်ဆင်ဆင်တူပြီး ဗိုက်လည်းဝစေပါတယ်။

အချဉ်ဖောက်ထားတဲ့ အစားအသောက်တွေရဲ့ အကူအညီကို ယူပါ။

အချဉ်ဖောက်ထားတဲ့ အစားအသောက်တွေ များများစားပေးမယ်ဆိုရင် သင့်အနေနဲ့ ပိုပြီး အစာကြေပါလိမ့်မယ်။ အစာချေခြင်းလုပ်ငန်းစဉ်ကို ကူညီပေးနိုင်တဲ့ ဘက်တီးရီးယားတွေ ကျွန်တော်တို့ အစာအိမ်ထဲမှာ အများအပြားရှိနေပါတယ်။

အဆိုပါ ကောင်းမွန်တဲ့ ဘက်တီးရီးယားတွေဟာ အချဉ်ဖောက်ထားတဲ့ အစားအစာတွေမှာ ဘီလျံနဲ့ချီပြီးပါဝင်တာမို့ ကျွန်တော်တို့အစာအိမ်ထဲမှာ ရှိတဲ့ အစာတွေကို လွယ်ကူစွာ ချေပေးနိုင်ပါတယ်။ ဒါကြောင့် ဒီဘက်တီးရီးယားတွေဟာ ရင်ပူတဲ့ဝေဒနာအပါအဝင် အခြားသော အစာချေခြင်းဆိုင်ရာ ပြဿနာတွေကို ကူညီဖြေရှင်းပေးနိုင်ပါတယ်။

ဘယ်လိုအစာမျိုးတွေမှာ ကောင်းမွန်တဲ့ ဘက်တီးရီးယားတွေ ပါဝင်သလဲ။

မုန်လာချဉ်၊မုန်လာဥနီချဉ် အစရှိသဖြင့်။

အချဉ်ဖောက်ထားတဲ့ အရည်တွေ။

ကင်မ်ချီ။

သကြားမပါတဲ့ ဒိန်ချဉ်။

အရိုးပြုတ်ရည်တွေကို သောက်ပါ။

အစာအိမ်နဲ့ အူလမ်းကြောင်းနံရံတွေကို အကျိုးပြုတဲ့ အရိုးပြုတ်ရည်တွေကို အိမ်မှာပဲ အလွယ်တကူ လုပ်သောက်နိုင်ပါတယ်။ အရိုးတွေမှာ သတ္တုဓါတ်၊ရောင်ရမ်းခြင်းတွေကို သက်သာစေတဲ့ amino နဲ့ gelatin တို့ပါဝင်ပြီး ပရိုတင်းဓါတ်တွေလည်း ကြွယ်ဝပါတယ်။

တကယ်လို့ သင့်အနေနဲ့ အဆီနဲ့ ပရိုတင်းတွေကို စားတဲ့အခါ အစာချေဖို့ အခက်အခဲရှိတယ်ဆိုရင် အရိုးပြုတ်ရည်တွေက ဒီပြဿနာကို ဖြေရှင်းပေးပါလိမ့်မယ်။ ဘယ်လိုပရိုတင်းတွေကို စားနိုင်သေးသလဲ။

ငါးနဲ့ ပင်လယ်စာတွေ ဒါမှမဟုတ် ကြက်သား၊ကြက်ဆင် စတဲ့ အစားအစာတွေကိုလည်း စားသုံးနိုင်ပါတယ်။ အရေခွံတွေကို မစားဖို့တော့ လိုပါလိမ့်မယ်။

ပန်းသီးရည်ဗနီဂါ ကို စမ်းသောက်ကြည့်ပါ။

antacid နဲ့ ဓါတ်ပြုနိုင်တဲ့ ဆေးတွေကို သုံးစွဲနေရတာပဲ ဖြစ်ဖြစ် ဒါမှမဟုတ် ဆေးမသောက်ချင်လို့ပဲ ဖြစ်ဖြစ် ပန်းသီးရည်ဗနီဂါ ဒါမှမဟုတ် ငှက်ပျောသီးဗနီဂါတို့ကို မြည်းစမ်းကြည့်နိုင်ပါတယ်။ ဗနီဂါဟာ အက်ဆစ်ဓါတ်ဖြစ်တဲ့အတွက် အစာအိမ်ထဲကို ဘာလို့များ အက်ဆစ်ထပ်ထည့်ခိုင်းရတာလဲလို့ သင်တွေးကောင်းတွေးနေပါလိမ့်မယ်။ မှန်ပါတယ်၊

ဗနီဂါဟာ အစာအိမ်ထဲမှာရှိတဲ့ အက်ဆစ်ပမာဏကို လျှော့ချမပေးနိုင်ပေမယ့် အစာအိမ်ညှစ်တာကို နည်းပါးစေတဲ့အတွက် အက်ဆစ်ဓါတ်တွေ အပေါ်ကို ပြန်ဆန်မတက်အောင် ထိန်းထားပေးနိုင်ပါတယ်။ ဗနီဂါလက်ဖက်ရည်ဇွန်း တဇွန်း ဒါမှမဟုတ် နှစ်ဇွန်းကို ရေနဲ့ရောပြီး ထမင်းစားခါနီးတိုင်း သောက်ပါ။ ဗနီဂါဟာ အံ့ဩဖို့ကောင်းလောက်အောင် အစွမ်းပြပါလိမ့်မယ်။

အစာအိမ်ကို တည်ငြိမ်စေတဲ့ အခြားသော အစားအစာတွေက ဘာတွေလဲ။

ဂျင်း၊ငှက်ပျောသီး နဲ့ (သဘာဝသစ်ဥသစ်ဖုတွေနဲ့ ပြုလုပ်ထားတဲ့) ရေနွေးကြမ်း စတာတွေပဲ ဖြစ်ပါတယ်။ ရင်ပူတဲ့ ဝေဒနာ ခံစားနေရတဲ့အခါ အဆီအဆိမ့်တွေ၊သကြား နဲ့ ကဖင်းတို့ကို ရှောင်ရှားရပါမယ်။

အဆိုပါ အစားအစာတွေအစား အစာအိမ်တွင်း အက်ဆစ်စုပ်ယူမှု အားကောင်းစေပြီး အဆီပါဝင်မှု နည်းပါးကာ အမျှင်ဓါတ်ကြွယ်ဝတဲ့ အစားအစာတွေကို စားသုံးရပါမယ်။ အထက်ပါ အစားအစာတွေကို ဆေးဝါးတွေနဲ့ ပေါင်းစပ်သုံးစွဲတဲ့အခါ ရင်ပူခြင်းကို သိသာထင်ရှားစွာ လျှော့ချသက်သာစေနိုင်ပါတယ်။